Mispillinn að verða allaufgaður í Tómasarhaganum

Var á röltinu í vesturbæ Reykjavíkur undir kvöld í gær á meðan beðið var eftir Háskólabíó.  Tók eftir því að í garði einum við Tómasarhaga var mispill nærri því allaufgaður.  Á þessum stað virðist vera sæmilega  skjólsælt og runnarnir liggja vel við lágri vetrarsólinni.

Svipað er væntanlega einnig ástatt víðar í borginni, s.s. í Laugardalnum og í Fossvogi.  Ef þessi tíð helst næstu tvær vikurnar má gera ráð fyrir því að grasblettir taki að grænka, páskalijur koma upp og snemmbúnar tjártegundir bruma og jafnvel laufgast.  Jarðvegshitamælingar við Veðurstofuna sýn svo ekki verður um villst að frost í jörðu er sama sem ekkert. Það eru því öll skilyrði til þess að gróður taki við sér svo fremi að tíðn haldist.

Það hefur verið talsverð ósamkvæmni í 5-10 daga spám að undanförnu.  Ýmist er spá nokkuð eindregnum hlýindum með S- og SA-átt og vætu, eða að vindur snúist til A- og NA-áttar um og upp úr miðri vikunni með bjartvirði.  Þessháttar veðurlag er ekki sérlega hagstætt gróuðurframvindu í görðum eins og gefur að skilja. Næturfrost fylgja slíkri tíð og mikil hitasveifla dags og nætur.  En það er kaldur N-blásturinn sem samt er hvimleiðastur þegar vorgróður er annars vegar.  Ekkert því líkt er að sjá í spánum a.m.k. fram yfir næstu helgi. 

Ef einhver lumar á nýjum myndum af laufguðum runnum/trjám væri gaman að miðla slíkum !

Athugasemdir

[Baldur Helgi (IP-tala skráð) 14.3.2010 kl. 11:42]

Það er bara vonandi að ekki geri annað Hákonarhret á eftir þessari dæmalaust góðu tíð.

[Einar Sveinbjörnsson, 14.3.2010 kl. 13:55]

Hákonarhretið gerði mun seinna í almanakinu, eða 9. apríl og það var árið 1963.  Enn eru 4 vikur í þá dagsetningu !

ESv

[Ágúst H Bjarnason, 14.3.2010 kl. 15:34]

Mispillinn var farinn að bruma í Garðabænum strax í janúar. Ég tók myndina 31. jan. Í dag er þessi runni vel laufgaður.

 

[Sigurður Þór Guðjónsson, 14.3.2010 kl. 18:30]

Þrátt fyrir þessa blómgun finnst mér ofrausn að tala um einstök hlýindi í vetur eftir að janúar leið. Febrúar var í kaldara lagi þó fremur hlýtt hafi verið það sem af er mars. Það hefur hins vegar verið óvenju snjólétt á suðvesturlandi.

[Hjalti Már (IP-tala skráð) 14.3.2010 kl. 20:43]

Fyrir okkur sleðamenn þá má vorið koma á reykjavíkursvæðinu í janúar svo lengi sem snjór og kuldi sé inná hálendi og í fjöllum norðan, austan og vestan, en svo hefur alls ekki verið í vetur, Hvers er að vænta á næstunni, erum við ekki að horfa fram á tryllta snjókomu á næstu 2 vikum ??????????

kv. HMB

[Sigrún Björgvins (IP-tala skráð) 14.3.2010 kl. 21:27]

Nei það blómstra ekki runnar á Héraði og mér finnst það allt í lagi. Á meðan hitastigið er um núllið og sá snjór sem kemur  hverfur nokkurnveginn jafnóðum er ég nokkuð ánægð. Mig langar ekki að lifa aftur veðráttuna frá '63. Birtan hjálpar manni til að þreyja þessar vikur fram að vori. Þakka þér fyrir fróðlega þætti Einar. Sigr. Bj.

[Vigfús (IP-tala skráð) 14.3.2010 kl. 21:44]

Páskaliljurnar eru orðnar ca 10 - 15 cm háar nú þegar.

[siggi (IP-tala skráð) 14.3.2010 kl. 23:12]

var að taka olíu í mosó í gærkvöldi og tók eftir kónguló að vefja vef við ljósið yfir dælunni

[Þorkell Guðbrands (IP-tala skráð) 15.3.2010 kl. 07:47]

Merkilegt hversu mismunandi viðhorf fólks til atburða er eftir því við hvað það fæst og jafnvel búsetu. Vonda hretið sem hófst þ. 9.4. 1963 verður öllum minnisstætt að sjálfsögðu, sem það muna. Við erum hinsvegar ansi mörg af landsbyggðinni, sem er hretið minnisstæðara út frá þeirri staðreynd, að í þessu harða veðri fórust nokkrir bátar og með þeim alltof stór hópur sjómanna. Okkur fannst og finnst enn að það hafi verið meira tjón en aspirnar hans Hákonar skógræktarstjóra.  

[Sigurður Þór Guðjónsson, 15.3.2010 kl. 11:02]

Frá náttúrfarslegu sjónarmiði er þetta veður samt sem áður mjög sérstakt vegna eðlis þess sjálfs og þeirra afleiðinga sem það hafði fyrir gróður. Hvort tveggja er alveg einstakt og óháð allri slysasögu. 

[Áskell Örn Kárason (IP-tala skráð) 15.3.2010 kl. 20:13]

Þessum árstíma fylgir ávallt kvíðablandin von eftir vori og gróanda. En eins og í lífinu sjálfu getur það verið sársaukafullt að vonast til of mikils andspænis miskunnarlausum náttúruöflum. Það eru ekki ýkja mörg ár síðan eg sem sunnenskur skógræktarbóndi fékk 5-6 stiga hörkugadd í maíbyrjun ofan í blíðan apríl og allaufguð tré. Þá brá margri mjórri kló. Eg óska misplinum við Tómasarhagann alls hins besta, en kýs frekar að leggja lag mitt við yfirvegaðri urtir. Sjálfur myndi eg bíða fram í miðjan maí, ef ekki lengur.