Flateyjargátan hin nýja

Dularfull hitahámörk hafa ratað inn á skýrslur frá Flatey á Skjálfanda í dag og í gær.  Á síðu Veðurstofunnar má sjá að hæstu hiti dagsins hefur orðið 26,7°C úti í Flatey og Þingvellir þar á eftir ekki með nema 21,6°C.  Í gæra var svipað ástatt, ekki alveg svo hlýtt í Flatey en þá var reyndar Húsavík handan Skjálfanda á listanum og þá mátti með góðum vilja leggja trú við góðviðrinu í Flatey.

En þegar ferill hitans síðustu daga er skoðaður sést að einhver maðkur er í mysunni.  Hámarkið í hitanum varð snemma í morgun og í kjölfarið kólnaði hratt.  Einhver bilun er greinilega í mælinum eða það sem líka getur verið að hitagjafi af einhverju tagi hafi leikið um nemann.  Nú hef ég ekki hugmynd um staðsetningu eða umhverfi veðurstöðvarinnar úti í Flatey en það er vel þekkt að útblástur nálægrar vélar af einhverju tagi rugli mælingar tímabundið.  Rakainnihaldið fylgir hitanum sæmilega sem gæti verið vísbending um einmitt slíka truflun, þ.e. útblástur frá vél. Engir eru þó bílarnir í Flatey á Skjálfanda, mögulega þó dráttarvélar ?

 

 

Athugasemdir

[Áskell Örn Kárason (IP-tala skráð) 9.8.2010 kl. 08:06]

Flateyingar - sem halda tryggð við sína gömlu byggð og dvelja þar löngum á sumrum - róma mjög veðurblíðu eyjarinnar. Þótt þar komi víst stundum góðir dagar hljómar þetta í mín eyru eins og venjulegt íslenskt átthagagrobb. Mér datt satt að segja í hug að einhverjir gárungar meðal sumargesta hafi kynt undir mælinum um stund þessa tvo daga. Reyndar munu vera ein eða fleiri dráttarvélar í eynni, síðast þegar eg vissi. 

[Þorkell Guðbrands (IP-tala skráð) 9.8.2010 kl. 09:38]

Við hjónin vorum á ferð í Fljótunum í eftirmiðdaginn í gær, um og upp úr kl. 16:00 og þá veittum við því athygli þegar við ókum um Bakkana svokölluðu á heimleið, að hitamælirinn í bílnum sýndi um og yfir 20°C á nokkurri vegalengd. Vindur stóð af ANA og nokkuð afgerandi, gæti hafa verið 8 - 10 m/s á að giska. Hitamælar í bílum eru ekki áreiðanleg tæki, þótt nýir eða nýlegir séu, og auðvitað getur hita frá bílvélinni hafa lagt að skynjara mælisins í þessari vindstöðu. Þegar við komum inn fyrir Hofsós var mælirinn kominn niður í 15°C og hér við Borgarsand í 13°C. Veit svo sem ekki hvort þetta skýrir nokkurn skapaðan hlut, en ef einhver hitapollur hefur verið á ferðinni undan þessum austan kalda, sem kom nokkuð skyndilega og stóð ekki lengi, þá gæti hann svo sem hafa lagt þarna yfir.

[Sigurður Þór Guðjónsson, 9.8.2010 kl. 11:40]

Ekki get ég ímyndað að sé sérstök veðurblíða í Flatey sem öll er láglend og hvergi skjól. Ekki hefur hún komið fram í veðurmælingum hingað til. Hvernig er norðan og norðaustan áttin þar? Það held ég að sé nú meiri blíðan!Þegar ég sá þessar Flateyjartölur afskrifaði ég þær strax. Átthagagrobb um veður finnst mér ómerkilegasta tal sem hægt er að hugsa sér um veður. Það er fullkomlega markalust. En það er þó í lagi þegar menn eru að stríða og grínast.