Hitinn potast upp norðanlands um helgina

Á Akureyri er meðalhiti í júni síðustu 10 árin (2001-2010) 9,92°C.  Inni í þeirri tölu eru vitanlega allar mælingar, líka þær sem gerðar eru á nóttinni.  Á ár bregður svo við að sólarhringshitinn hefur aðeins í einn dag náð yfir 10 stiga mörkin, en það gerðist síðast 4. júní. 

Nú lítur út fyrir heldur betri tíð um helgina, en þá verður reyndar júlí gengin í garð.  Nær allar reiknaðar spár gera ráð fyrir að A og SA vindar nái að beina lofti hingað til okkar af suðlægum uppruna.  Alls ekki hægt að tala um hlýindi, en í það minnsta verður svala heimskautaloftinu bægt frá a.m.k. um sinn.  Frá föstudegi til sunnudags má þannig gera ráð fyrir því að meðalhitinn á Akureyri verði hærri en þessar 10°C sem hér eru gerðar að umtalsefni. 

Óvíst er síðan með framhaldið, en eins og staðan er í dag er reiknað með að loft úr norðaustri nái aftur yfirhöndinni í næstu viku. En við sjáum hvað setur og enn er langt í það. 

Athugasemdir

[Ásta (IP-tala skráð) 28.6.2011 kl. 08:58]

En hvernig er staðan fyrir austan, á Héraði. Hvað er orðið um hina rómuðu veðurblíðu?

[Vilhjálmur Stefánsson, 28.6.2011 kl. 11:55]

Einar..Nú er Goslokahátíð um næstu helgi hjá okkur í Vestmanneyjum.Hvenig er útlit um veður hjá okkur??

[Þórður Ingi Bjarnasson (IP-tala skráð) 29.6.2011 kl. 10:28]

Einar nú er ég að undirbúa ferðalag, má búast við kulda fyrir norðan í næstu viku, hvort er skárra upp á hitastig að fara á norður eða vesturland í næstu viku,  Hvaða landshluti verður skárstur upp á hita.

kv

Þórður