Lítil úrkoma í sumar

Horfum að eins á úrkomu í sumar um suðvestan- og vestanvert landið.  Kannski í ljósi síðasta árs (2010) sem reyndist vera meðal þeirra þurrustu frá upphafi mælinga.  Í Stykkishólmi var árið það 5. þurrasta frá upphafi (1856) og í Reykjavík var árið það næst þurrasta (frá 1920).

Mörgum hefur þótt heldur þurrt í sumar.  Í þrálátri N- og NA-áttinni í júní rigndi mjög lítið (15,1 mm).  Heldur meiri væta var í júlí eða í tæpu meðallagi.  Hins vegar hefur verið þurrt það sem af en ágúst.  14, 1 mm í Reykjavík og 17,6 mm í Stykkishólmi miðað við 23. ágúst.  Ekki er útlit fyrir vætu næstu daga, en óvissa með blálok mánaðarins hvað þetta varðar.

Þrátt fyrir þetta þurra sumar er samanlögð úrkoma ársins á ágætu róli. Þökk séð sérstaklega mikill úrkomu í mars og ekki síður í apríl.  Má segja að í heildina vanti aðeins lítið upp á að ná samanlögðu magni 2010 þó svo að allt haustið sé eftir. 

Breytileiki úrkomunnar hér á landi á vikna- eða mánaðarvísu er mjög mikill og þurrir eða blautir kaflar verða fyrir vikið ekki svo langir.  Þetta er eitt af því sem einkennir íslenska veðráttu.

Teiknaði upp eftirfarandi línurit sem sýnir staðalfrávik mánaðarúrkomunnar í Reykjavík 12 mánuði í senn. Með því móti hverfur þáttur árstíðarsveiflunnar.  Við sjáum að lengst af á kalda meðaltímabilinu 1960-1990 var breytileikinn nokkuð stöðugur með skemmri sveiflum.  Hann jókst á árunum þar á eftir og náði hámarki 1993-1994.  Þar telur verulega mikil umskipti frá mjög þurrum október 1993 yfir í afar úrkomusaman nóvember.  Annar toppur í þessu tilliti er árið 2008 en það ár tók að rigna mjög hressilega um haustið eftir afar þurrt sumar. Þessi mælikvarði á breytileika mánaðar úrkomunnar hefur síðan farið vaxandi síðustu mánuði.

Fróðlegt væri að taka þetta lengra, fyrir Stykkishólm aftur til 1856 og yfirfæra talnagrunninn þannig að í stað úrkomusummu hvers mánaðar verði vegin frávik hvers mánaðar frá ek. skilgreindu meðalgildi sama mánaðar. Eins hvort þessi mælikvarði tengist hitafráviki á einhvern hátt.

 

Athugasemdir

[Svavar Gestsson (IP-tala skráð) 24.8.2011 kl. 09:17]

Þetta er fróðlegt. Hér þar sem ég bý á sumrin við innanverðan Breiðafjörð er ferlega þurrt og allur gróður að skrælna. Skúrir síðustu daga hafa hjálpað til. Spurning: Er hægt að fá úrkomuyfirlit fyrir aðra staði en þá sem eru opinberir veðurathugunarstaðir? Eins væri fróðlegt að fá að vita um aðra þætti veðurs, vinda, vindáttir og hitastig.

Hvað segirðu um þetta?

Með kærum þökkum fyrir skemmtilega pistla um veður.

Svavar

Hólaseli

380 Reykhólahreppi

Sími 860 2888

[Einar Sveinbjörnsson, 24.8.2011 kl. 09:42]

Svavar !  Úrkomuyfirleitt er ekki auðvelt að útbúa annars staðar en þar sem úrkoman er mæld.  Næsti mælistaður við Reykhólasveitina er Ásgarður í Dölum og í vestri Brjánslækur.  Dálítil eyða er að mínu mati í hinni gömlu Austur-Barðastrandasýsli í annars ágætlega þéttu neti úrkomumælinga Veðurstofunnar.

ESv