Haustvísa

Á þessum árstíma hef ég stundum kosið að vekja upp stemmingu haustsins með vel völdum kvæðum með ríku myndmáli þeirra árstíðabrigða sem ganga yfir um þetta leyti. Sjá t.d. hér og hér.   Hannes Pétursson orti kornungur Haustvísu og birtist í fyrstu ljóðabók hans árið 1955 sem bar heitið Kvæðasafn. 

Myndin sýnir Blönduhlíðarfjöll í Skagafirði. Hver veit nema að Hannes Pétursson hafi haft heimahagana í huga þegar hann yrkir um fölnaða stör og nið frá ótilgreindri á ?

 

Haustvísa

Störin á flánni
er fölnuð og nú
fer enginn um veginn
annar en þú.
Í dimmunni greinirðu
daufan nið
og veizt þú ert kominn
að vaðinu á ánni ...

Hannes Pétursson

Athugasemdir

[Þorkell Guðbrandsson (IP-tala skráð) 27.9.2011 kl. 16:46]

Hannes er eiginlega meira en snjall ef það er hægt. Hann er gríðarlega vandvirkur og nostrar við ljóðin sín. Í bókinni Innlönd (1968) er m.a. þessi Veðurvísa:

Í nótt fer stormurinn geyst, hinn grályndi jötunn.
Gjallanda rómi stikar hann eftir hjörnum
og smalar loftin, safnar skýjunum saman
í svartleita hjörð sem treður á öllum stjörnum.

[Gunnar Th. Gunnarsson, 27.9.2011 kl. 17:30]

Þessi "haustvísa" er af Baggalút.is

Drulluskíta helvískt haust,
hata ekkert fremur.
Djöfuls ömurð endalaust,
allar vonir kremur.

[Þorkell Guðbrandsson (IP-tala skráð) 27.9.2011 kl. 18:42]

Þú ert greinilega smekkmaður á ljóðlist, Gunnar Th.

[Sigurður Þór Guðjónsson, 27.9.2011 kl. 19:23]

Baggalútur klikkar ekki!

[sigrún (IP-tala skráð) 28.9.2011 kl. 08:56]

Svona menn eiga ekki skilið að kunna skil á bragreglum. Út með baggalút. (Hvað er það annars)

sigrún

[Gunnar Th. Gunnarsson, 28.9.2011 kl. 09:30]

Sigrún, hvað er rangt við baggalútsvísuna, bragreglulega séð?