Sló í 56 m/s undir Hafnarfjalli fyrr í morgun

Þó ekkert sé neitt óvanalega hvasst á undan skilum lægðarinnar sem nú gengur yfir landið hefur heldur betur blásið hressilega undir Hafnarfjalli í morgun.  Á mæli Vegagerðarinnar var vindur nokkuð stöðugur um 30 m/s.  Þessi mikla veðurhæð varði í um 2 klst. og kannski ríflega það. Það sló í hviðu með þessu upp undir 56 m/s um kl. 08 eins og sjá má á vindritinu af síðu Vegerðarinnar.  Stöð Veðurstofunnar á Hafnarmelum hefur ekki sent upplýsingar í morgun og samamburður það ekki tiltækur.

Ekki er gott að segja svona við fyrstu sín hvað veldur að talsvert hvassara er undir Hafnarfjalli en þrýstisviðið gæfi ef til vill tilefni til.  Loftið virðist vera fremur stöðug, þ.e. lítið hitafall með hæð upp fyrir brúnir fjalla a.m.k.  Heldur er ekki ólíklegt að fjallabylgjur eigi líka hlut að máli, að ein slík hafi brotnað fram yfir sig og vindorkan að ofan streymi niður hlémegin Hafnarfjalls. 

Athugasemdir

[Guðmundur Þorsteinsson (IP-tala skráð) 8.10.2011 kl. 21:49]

Hef oft átt leið framan Hafnarfjalls.  Mér hefur virst að hættulítið sé að aka þar ef vindstyrkur fer ekki yfir 30m/sek.  Hafnarfjall og Skarðsheiðin er tiltölulega  mishár og mjög skörðóttur fjallaklasi og fer eftir vindstefnu hvar sterkustu hviðurnar lenda.  Sterkir vindsveipir eru þar mjög algengir og eðlilega ræður tilviljun hvort þeir eiga leið um veðurstöðina og fá þar skráningu eða lenda á vegfarendum og koma þeim í koll.