6 -11 daga spá, 9 til 14. nóvember.

Komið er að langtímaspánni elleftu vikuna í haust og haldið verður áfram til jóla.   Áfram er að sjá frekar milt veður og mun meira af suðlægum vindi framan af, en síðan tekur norðaustanátt yfir.         

Veðurspá fram á komandi miðvikudag má sjá hér á vef VÍ

Miðvikudagur 9. nóvember:

Sunnan- og síðar suðvestanátt í kjölfar skila sem spáð er norðaustur um landið.   Lægð á Grænlandshafi.  Úrkomusamt sunnan- og vestanlands.

Fimmtudagur 10. nóvember:

Lægðardrag af einhverju tagi fer yfir landið og vindur verður SA-stæður, sennilega nokkuð hvass.  Rigning, a.m.k. um tíma, einkum sunnanlands.

Föstudagur 11. nóvember: 

Áfram SA-lægur vindur, hægari aftur og fremur milt í veðri. Fleiri fremur veigalitlir úrkomubakkar berast úr suðri og yfir landið. 

Laugardagur 12. nóvember:

Kólnar heldur með NA-stæðum vindi.  Hiti þó enn um sinn um eða rétt ofan frostmarks á láglendi.  Úrkoma, einkum A- og NA-lands, en léttir til suðvestanlands.

Sunnudagur 13. nóvember:

Svipað veður, en ákveðnari NA-vindur ef eitthvað er, einkum um landið norðan- og austanvert. Hægt kólnandi.

Mánudagur 14. nóvember:

Enn NA-átt.  Hæð yfir Grænlandi og uppruni loftsins verður norðlægari og við það dregur úr éljum og snjókomu.  Jafnframt rofar enn frekar til um landið sunnanvert.  Vægt frost allvíða. 

Mat á óvissu:

Þróun mála í veðrinu samkvæmt þessum spám er nokkuð einlínuleg.  Til að byrja með hláka og suðlægur vindur.  Lægðir fyrir sunnan og suðavestan land mjakast til austurs og um leið snýst vindur til NA-áttar með kólnandi veðri. Tengist hægfara framrás háloftabylgju  til austurs yfir landið og við það stígur loftþrýstingur við Grænland.  Óvissan tengist helst því hvenær þessi umskipt verða á spátímanum og eins hve hratt þau ganga fyrir sig.  Einnig vefst spá um úrkomu nokkuð fyrir mér eftir að vindur er kominn út í NA.  Þar getur skipt alveg í tvö horn, allt eftir uppruna loftsins.   

Athugasemdir

[Kristinn Magnússon (IP-tala skráð) 4.11.2011 kl. 14:50]

Sæll

Ég er frekar mikil skíða og snjó áhugamaður og nú eru allir vestanhafs að tala um að veðurfyrirbærið La Nina, sem framkallaði kaldari vetur en venjulega í Kanada síðasta vetur og þar af leiðandi dömpaði snjó á þá, ætli að taka aðra umferð í vetur. Þá er spurningin hvað er í kortunum hjá okkur, eru einhver svona veðurfyrirbæri til hjá okkur? Man að þú sagðir einhverntímann snemma síðasta vetur að allr lægðirnar færu vestan við okkur sem stóðst með tilheyrandi leiðinda vetri. Hvað er að fara að gerast hjá okkur veit að þér leiðist ekkert á skíðunum ertu búinn að kanna þetta eitthvað???

Kv. Kristinn snjómaður sem óskar eftir ríkjandi norðanátt takk