"Kristín lofar 15 stiga hita um helgina"

Í dag á jafndægri  á vori  fer vel á því að  horfur eru á vorlegra veðri á næstunni.  Langtímaspár gera ráð fyrir því að angi að hinu milda lofti sem undanfarna daga hefur haldið sig djúpt suðaustur af landinu muni ná til landsins, en ekki fyrr en eftir fimmtudag.  Fram að því verður áfram hefðbundin marsveðrátta með a.m.k. snjókomu og skafrenningi til fjalla, líkt og ófærðarfréttir í morgun bera með sér.

En undir helgi eru sem sagt talsverðar líkur til þess að hitaskil fari norður yfir landið og í kjölfar þeirra verði milt í veðri.  Kristín Hermannsdóttir veðurfræðingur á Veðurstofunni var í stuttu viðtali í morgun á Rás 2 við Margréti Marteinsdóttur og Baldvin Þór Bergsson um tíðina um þessa væntanlegu veðurbreytingu (sem fyrri spár gerðu reyndar ráð fyrir að ætti að verða orðinn heldur fyrr).  Kristín fór vel yfir horfurnar og talaði um að um helgina gæti hiti farið í 10-15 stig fyrir norðan með þeim sunnan blæ sem þessu fylgir.  Gott og vel þetta er spáin og túlkun niðurstaðna þeirra reiknilíkana sem á þessari stundu liggja fyrir.

Morgunútvarp Rásar 2 var ekki fyrr búið að kveðja Kristínu en Margrét sagði hróðug að Kristín hefði lofað 15 siga hita fyrir norðan um helgina !  Spá er sem sagt orðin að loforði.  Ef veðrið gengur ekki eftir eða segjum að hitinn nái ekki 15 stigum heldur aðeins 13 verður þá hægt að elta Kristínu uppi og þýfga hana um "loforðið" sem hún gaf ?

Við lifum í þjóðfélagi væntinganna og það eru mikil eftirvænting eftir betri tíð og vorkomu eftir rysjóttan og heldur leiðinlegan vetur.  Fjölmiðlar spila á þessar tilfinningar og reyna að kreista spár langt fram í tímann um betra veður og helst að það komi sumar ekki seinna en hinn daginn.  Þegar loks hillir í betra veður er spáin tekin sem loforð líkt og hjá stjórnmálamanni sem boðar fleiri störf,  hærri laun, lægri skötum og guð má vita hvað, fái hann einhverju ráðið.  Slík "spá" byggir á athöfnum sem eru í mannlegu valdi oftast nær og má því túlka sem loforð þess sem talar.  Á þessu tvennu er vitanlega heilmikill munur.

En ég geri mér grein fyrir því að að Margrét Marteinsdóttir ætlar sér ekki að gera Kristínu neinn óleik með að tali um loforð um veðurspá.  Hún spilar bara inn á þjóðarsálina og vill vera með í leiknum og ýta aðeins undir hann í leiðinni.  

Kortin sem hér fylgja eru af Brunni Veðurstofunnar, spákort ECMWF.  Sú til vinstri er fyrir daginn í dag (20. mars) og til hægri fyrir komandi sunnudag (25. mars).  Munurinn er sláandi, en litatónarnir eru góð vísbending um loftmassahitann (hæð á 500 hPa). En þetta er spá....

Athugasemdir

[Þorkell Guðbrandsson (IP-tala skráð) 20.3.2012 kl. 09:54]

Já, það vill oft gleymast að spár eru spár og náttúran lýtur engum reiknilíkönum, jafnvel þótt þau séu amerísk! Að lesnum þessum ágætu varúðarorðum Einars Sveinbjörnssonar er ekki úr vegi að benda fólki á annað ágætt blogg um veður, þ.e. pistla Trausta Jónssonar, þess þrautreynda veðurfræðings. Pistlar hans eru reyndar ekki veðurspár, heldur yfirleitt niðurstöður á athugunum hans á veðurfari liðins tíma, en auðvitað er reynslan besti skólinn og með því að skoða hvernig veðráttan hefur hagað sér í fortíðinni er vafalaust hægt að bæta spárnar í nútímanum. En því nefni ég pistla Trausta, að hann getur einmitt í morgun um kuldapollinn suður af Hvarfi, sem sést í myndunum sem Einar birtir hér að ofan. Trausti spáir svo sem engu um áhrif hans en varar við of mikilli bjartsýni varðandi hlýnun næstu dagana, því margt geti orðið til þess að hún verði minni en spár gera ráð fyrir í dag.

[Baldvin Bergsson (IP-tala skráð) 20.3.2012 kl. 10:30]

Nei, hún sagði að Kristín hefði lofað alveg ágætisveðri um helgina, hitinn gæti farið upp í fimmtán gráður. Nú má svo sem deila um hvort Kristín hafi lofað ágætisveðri en það er óþarfi að ýkja svona orð Margrétar. Þakka þér annars fyrir að hlusta.

[Einar Sveinbjörnsson, 20.3.2012 kl. 10:51]

Sæll Baldvin !

Fjölmiðlafólk er orðið óþarflega hörundsárt og tekur illa gagnrýni.  Hlustaðu sjálfur á upptöku þáttarins frá því að Kristín stóð upp og fram að afkyningu fyrir fréttirnar kl. 08. Tilvitnum mín er bein í Margréti. Vera má að hún hafi sagt á sunnudag frekar en um helgina, en breytir ekki inntakinu.

Þakka annars ágætan þátt sem ég hlusta ævinlega á fyrir kl. 08. KK heillar mig síðan með sinni músíkk eftir fréttirnar. 

ESv

[Baldvin Bergsson (IP-tala skráð) 20.3.2012 kl. 12:04]

Við erum nú ekkert sérstaklega hörundsár en betra er að gagnrýnin sé rétt. Þú verður að hlusta betur því þú vitnar einmitt ekki rétt í Margréti.

[Sigurður Þór Guðjónsson, 20.3.2012 kl. 15:44]

Alveg kominn tími til að hitametin frá 1948 verði slegin og mars reki af sér slyðruorðið.

[Sigurbjörn Sveinsson, 20.3.2012 kl. 21:10]

Í mínum augum er SÞG orðinn sérlegur veðurkúskur.

[sigrún Björgvins (IP-tala skráð) 20.3.2012 kl. 22:53]

Eigum við ekki bara að bíða og sjá hvernig veðrið verður um helgina. Annars er það ekki kappsmál að það fari að hlýna fyrir alvöru strav nú um jafndægur. Það er ekkert unnið við það að fá hita svona snemma.

Þá er bara meiri hætta á vorhreti sem getur stórskemmt snemmsprottinn gróður. Það þekkjum við hér fyrir austan vel frá síðari árum.