Hlýtt á Akureyri það sem af er ágúst

Fyrstu 10  daga mánaðarins er meðalhitinn á Akureyri 14,0°C.  Það er vissulega hátt, en 10 daga kaflar geta einir og sér orðið talsvert afbrigðilegir.  En það er bara ekkert sem bendir til þess að neitt lát sé á milda loftinu yfir landinu og suðlægu vindáttunum sem svo hagfelldar eru norðanlands.  Svo ekki sé talað um ef líka rignir dálítið sunnan heiða og hnúkaþeyrinn hjálpar til að pota hitanum enn ofar. verki.

Hlýindunum er spáð fram á miðvikudag eða fimmtudag hið skemmsta og  bandaríska langtímapáin gerir ráð fyrir að þau verði enn langvinnari.

Segjum sem svo að hlýtt verði í viku til viðbótar.  Þá má fara að gægjast í kistu mánaðarhitametanna fyrir Akureyri.  Ágúst 2003 var nokkuð jafn hlýr á Akureyri.  Þá reyndist meðalhitinn 12,8°C, sem er með hæstu gildum fyrir ágústhita hér á landi. 1948 var þó enn hlýrra eða 13,2°C samkvæmt tölum Veðurstofunnar.

En höfum hugfast að oft hafa efnilegir ágústmánuðir koðnað niður síðustu daga undir mánaðarmót þegar stundum vill kólna, einkum á næturna.   Í raun þarf sunnanvindur að verða viðvarandi meira og minna út allan mánuðinn ef fella á gömul og seig meðalhitamet. 

 

Athugasemdir

[Sigurður Þór Guðjónsson, 11.8.2012 kl. 15:08]

Þú átt þarna náttúrlega við ágúst 1947 með 13.2 stig. 

[K. B. Hermannsson (IP-tala skráð) 12.8.2012 kl. 00:35]

Hvaðan kemur öll þessi fjandans rigning sem hefur verið hér á s/v-horni landsins undanfarna 7-daga? 

Fer þessum fjanda ekki að linna svona áður en að sumrinu lýkur?

Eða er ágúst fyrsti haustmánuðurinn í ár?

Þó það verði einhver sólarglæta síðustu dagana í ágúst, þá verða það varlan nein hlýindi eða hitabylgjur sem við fáum.  Fer varla yfir 15 stig yfir daginn

Sumarið er semsagt búið, a.m.k. hér S/V-lands.  Það hlýnar varla mikið úr þessu þegar komið er fram yfir miðjan ágúst.

[Rafn Haraldur Sigurðsson (IP-tala skráð) 12.8.2012 kl. 13:30]

mér finnst rigningin góð!

Eftir alla lognmolluna sem legið hefur yfir okkur  hér í allt sumar,  sunnanlands er adeilis hressandi að fá rokið og rigninguna.

[Sigurður Þór Guðjónsson, 13.8.2012 kl. 10:41]

Varla ástæða til að kvarta þó eitthvað rigni örfáa daga á skraufþurra jörð eftir óvenjulega þurrt og sólríkt sumar og því síður þegar rigningunni fylgja miklir hitar norðan og austan lands.