Sýnd veiði en ekki gefin

Ég vaknaði í morgun við fréttir útvarpsins þar sem fréttamaðurinn las með nokkrum eftirvæntingatón nokkurn vegin svohljóðandi:

"Norðvestursiglingaleiðin svonefnda, stysta siglingaleið milli Evrópu og Asíu, er opin, samkvæmt gervihnattarmyndum Evrópsku geimferðastofnunarinnar. Hingað til hefur leiðin verið þakin ís allt árið um kring." 

Jæja hugsaði ég með mér um leið og lét renna í ketilinn. Þar koma að því að svo stórar vakir kæmu í ísbreiðuna í lögsögu Kanada að þræða mætti leið yfir í Beringssund og Kyrrahafið svona í lok sumars fyrir eitt eða tvö skip. Með morgungeispanunum sá ég þar sem ég var staddur í  Borgarfirðinum að snjóað hafði í Skarðsheiðina um leið og ég tautaði fyrir munni mér að heldur haustaði snemma þetta árið.

Málið er nefnilega það að mikið ranghermi er að segja að siglingarleiðin sé orðin íslaus og stórkostleg tækifæri blasi þar með við í styttri siglingarleiðum.  Víst er rétt að ísinn í lok sumars er minni en áður, en það fær ekki breytt þeirri staðreynd að um leið og vetrar leggur þetta lítt salta hafsvæði aftur hratt og örugglega.  Engu skiptir þó ísinn við Norðurskautið bráðni að mestu í ágúst og september eins og spáð er að verði innan fárra áratuga.  Veturinn mun eftir sem áður ekkert láta bíða eftir sér.  Myndin hér  að neðan sýnir einmitt hafísútbreiðslu á öllu norðurhvelinu síðasta árið í milljónum ferkílómetra (sjá þennan tengil)  Vissulega er minni ís í ár við lok leysingartímans í ár en í fyrra, en sé rýnt í ísferilinn sést að í októbermánuði einum leggur hafsvæði sem er u.þ.b. á stærð við 10 sinnum flatarmál Íslands !

Allt þetta tal um opnun siglingarleiðar yfir Norður-Íshafið er tálsýn, utan nokkurra vikna í lok sumars frá ágúst til september. 

Hingað til hefur Kanadamönnum þótt það vera verlulega til trafala í samgöngum að sjóleiðin um Hudsonflóa er ekki íslaus nema í júlí fram í nóvember og jafnvel þó svo að sá tími lengist um eina til tvær vikur á ári vegna hlýnandi veðurfars boðar það ekki neina sérstaka byltingu í samgöngum og skipaferðum þar um slóðir.

En allt snýst þetta um útþenslupólitík, eða um yfirráð yfir hafsvæði og ekki síður hafsbotninum. Kapphlaup þjóðanna sem um ræðir er bara sett í einhvern kaupskipabúning.