IKE-lægðin í mótun - illviðri er spáð

Stöðu mála má sjá á korti Bresku Veðurstofunnar frá kl. 06 í morgun.  Lægðarmiðjan ílöng suðvestur af Hvarfi.  Norðan og vestan hennar þrýstir kalt loft sér suður á bóginn, en sunnan lægðarmiðjunnar er heilmikið belti með hlýju og röku lofti.  Fyrir sunnan og suðvestan töluna 989 (hPa) er að finna restarnar af fellibylnum IKE.  Spor eftir fellibylinn sjást m.a. af háum hitatölum í háloftunum.  Þarna mælast um +15 til +17°C í 850 hPa þrýstifletinum í um 1400 m. h. Slíkt loft er klárlega af hitabeltisuppruna. 

Allt er þetta á leiðinni til okkar og næstu 12 til 18 klst mun lægðin dýpka hratt.  Bæði eru skilyrði til myndunnar venjulegrar haustlægðar afar ákjósanleg og fellbyljaleifarnar virka síðan sem eins konar hvati fyrir dýpkunarferli, hraðar því og gerir það líka að verkum að lægðin verður krappari.  

Ferill þessarar skæðu lægðar er síðan ekkert sérlega heppilegur fyrir okkur.  Spákort sem gildir á miðnætti sýnir líklega stöðu mála þá. Ferill lægðarinnar er síðan ekkert sérlega hagfelldur okkur.  Miðjan fyrir vestan land um 970 hPa.  Hvöss S eða SA átt á undan skilunum og verður verðið í hámari um eða eftir miðnætti samkvæmt þessu.

Veðurstofan spáir allt að 25 m/s á öllum sínum spásvæðum nema Suðaustanlands.  Reynsla mín segir að gera megi ráð fyrir staðbundinni vindmögnun við þessi skilyrði á t.d. á norðanverðu Snæfellsnesi, við Djúp, t.a.m. í Hnífsdal, eins víða í Húnavatnssýslum og Skagafirði.

Þessi vindátt er líka mjög opin á Höfuðborgarsvæðinu.  Þannig spáir Veðurstofan 22 m/s á Reykjavíkurflugvelli í nótt og allt að 30 m/s í vindhviðum. 

Ég er eiginlega steinhissa á því hvað slæmt veðurútlitið hefur vakið litla eftirtekt að minnsta kosti enn sem komið er. Ekki síst ef haft er í huga að fellibylur sá sem hér kemur við sögu glumdi látlaust í öllum fréttatímum um síðustu helgi, þegar hann var að herja á Bandaríkjamenn suður í Texasríki.  

Hér er tengill á textaspár veðurfræðinga Veðurstofunnar, en sjálfvirku táknmyndaspákortin eru ónothæf þegar spár er mikilli veðurhæð. 

Athugasemdir

[Karl Benediktsson (IP-tala skráð) 16.9.2008 kl. 13:30]

Þökk fyrir skemmtilegan og gagnlegan fróðleik !    

[Emil Hannes Valgeirsson, 16.9.2008 kl. 15:52]

Talandi um ónothæfa táknmyndaspá, þá er ekki spáð nema 9-11 m/s í Reykjavík skv. sjálfvirkri spá veðurstofunnar sem er heldur annað en þeir 18-23 m/s sem textaspáin segir. Mér finnst samt yfirleitt verða heldur lítið úr hvassviðrum í Reykjavík sem spáð er, en það á kannski helst við um suðaustanáttina.

[Konni (IP-tala skráð) 16.9.2008 kl. 21:49]

Sömuleiðis takk fyrir fróðleikinn. Þú hefur verið favoritaður.

Kv

Hákon