Í kjölfar Ike-lægðarinnar MODIS (1)

Illviðrið sem hér gekk yfir á þriðjudagskvöld (17. sept) og fram eftir miðvikudegi tók á sig ýmsar myndir og eitt og annað til frásagnar.  

Sem betur fór hlutust engin slys af og eignartjón var ekki mikið. Leifar fellibylsins Ike báru með sér rakt loft af hitabeltisuppruna. Þó svo að mikið hafi rignt almennt séð á landinu fór svo eins og gjarnan verður í sunnanátt að Vatnajökull veitir var fyrir úrkomunni á öræfunum norðan hans.  Þar sem Jökulsá á Fjöllum kemur undar Dyngjujökli flæmist hún um víðáttumikla aura áður en kvíslarnar koma saman í einum farvegi suður af Upptyppingum.  Jökulleirinn í aurum á milli kvíslanna er fínn og afar fokgjarn og þekkja menn vel til  sandfoks á þessum slóðum í strekkings sunnan- og suðvestanátt.

Veðurhæð var óskaplega mikil á þessum slóðum að morgni 17. september. Nálægar mælingar í Sandbúðum á Sprengisandi gáfu til kynna 30-40 m/s vindhraða til jafnaðar.  Þar rigndi hins vegar og jörð því blaut. Á myndinni sem hér fylgir (MODIS-Terra, kl.13:30. Upplausn 250 m)  má hins vegar sjá   hvernig vindurinn  rífur upp aur og sand norðan Dyngjufjalla á nokkuð breiðum kafla og hvernig strókurinn berst vel afmarkaður til norð-norð-austurs. Nærri vesturjaðri hans eru  Grímsstaðir á Fjöllum.  Í veðurathugun þar  á hádegi var sandmökkurinn svo dimmur að skyggnið var  ekki álitið vera nema rúmlega 1.000 m. Á meðan á þessu gekk var sérlega hlýtt í lofti og fór hitinn í 20°C á Raufarhöfn en eins og sjá má fóru menn þar heldur ekki varhluta af sandbylnum.

Austar á myndinni sést Hálslón vel sem er fullt um þessar mundir  og vatnsborð því í hæstu stöðu.  Einnig þar var sunnanstormur um morguninn skv. mælingum á veðurstöðinni við Kárahnjúka.

Athugasemdir

[Arna Ólafsdóttir (IP-tala skráð) 20.9.2008 kl. 23:47]

Sæll Einar og takk fyrir skemmtilega síðu!

Hvenær var viðtalið við þig á RÚV um haustlægðirnar?  Ég missti af því og langar svo að heyra það.  Var það ekki örugglega á Rás 2?

Kv. Arna

[Einar Sveinbjörnsson, 21.9.2008 kl. 10:30]

Sæl Arna !

Hér er tengill á þátt Magnúsar R. Einarsson á Rás 1 sl. föstudag.

http://dagskra.ruv.is/streaming/ras1/?file=4416651

ESv 

[Vignir (IP-tala skráð) 21.9.2008 kl. 23:35]

Sæll Einar,

Finnst þér ekki vanta sjálfvirka stöð á svæðið milli Sandbúða og Upptyppinga? Dálítið stór eyða í netinu á þessum slóðum.

[Arna Ólafsdóttir (IP-tala skráð) 22.9.2008 kl. 01:16]

Sæll,

takk fyrir þetta!  Var búin að gera mikla leit að þessu :)

Kv. Arna