Janúar 2009 séður með augum Jóns í Litlu Ávík

Í yfirliti Veðurstofunnar fyrir nýliðinn janúar segir m.a. 

Mánuðurinn var hlýr og úrkomusamur. Tíð var talin góð. Fyrri hluti mánaðarins var sérlega hlýr, en síðari hlutinn svalari.

Þó tölfræðin hafi verið meðalhitanum í vil hafði maður það samt á tilfinningunni að eftir vetrarþíðuna yfir hátíðarnar hafi í janúar samt lengst af verið vetrartíð og stundum meira að segja óblíð á köflum. Úrkoma var þannig í meira lagi víðast hvar. Hitameðaltölurnar líða fyrir það að ekki gerði kalda N-átt sem heitið gat í mánuðinum og heldur ekki stillur rétt eins og þessa dagana.

En Jón G. Guðjónsson veðurathugunarmaður í Litlu-Ávík í Árneshreppi á Ströndum gefur eigið veðuryfirlit á síðunni sinni og takið eftir hvað hann segir um N-áttina !

Yfirlit yfir veðrið frá Veðurstöðinni í Litlu-Ávík.

Mánuðurinn og árið byrjaði með hægviðri fyrstu 9 dagana yfirleitt með hita yfir frostmarki.

Eftir það frysti og gerði nokkrum sinnum Norðaustan eða Norðan hvassviðri með snjókomu og umhleypingasamt.

Mjög athugavert er að sjá hvað N og NA er hlý í þessum mánuði,og var janúar í ár mun hlýrri en janúar árið 2008.(sjá meðalhita við jörð.)

Snjólétt var í mánuðinum þótt dálítill snjór væri um miðjan mánuð.

Oft var talsverð hálka í mánuðinum.

Úrkomusamt var í mánuðinum.

Meira og frá degi til dags á síðu Jóns 

 

 

Athugasemdir

[Sigurður Þór Guðjónsson, 6.2.2009 kl. 13:07]

Það er vetrarríki. Og nú er kuldakast sem ekki sér fyrir endann á, a.m.k. fram í miðjan mánuð. Þá gæti ekki hafa hlánað í Reykjavík í hálfan mánuð.  Fyrri og síðari hluti janúar voru eins og tveir heimar.

[Sigurður G. Tómasson, 8.2.2009 kl. 11:28]

Ég hef víst talað um þetta nokkrum sinnum í þætti mínum á Útvarpi Sögu, hve norðan- og norðaustanáttin var hlý þennan janúar. Ég man varla eftir því fyrr (en að vísu er veðurminni ekki áreiðanlegt) að það hafi verið rigning eða slydda í norðaustan stormi á Norðurlandi en svo var nú. Stillurnar, hreinvðrið og kuldinn sem þessu fylgir eru sjálfsagt ekkert einsdæmi í febrúar en mikil eru umskiptin í veðrinu í vetur frá djöfulganginum sem var frá því í ágúst 2007 og fram yfir áramót. En stillur og kuldar eru ekki af hinu illa. Nú frýs Þingvallavatn og það er gamalla manna mál í sveitinni að þá sé vatnið hlýrra að vori og komi betur undan vetri.