Nýr vefur Veðurstofunnar

Vefur Veðurstofunnar,  hefur tekið nokkrum breytingum nú eftir að sameining varð við Vatnamælingar Orkustofnunar.  vedur.is er einn sá mest sótti hér á landi og margt er þangað að sækja. Vefurinn hefur m.a. verið verðlaunaður fyrir gott aðgengi.   Miklu skiptir vitanlega að auðvelt sé að komast í efni beint af forsíðu og sú er reyndin með örfáum undantekningum.

Um nýja forsíðu segir á frétt frá Veðurstofunni: "Efri hluta forsíðunnar verður skipt upp í fjóra hluta: veðurspá, veðurathuganir, jarðskjálfta og vatnafar. Hver hluti tekur yfir allan efri helminginn þegar hann er valinn. Segja má, að um sé að ræða fjórar forsíður."

Um leið og ég óska Veðurstofunni til hamingju með nýjustu breytingarnar á vefnum sem eru  gerðar undir handarjaðri Helga Borg langar mig að segja mitt álit á breytingum vefjarins sem eru eftirfarandi:

• Spárnar á forsíðunni eru HRAS spár frá Belgingi af ólíkri upplausn eftir spátíma (sjá skýringar hér).  Vel hefur tekist til með tóna og liti, sérstaklega í vindakortinu og einnig í úrkomu.  Kortin eru fyrir vikið einkar skýr og aðgengileg.

• Þar sem tímaskrefið í þessum spám er til að byrja með ein klst. eru kortin það mörg að dálitla stund tekur fyrir óþolinmóða að bíða eftir að kortin hlaðist öll niður.

• Á forsíðunni er minna gert úr staðspánum en áður.  Í raun telst það jákvæð breyting miðað við hvað staðspárnar eru miklir gallagripir og oft vondar eða misvísandi.  Hef ekki tölu á öllum þeim sem komið hafa að máli við mig og fundið að áreiðanleika þeirra.  Veðurstofan þarf að taka sér tak og lagfæra grunn þeirra, einkum þann sem snýr að úrkomunni. 

• Stutt textaspá fyrir landið kemur á forsíðu til hægri við kortin þrjú.  Vel mætti virkja hnapp í grunni stuttu spárinnar sem opnaði á landspána í heild sinni.

• Engar breytingar eru gerðar á jarðaskjálftahlutanum, en maður saknar þess dálítið að jarðaskjálftakortið birtist ekki á forsíðu.  Mín vegna mætti hitaspárkortið víkja fyrir jarðskjálftakortinu ef þetta snýst um pláss, en hitakortið hefur almennt séð minna hagnýtt gildi en vindurinn og úrkoman.

• Rými fyrir sérstakar viðvaranir og athugasemd frá veðurfræðingi er ekki lengur að finna á forsíðu.  Þó svo  að þetta form til miðlunar mikilvægara upplýsinga hafi ekki alltaf verið verið nýtt skynsamlega eða nægjanlega markvisst, er það engu að síður æskilegt til að koma á framfæri með áberandi hætti brýnum upplýsingum, s.s. óvæntar breytingar á veðurspá eða þróun á gjóskumekki við eldgos svo dæmi séu tekin.

• Vel er leyst á forsíðu framsetningu frétta, þar sem sú nýjasta er dregin út.  Veðurstofan með allan sinn mannskap sína  fagþekkingu ætti hæglega að geta uppfært fréttahlutann oftar en  raun ber vitni.

• Ný síða um vatnafar hefur litið dagsins ljós.  Mjög athyglisverð nýjung er í korti sem sýnir hlutfallstölu rennslis í tæplega 20 vatnsföllum um land allt.  Með því að færa bendilinn á viðkomandi rennslismæli birtast síðan ítarupplýsingar um síðustu mælingu. Þessi framsetning á að geta orðið að miklu liði við það að koma upplýsingum á framfæri um vatnavexti, ekki síst í jökulám að sumarlagi.  Framsetning vatnafarsupplýsinga í rauntíma eru til mikilla bóta frá síðu Vatnamælinga Orkustofnunar þar sem upplýsingarnar voru illa aðgengilegar og allt að því í felum. 

• Á vatnafarssíðunni er einnig sýnt meðalrennsli (og vatnshiti) síðasta sólarhrings í fimm nokkuð ólíkum vatnsföllum, m.a. í Ölfusá við Selfoss.  Gefur ágæta mynd en stöðvarnar mættu að ósekju vera fleiri.  Sakna t.d. venjulegrar norðlenskrar dragár með lítið vatnasvið og vaxa mjög í rigningartíð, s.s. eins og Bægisá í Hörgárdal. 

• Í veðurathugunarhlutanum ber helst til tíðinda að fá yfirlit dagsins hvað varðar hámarks- og lágmarkshita dagsins og mestu úrkomu. Enn er aðeins um sjálfvirkar stöðvar að ræða og þær mönnuðu koma síðar.  Takmarkað gagn er hins vegar af listanum fyrr en hann nær til allra stöðva.  Í skýringum má lesa að klippt er á miðnætti, en ekki sólarhringaskilin eru ekki kl. 09 eins og þegar um mannaðar stöðvar er að ræða.  Aðalatriðið er þó að um samræmt vinnulag sé að ræða og notandanum sé það ljóst.  Smá ábending sem auðvelt er að kippa í liðinn; en rétt er að raða stöðvum með lægsta hita frá þeim lægsta til  þess hærri, en ekki öfugt eins og nú er.

• Afar hagnýtt að fá yfirlit síðasta athugunartíma (frá sjálfvirkum stöðvum), þ.e. mesta mælda vind og hæsta hita.  Sparar veðuráhugafólki ferðalag um vefinn og lúsarleit að hæstu gildum á milli stöðva.

• Að síðustu smá athugasemd vegna flipans hjálp sem kemur á öllum fjórum , veðurspár, veðurathuganir, jarðaskjálftar og vatnafar. Hann vísar á frekari skýringar og útlistanir á því sem fyrir augu ber.  Eins konar leiðarvísir, sem væri ef til vill betra heiti, en hjálp.  En þetta er smáatriði og skiptir litlu í heildarmyndinni.

Næst í þróunarbraut  vefs Veðurstofunnar er framsetning á veður- og vatnafarsgögnum. Veit að ég er ekki að biðja um lítið, en þessi gögn eru til og ágætlega aðgengileg innanhúss mörg hver.  Næsta skrefið er að gera þau opinber með öllu. 

 

 

Athugasemdir

[Sigurður Þór Guðjónsson, 25.3.2009 kl. 10:34]

Já, þessi gögn eiga að vera opinber með öllu  og ekkert með það bara. 

[Þorkell Guðbrands (IP-tala skráð) 25.3.2009 kl. 11:06]

Sammála Sigurði Þór - en þakka þér Einar fyrir að draga þetta svona vel saman, það er nefnilega auðvelt að gera lítið úr athugasemdum og ábendingum okkar, sem ekki erum lærð í fræðunum.

[Ari (IP-tala skráð) 25.3.2009 kl. 14:00]

veðurþáttaspárnar á forsíðunni eru mjög vel heppnaðar, sammála því, hefði samt ekkert persónulega á móti því að skýjahuluspáin(oft mikið að pæla í því hvort það verði nú ekki sól) næði að fylgja með (þó að spáin f. hana nær styttra, þá myndi hún bara hverfa en ekki hinar ef farið væri lengra í spánni)

Væri alveg til að hafa langtímaspána við hliðina á "Horfur næsta sólarhringinn". En svo sem er ekki nema eitt klikk í hana, ef maður klikkar á t.d. Reykjavík f. neðan.  Kannski eru veðurfræðingar ekki mikið f. að flagga langtímaspám sem eru eðli málsins skv. óáreiðanlegri.

[Emil Hannes Valgeirsson, 25.3.2009 kl. 14:43]

Eins og ég hef sagt annarstaðar þá sakna ég mikið í veðurkortum nútímans að sýnd séu gömlu góðu skilin, þ.e. kuldaskil, hitaskil og samskil en þau ásamt þrýstilínum segja mikið um hvaða loftmassar eru á ferðinni hverju sinni, og bara yfirleitt hvað er að gerast í veðrinu. Þetta er þó auðvitað háð því að fólk kunni að lesa úr svoleiðis enda þarf til þess lágmarksþekkingu á veðri. Kortin á vef veðurstofunnar sýna engin svona skil, bara litatilbrigði sem segja vissulega sína sögu en það vantar alveg forsendurnar þegar ekki eru sýnd skilin.
Þess vegna held ég mikið uppá veðurkort eins og þau sem birtast t.d. á Metoffice:
http://www.metoffice.gov.uk/weather/europe/surface_pressure.html

[Þórarinn Örn Andrésson (IP-tala skráð) 26.3.2009 kl. 13:05]

Sæll Einar.

Ég sé að þú ert að skrifa hér meðal annars um framsetningu á mæligögnum: “Næst í þróunarbraut  vefs Veðurstofunnar er framsetning á veður- og vatnafarsgögnum. Veit að ég er ekki að biðja um lítið, en þessi gögn eru til og ágætlega aðgengileg innanhúss mörg hver.  Næsta skrefið er að gera þau opinber með öllu. “

Mig langaði bara að benda þér á að öll mæligögn vatnamælinga eru aðgengileg á vef vatnamælinga http://vmkerfi.os.is/vatn/, þarna er opinn aðgangur þar sem hver sem er getur skráð sig inn og skoðað mæligögn einhver ár aftur í tíman.

Gögnin eru birt með Vista Data Vision gagnalausn sem þróuð hefur verið af Verkfræðistofunni Vista.

Vista Data Vision er notað af mörgum aðilum, t.d. Orkustofnun, Landspítalanum, háskólanum í Fairbanks Alaska (http://www.lter.uaf.edu/bnz_vdv2.cfm) og í háskólanum í South Carolina Baufort (http://zulu.geog.ucsb.edu/vdv).

Kveðja,

Þórarinn Örn Andrésson, starfsmaður Verkfræðistofunar Vista.

[Helgi Borg (IP-tala skráð) 27.3.2009 kl. 15:06]

Sæll Einar

Takk fyrir þessa umfjöllun um breytingarnar á vedur.is. Eftirfarandi eru nokkur atriði sem mættu kannski koma fram:

• Veðurþáttakortin á undirsíðunum eru nú stærri en þau voru. Fyrir vikið eru kortin þægilegri aflestrar en aftur á móti tekur lengri tíma að ná í þau. Réttast er líklega að gefa fólki kost á að skoða báðar stærðirnar. Fyrstu 54 spátímana er tímaskrefið á milli korta 1 klst, eftir það er tímaskrefið 3 klst. Kannski mætti hafa tímaskrefið 3 klst alla spátímana, en gefa fólki kost á að sækja restina af kortum sérstaklega ef á þarf að halda. Ég hvet sem flesta að senda okkur skoðun sína á þessu og fleiri atriðum.
• Fyrstu 2 sólarhringana eru staðarspár birtar með 3 klst tímaskrefum. Við þetta mun úrkomuspáin lagast nokkuð.
• Það má líta á uppskiptingu forsíðunnar sem 4 aðskildar forsíður. Sú síðasta sem notandinn var með opna opnast sjálfkrafa næst þegar viðkomandi fer á forsíðuna. Þannig opnast jarðskjálftar næst á forsíðunni ef viðkomandi var þar síðast.
• Athugasemdir veðurfræðings birtast á veðurspásíðunni þegar veðurfræðingur skrifar athugasemd, annars ekki.  Sömuleiðis birtast núna athugasemdir sérfræðings á jarðskjálfta- og vatnafarsforsíðunum.
• Hugsunin á bak við framsetningunni á mesta/minnsta hita á athugunarforsíðunni er að þetta sé eins og listi af öllum stöðvum nema búið sé að taka nokkrar stöðvar út úr miðjum listanum. Við flestar stærri breytingar reyni ég að finna tíma til að halda notendaprófanir. Þá fæ ég nokkra notendur til að setjast með mér og finna fyrir mig ýmis gögn af vefnum. Við notendaprófanir á þessum listum virtust allir notendur skilja og nota þennan lista rétt.
• Við kölluðum vísanir í leiðbeiningar fyrst í stað "Leiðbeiningar". Við notendaprófanir kom í ljós að notendur yfirsást þessar vísanir gjarnan. Við það að breyta heitinu í "Hjálp" áttu notendur auðveldara með að finna þessar vísanir.

Eins áður sagði hvet ég sem flesta að senda okkur ábendingar ásamt óskum um viðbætur og nýja virkni. Ábendingaformið fyrir vefinn er á: http://www.vedur.is/um-vi/vefurinn/abendingar/

Bestu kveðjur
Helgi Borg