Næturfrost suðvestanlands líklegt

Nú smýgur til okkar úr norðri og norðvestri svalt og fremur þurrt loft.  Snemma í morgun fór hitinn sums staðar niður fyrir frostmark á láglendi fyrir norðan.

Enn er loft heldur að kólna, sérstaklega um landið vestanvert. Í nótt  má gera ráð fyrir því að það verði hægur vindur og nánast heiðríkja sunnanlands og vestan, en heldur meira skýjað fyrir norðan og austan.  Þar tempra skýin útgeislun yfirborðsins um lágnættið á meðan sólar nýtur ekki.

Það eru raunverulegar líkur á næturfrosti við þessar aðstæður frá Vestfjörðum suður úr og austur á Rangárvelli eða þar um slóðir.  Hættan er meiri inn til landsins en við sjávarsíðuna.  Ég tel vera 30-50% líkur á frosti í tveggja metra hæð í Reykjavík, en líkurnar vera 70-90% niðri við jörð (5 sm)  og þá á tímanum frá kl. 02 til 05.

Þeir sem nýverið hafa sett út sumarblóm eða gróðursett fyrir matjurtum geta gripið til varna til að forðast skemmdir.  Besta og fljótlegasta leiðin er að vökva og rennbleyta plönturnar fyrir nóttina.  Vatnið og útgufun seinkar kælingu plöntunnar.  Einnig má setja yfir plast eftir vökvun þar sem því verður við komið.  Mín reynsla er sú að nóg sé að tylla því niður á meðan ekki er hætta á að það fjúki.  Plastið virkar sem afbragðs hlíf og loftið næst plöntunni verður fyrir minni kælingu en ella væri. 

Óþarfi er hinsvegar að hafa áhyggjur af trjágróðri, nema þeim nýplöntuðu og sérstaklega þeim lægri sem borgar sig að bleyta í.  Nýlaufguð tré standa flest vel af sér kulda í skamma stund á meðan ekki fylgir með þurr vindur.    

Athugasemdir

[Áskell Örn Kárason (IP-tala skráð) 26.5.2009 kl. 16:42]

Hér á Akureyri fann maður fyrir óvenjulegu veðurlagi e.h. í dag, þ.e. einskonar útsynningi úr norðvestri(!). Grár kólgubakki út við sjóndeildarhring og gekk á með björtum sólarglennum og hráblautum hryðum inn á milli, svipað og gerist gjarnan í útsynningi syðra. Eg hef aldrei kunnað við mig í slíku veðri og verið blessunarlega laus við það eftir að eg kom aftur norður. En það er víst engu lengur að treysta, (Sic transit gloria mundi, osfrv.!).

[Jóhann Kröyer (IP-tala skráð) 27.5.2009 kl. 19:59]

Hér neðanlega í Garðabænum kom næturfrostið ekki. Hitamælir við jörðu sýndi minnstan hita kl: 3.04 en þá var +2,2 C°, þannig að 10% líkurnar að ekki yrði næturfrost við jörðu unnu :=)