Hvimleiður kuldapollur á leið yfir landið

Mörgum brá í brún í morgun, enda kólnað talsvert frá undangengnum dögum.  Kuldapollur er greinilegur á ferðinni yfir landið úr norðaustri, suðvestur yfir landið.  Með honum er úrkomusvæði og frá því hefur rignt nokkur sums staðar Norðanlands, m.a. á utanverðum Tröllaskaga. Það er bót í máli að hann verður að mestu úr sögunni um miðjan daginn á morgun, miðvikudag og þá hlýnar aftur heldur, þrátt fyrir að vindáttina verði áfram norðaustlæg.

 

 

 

 

 

Fróðlegt að sjá líka hvað jökulárnar eru fljótar að bregðast við kólnun, en þær voru margar komnar í góðan sumarham. Hámarksdagsrennsli  Jökulsár á Fjöllum hafði þannig veið síðustu tvo dagana um 410 rúmmetrar á sek. en datt niður í um 330 í dag og verður að öllum líkindum  töluvert  lægra á morgun.  Vatnshitinn fellur líka ört, var um 10 stig hjá Grímsstöðum en er 6 í dag.  

Athugasemdir

[Hrafnkell Birgisson (IP-tala skráð) 15.7.2009 kl. 06:20]

Það væri fróðlegt að geta fengið meiri upplýsingar um vatns- og sjávarhita í kringum landið. Hafró er með þennan mæli í Reykjavíkurhöfn sem er farinn að nálgast 15 gráðurnar og annan í Grímsey. Eru fleiri mælar sem hægt er að skoða? Það væri einnig mjög áhugavert að geta fylgst með hita í einhverjum af fallvötnunum. Ég minnist þess þegar ég var að vinna á Kirkjubæjarklaustri sumarið 1991 en lotfhitinn náði rúmum 29 stigum tvo daga í röð. Þá skellti fólk sér til sunds víða í árnar en hitastigið í vatninu var nokkuð örugglega komið vel yfir 20 stig. Sem veiðimaður á sama svæði hef ég líka tekið eftir því að bæði bergvatnið og jökulvatnið getur hitnað ótrúlega við að renna lengi yfir svartan sand í sólríku veðri. Gaman væri að fá komment frá þér á þetta.

[Þorkell Guðbrands (IP-tala skráð) 15.7.2009 kl. 06:48]

Það getur orðið alveg bærilegt veður næstu dagana um sunnan- og suðvestanvert landið og það skiptir auðvitað mestu, því þjóðin er nær öll búsett á því svæði og það er dýrt að ferðast hundruð kílómetra til að komast út úr borginni í þokkalegt veður. Kannski verður líka besta veðrið á Reykjavíkursvæðinu, hver veit. Hinsvegar er svo að sjá að undir lok næstu viku kólni verulega og þá verður svalt lægðarsvæði yfir norðanverðri Skandinavíu og 1030 hPa hæð yfir NA Grænlandi, sem er kunnugleg staða og þegar kuldapollurinn sá færist vestur yfir Ísland, kólnar hér verulega með úrkomu og vísast mun snjóa í fjöll um norðan- og norðaustanvert landið. Væntanlega mun þessi staða verða ríkjandi í allmarga daga og óhætt að slá því föstu að fyrstu helgina í ágúst verður ekki gott veður á landinu.