Skandinavar búa sig undir fimbulkulda

Ekki er hægt að segja annað en að kalt sé í N-Evrópu. Þannig eru Skandínavar að búa sig undir alvöru vetrarveðráttu fram á nýárið.

Spáð er miklu frosti næstu daga í Skandinavíu, Svíþjóð, Noregi og Danmörku.  Íshafsloft læðist úr norðri með kulda og trekki. Sá viðtal við veðurfræðing í norska sjóvarpinu NRK.  Hann sagði að hörkugaddur yrði um landið endilangt,  allt fram yfir áramót.  Í Osló er spáð um 15 stiga gaddi, 10 stigum í Stokkhólmi og -5°C í Kaupmannahöfn.  Þar með strekkingsvindi af austri.  Ég segi bara brrrr... og naprara verður það vart ekki en þetta í Kaupmannahöfn.   Þá er nú betra að vera hér á ísaköldu landi  

Blaðamaður af Morgunblaðinu hafði samband við mig fyrr í kvöld og vildi vita hvernig á því stæði að hér hefði ekki verið umhleypingar, vindur og slabb eins og flest jól frá hans minni !

Ég tjáði honum að veðurkerfin væru öll á hvolfi ef svo mætti segja. Háþrýstingur með hlýju lofti væri yfir Vestur-Grænlandi.  Þar væru hlýindi og hiti óvænt ofan frostmarks langt norður eftir vesturströndinni. Norður fyrir 70. breiddargráðu.  Slíkt er ekki í takt við normið á þessum slóðum 10 til 20 stiga frost er eitthvað sem Grænlendingar telja eðlilega vetrarveðráttu um áramót.

Vegna þessarar stöðu er lægðagangur allur úr lagi genginn svipað og hér var um miðjan desember þegar svipuð staða var uppi.  Hér á landi hefur þetta ástand líka haft sín áhrif.  Það er eins og við séum orðin hálfgert meginland, hafrænu hlýindin vantar alveg í desemberveðráttuna og það er eins venjubundnir stormar þessa árstíma hafi lagst á jólameltuna,  eins og vindurinn nenni ekki að blása lengur !

Þegar Atlantshafsloftið berst ekki inn yfir N-Evrópu nær Rússakuldinn yfirhöndinni og A-átt verður viðvarandi í stað ríkjandi SV-áttar. Kuldar í Skandinavíu að vetri eru engin ný tíðindi, en straumar loftsins eru þeim sérlega óhagstæðir nú þegar vetur er í hámarki.  Það er annað en þegar ég bjó í Osló fyrir margt löngu og snarpur SV-vindurinn á jóladag fékk mann til að halda að veturinn væri blöff og vorið handan við hornið, enda þíðviðri og hnjúkaþeyr.  Oslóarbúar voru reyndar agndofa þessi jólin, 1990, og höfðu ekki sé annað eins í veðráttunni í þeirra lífi !

Myndin er fengin af yr.no, þar sem mikið er fjallað um væntanlegt kuldakast í Noregi. 

 

 

Athugasemdir

[Þorkell Guðbrands (IP-tala skráð) 30.12.2009 kl. 09:42]

Ég hef fyrir sið að kíkja a.m.k. einu sinni á sólarhring á skráningar sjálfvirku veðurstöðvarinnar hér á Alexandersflugvelli nærri Sauðárkróki. Völlurinn er nánast samhliða vesturkvísl Héraðsvatna, vestan Hegraness og nyrðri endi hans skammt frá sjó. Skammt frá flugstöðvarbyggingunum er þessi sjálfvirka veðurstöð og sendir mælingar sínar á klukkustundar fresti, þ.e.a.s. á heilu tímunum. Frá miðnætti s.l. nótt fór mælirinn þarna lægst í -19,7°C kl. 07:00, en er núna kl. 09:00 kominn upp í -17,5°C

Það er þekkt veðurfyrirbrigði hér um slóðir, að frostið getur orðið til muna lægra á láglendinu meðfram Héraðsvötnum, beggja vegna Hegranessins, en í hlíðum sitt hvoru megin. Þannig gefur Sigrún á Bergsstöðum upp -11,8°C núna kl. 09:00 á þurra mælinn hjá sér, sem á að vera sambærileg mæling við þá á sjálfvirku stöðinni við flugvöllinn. Fjarlægðin milli þessara tveggja athugunarstöðva er ekki mikil, en hæðarmunur ca. 60 - 70 m y.s.  

Ég fylgist nokkuð vel með frosti við suðurenda Hegranessins og þar getur frostið orðið jafnvel enn harðara en við flugvöllinn. Þar kemur reyndar á móti, að yfir sumarið er á þeim slóðum til muna hlýrra en hér nær sjónum.

[Sigurður Þór Guðjónsson, 30.12.2009 kl. 11:36]

Ég hef lengi furðað mig á því hvers vegna Veðurstofan er ekki með sjálfvirka veðurstöð á laglgendi fjær sjó en Bergstaðir eru í þessari lálendu sveit en vera þess í stað með veðurstöð á Nautabúi í meira en 100 metra hæð yfir sjávarmáli. Og ég skil ekkert í að vera að fara með þessa stöð út á flugvöll í stað kaupstaðarins á Sauðárkróki  þar sem var mönnuð veðurstöð um árabil. En kannski er það einmitt flugvöllurinn sem veldur. Allt veður skal miðast við flug nú á dögum.

[Þorkell Guðbrandsson (IP-tala skráð) 30.12.2009 kl. 14:06]

Félagi Sigurður Þór! Þegar veðurathuganastöðin fluttist frá Sauðárkróki að Bergsstöðum var ástæðan sú, að mér hefur verið sagt, að Veðurstofan fékk engan athugunarmann til starfa hér á Króknum. Að sjálfsögðu hefur Veðurstofan mestan áhuga á að veðurathuganir séu sem lengst á sama stað til að tryggja fulla vísindalega gagnsemi athugananna. Eftir því sem ég kemst næst, eru Flugstoðir eigandi sjálfvirku stöðvarinnar við Alexandersflugvöll, en samstarf er reyndar milli þessara tveggja ríkisstofnana. Sama á við um veðurstöðvar sem Siglingastofnun á og rekur víða um og við landið. Einnig á ég von á að Veðurstofan hafi aðgang að stöðvakerfi Vegagerðarinnar.  Hinsvegar hefur Veðurstofan sífellt verið að færa sig yfir í sjálfvirkar stöðvar til sinna veðurathugana og það hefur m.a. gert þeim fært að hafa þær á stöðum, þar sem búseta er ekki fyrir hendi.  Tækniframfarir hafa m.a. gert þetta kleyft, og þess utan eru þær ódýrari í rekstri en mannaðar stöðvar. Hinsvegar býst ég við að Veðurstofan þurfi alltaf að hafa tilteknar stöðvar mannaðar, m.a. til skýjaathugana og annarra skynmatsathugana.

[Sigurður Þór Guðjónsson, 30.12.2009 kl. 17:35]

En segðu mér til fróðleiks Þorkell, gætir þessa mikla kulda sem er á flugvellinum líka á Króknum við þessar aðstæður eða er hitastigið þar líkt og á Bergsstöðum,  eða hvað? Ég man eftir einstaka mælingum á mönnuðu stöðunni á Sauðáarkróki sem voru svona eins og þessar á flugvellinum undanfarna daga, með því kaldasta á landinu.

[Þorkell Guðbrands (IP-tala skráð) 30.12.2009 kl. 20:36]

Fyrirgefðu Sigurður Þór að ég svaraði þér ekki strax - var upptekinn við annað eins og kemur fyrir okkur! - Sko, við aðstæður eins og í dag var frostið á Króknum einhversstaðar á milli Bergsstaða og flugvallarins. Þegar frostið var tæp 18 stig um fimm leytið í morgun niður á flugvelli, var mælirinn hjá mér í 2ja metra hæð (sprittmælir) í rúmum -13°C, en klukkan sex var eldhúsmælirinn hjá mér kominn niður í rúm fjórtán stig, en þá minnir mig að Bergsstaðir hafi gefið upp -11,8 (sama og kl. 09:00?)  Þessar tímasetningar eru farnar út núna af vef Veðurstofu, en mig minnir að mælirinn á flugvellinum hafi þá sýnt -19,2°C.

[Gunnar Sæmundsson (IP-tala skráð) 30.12.2009 kl. 20:41]

Þar sem áranótin eru á næsta leyti þav vil ég þakka þér Einar fyrir einstaklega góða umfjöllun og fróðleik sem hér hefur komið fram á árinu sem er að líða. Það er ómetanlegt  fyrir okkur sem höfum áhuga á að fylgjast með veðurfari frá degi til dags og ekki síður að fá að skyggnast inn í framtíðina. Ég þekki þetta fyrirbryggði sem hér að ofan hefur verið il umræðu. Ég varð oft áþreyfanlega var við svona þegar ég var að vinna á Holtavörðuheiði. Í logni var stundum minna frost uppi á heiði en hér niðri í byggð. Vissulega er stundum kuldapollur hér innst í Hrútafirðinum. Og kaldasti staðurinn er þar sem núverandi Staðarskáli stendur. En svona í lokin væri fróðlegt að frétta í ársbyrjun hvað þeir visu menn sem eru að skygnast fram í tíma segja um veðrið á næstu mánuðum. Mér finnst að það sem þú ,,Einar" hefur verið að taka saman eftir erlendum heimildum og síðan lagt nokkurt mat á, hafi gefið nokkuð góðar visbendingar. Að lokum óska ég þér og lesendum árs og friðar.

[Gunnar Hafsteinsson (IP-tala skráð) 31.12.2009 kl. 09:57]

Alheimshlýindi, hvað?  Hvað varð um global warming?