21,0°C á Egilsstaðaflugvelli og sennilega enn hlýrra á morgun

Í dag brá loks til hagstæðra vinda austanlands.  Andvari var af landi í stað þrálátrar hafrænunnar lengst af undanfarnar vikur.  Við það komst hitinn í 21,0°c á sjálfvirka mælinum á Egilsstaðaflugvelli.  Niðri á Fjörðum var þessi langþráða gola af landi heldur veik og á Reyðarfirði til að mynda var hafgolan í aðalhlutverki og því ekkert hlýtt.  Skárra þó í Neskaupsstað.

Þetta er fyrsti dagurinn í sumar þar sem hiti kemst í 20 stigin á einhverri veðurathugunarstöð austanlands.  Þó er það svo að skilgreina má hvenær sumarið hófst eystra.  Í apríl komu lengri veðurkaflar sem voru svo vænir að þeir líktust sumri en ekki fyrrihluta vors.  Enda var það svo að hitinn 9. apríl fór í 20,2°C á Skjaldþingsstöðum í Vopnafirði.  11. júlí er því besti sumardagurinn austanlands frá því snemma í apríl !  Þarna á milli eru síðan margir, margir með hreinræktuðu skíðviðri. 

Á morgun er allt útlit fyrir að það verði enn hlýrra á Austurlandi og SV vindurinn yfir landinu er líka hægt og bítandi að færast í aukana. Ýmsar lofthitavísitölur, s.s. sú sem kölluð er þykkt loftsins (fjarlægð á milli fastra þrýstiflata 1000 og 500 hPa) gefur til kynna hlýjasta dag sumarsins á landsvísu.

Fari svo að sólin nái að skína norðaustan- og austanlands meira og minna allan daginn og hafgolan nái sér ekki á strik eru talsverðar líkur til þess að einhver veðurstöðin í þessum landshlutum rjúfi 25 stiga múrinn.

Niðurstaða dagsins:  Hámarkið varð 21,8°C og aftur á Egilsstaðaflugvelli.  Ekki vantaði sólskinið, en hafgolan sýndi sig upp úr hádegi.  Hún var þó ógreinilegri á Héraði, en niðri á Fjörðum þar sem hún kæfði hlýindin í loftinu hratt og örugglega.

Athugasemdir

[Gunnar Th. Gunnarsson, 11.7.2011 kl. 21:14]

Thad er nu einmitt vandamalid vid solina.... hun vermir loftid hratt yfir landi svo loftid stigur upp. Kalt loft kemur i stadinn og thad er styst i thad fra hafinu. Hins vegar getur sv-attin verid thad stif ad hun naer ad halda kalda loftinu fra, a.m.k. fyrri part dags.

[Magnús Ásgrímsson (IP-tala skráð) 12.7.2011 kl. 08:22]

Þrátt fyrir að sumarið sé loksins komið þá var næturfrost í fyrrinótt, aðfaranótt mánudagsins.  Á Borgarfirði eystra þurftu árrisulir að skafa bílrúður.

[Sigurður Þór Guðjónsson, 12.7.2011 kl. 08:26]

Veit ekki betur en hafi verið sumarveðir fyrstu vikuna í júí, einn daginn 20 stig á Akureyri sem ekki var í gær.

[Jón Steinar Ragnarsson, 12.7.2011 kl. 23:33]

Ég sp+ai því að við hér á Siglufirði förum nærri með að hirða metið á morgun.