Hnattræn frávik hita síðustu 12 mánuði

Ég rakst á þetta ágæta kort á síðu Dönsku Veðurstofunnar. Ekki er það þó danskt heldur ættað frá GISS í Bandaríkjunum.  Það sýnir frávik hita á jörðinn síðasta árið eða frá nóvember 2010 til október 2011.  Viðmiðunartímabilið er 1961-1990.  Í heildina séð var meðalhiti jarðar nýliðið 12 mánaða tímibil um 0,4 stigum yfir meðalgildinu.

Á váttumiklum hafsvæðum A-Kyrrahafs er frávikið neikvætt  á meðan það er jákvætt nær Ástralíu.  Slíkt samhengi eða munstur frávika er dæmigert fyrir tímabil sem einkennist af La-Nina ástandi í Kyrrahafi. Það er búið að vera ríkjandi frá því einmitt um þetta leyti í fyrra og stendur enn hvað svo sem kann að gerast um jólaleytið þegar andstæðan, El-Nino lætur oft á sér kræla. (Reiknaðar langtímaspár gera flestar ráð fyrir óbreyttu ástandi).

Sjá má hversu markvert hlýrra en að jafnaðu hefur verið vestur af Grænlandi og nyrst í austurhluta N-Ameríku.  Þarna var tíðin mjög afbrigðilega hlý í framan af síðasta vetri (nóv og des) og meðalhiti síðasta sumar mældist einnig hár. 

Einnig er athyglisvert að sjá að suður í Atlantshafi er stærðarinar flekkur þar sem hitinn er nærri meðallagi.  Er eins "eyja" miðað við jákvæði frávikin allt í kring.  

Í grennd við Ísland og reyndar víðar við norðanvert Atlantshafið verður að hafa í huga að viðmiðunartímabilið 1961-1990 þótti frekar kalt.  Frávik upp á um 1°C þykja eðlileg á síðari árum og ekkert fréttnæm ef út í það er farið.  Jákvæð frávik rauða litarins upp á 2 til 3°C heyrðu hins vegar til tíðinda á okkar slóðum þar sem hafið allt i kring temprar öll frávik samanborið við stóru meginlöndin og ísasvæði norðurhjarans.  

6-11 daga spá, 23. til 28. nóvember.

Flest bendir til þess að straumhvörf gætu orðið hér í veðrinu um og fyrir miðja næstu viku.  Þessum undurlegum hlýindum að hausti ljúki senn og lægðir fari að berast hingað úr suðvestri.  Meira en það því nú er samkvæmt spánni líka farið að glitta í N-átt af einhverju tagi síðari hluta spátímabilsins.           

Veðurspá fram á komandi miðvikudag má sjá hér á vef VÍ

Miðvikudagur 23. nóvember:

Nokkuð myndarlegri lægð er spáð á hálfgerðri hraðferð vestan og suðvestan við landið.  Það kólnar nokkuð með snarpri SV-átt.  Stutt í  slydduél suðvestan- og vestanlands, en hiti enn markvert ofan frostmarks norðan- og austanlands

Fimmtudagur 24. nóvember:

Áfram spáð SV-átt og hún verður þegar þarna er komið við sögu orðin hægari. Frost til fjalla og hiti um rétt ofan frostmarks víðast á láglendi.  Él verða suðvestan- og vestanlands.

Föstudagur 25. nóvember: 

Útlit er fyrir rólegheitaveður, e.t.v. hæðarhryggur á leið norðaustur yfir landið.  Úrkomulaust að mestu og kólnar í veðri frekar en hitt. 

Laugardagur 26. nóvember:

Djúp lægða á Grænlandshafi eða þá hér skammt vestur undan.  Skil far hratt yfir landið, mögulega þegar á föstudag.  Hlýnar þá í skamma stund.  Vindur snýst til SV-áttar í kjölfarið og kólnar á ný. 

Sunnudagur 27. nóvember:

Snýst til N- eða NA-áttar af einhverju tagi um leið og lægðin sjúpa berst austur fyrir landi.  Ekki ólíklega fylgir þessu hvassviðri og hret norðan- og austanlands.

Mánudagur 28. nóvember:

Líklega N-átt og enn frekari norðlægur uppruni loftsins yfir landinu.  Hríðarveður eða él norðantil og frost um mest allt land. 

Mat á óvissu:

Spálíkönin gera ráð fyrir því að fyrirstöðuhæðin yfir N-Evrópu breyti um lögun og reki líka til austurs á þriðjudag eða miðvikudag.  Við það gerbreytast helstu veðurkerfi hér við landi.  SV-átt í háloftunum með kjarna nokkru fyrir sunnan land verður í aðalhlutverki.  NAO-vísirinn (Norður-Atlantshafs) fer þá frá því að vera hlutlaus eða aðeins neikvæður yfir í það að vera jákvæður. Óvissan er mest hvað tekur við.  Líklegast verða nokkuð sjúpar lægðir á ferð við landið.  Mest ber á lofti upprunu úr vestri, en ýmislegt bendir líka til þess að heimskautaloft fari að safnast upp austur af Grænalndi og það berist til okkar á endanum.  Hvort það gerist nákvæmlega um aðra helgi, en nokkru síðar er óklárt. Ósennilega þó mikið fyrr en það skoði maður atburðarrásina í rökréttu samhengi.  

Mestu hlýindin yfirstaðin í bili

Þó hitatölur séu enn háar, hefur samt náð að slá á mestu hlýindin og toppnum því náð í þessari lotu. Vindur er líka orðinn hægari, sérstaklega um austanvert landið. Hann skiptir miklu í þessu samhengi.

Í Reykjavík var meðalhiti síðasta sólarhrings (15. nóv) 9,63°C og í fyrradag var ívið hlýrra eða 9,80°C.  Dæmigerð júnígildi dægurhitans.  Þó er þetta ekki met, því í snörpu gusunni 11.nóv 1999 var sólarhringshitinn 10,7°C.  Sennilega er það hæsta gildi sem fyrir finnst í langri gagnröð mælinga í Reykjavík.  Tek fram að ég hef ekki borið saman fyllilega við eldri gildi.

Þessi mildi veðurkafli sem hófst 3. nóvember og er hvergi nærri lokið hefur m.a. komið af stað jöklabráðnun á nýjan leik, eftir að jöklar voru komnir í sinn vetrarham. Sést m.a. með því að skoða rennsli Jökulsár á Fjöllum, en úrkoma á vatnsviði hennar hefur ekki verið mikil og á takmarkaða sök á auknu rennsli. Hvernig má annað vera þegar frostmarkshæðin hefur verið meira og minna stöðgugt yfir 1.000 metrum og á stundum í 2.000 metra hæð. 

 

6-11 daga spár, yfirferð (11)

Þá er komið að því að sjá hvernig gekk að spá hlýindunum á landinu í síðaustu viku og fram yfir nýliðna helgi.  Veðurspáin sem hér er til skoðunar var gefin út 3. nóvember.

Matskvarðinn sem stuðst er við er hér einnig og kortin eru fengin af vef Veðurstofunnar.

3 stig. Spáin gekk eftir í öllum aðalatriðum.  Á það við um stöðu veðurkerfa, vindátt á landinu og einnig þann breytileika veðurs eftir landshlutum sem spáin gat til.  

2 stig. Spá gekk eftir að sumu leyti, en öðru ekki.  Staða veðurkerfa er a.m.k. í áttina og hitafar með þeim hætti sem spáin gaf til kynna.  Vindátt var e.t.v. ekki sú sama eða greinileg tímahliðrun veðurkerfa. 

1 stig. Ekki hægt að segja að spáin hafi ræst og flest með öðrum hætti, en þó a.m.k. einn tilgreindur veðurþáttur eitthvað í áttina (staða kerfa, vindátt, hiti eða úrkoma).

0 stig. Veður nánast alger andstæða spárinnar að flestu eða öllu leyti. 

Miðvikudagur 9. nóvember:

Sunnan- og síðar suðvestanátt í kjölfar skila sem spáð er norðaustur um landið.   Lægð á Grænlandshafi.  Úrkomusamt sunnan- og vestanlands.

Hér kemur flest heim og saman nema að SV-átt er ofaukið.  Lægðin á Grænlandshafi og úrkomusamt sunnan- og vestanlands. 2 stig.

 

 

 

 

 

 

 

 

Fimmtudagur 10. nóvember:

Lægðardrag af einhverju tagi fer yfir landið og vindur verður SA-stæður, sennilega nokkuð hvass.  Rigning, a.m.k. um tíma, einkum sunnanlands.

Ágæt spá, vindáttin er rétt og þá var líka nokkuð hvasst með rigningu samfara skilum sem fóru yfir landið. 3 stig hér.

 

 

 

 

 

 

 

 

Föstudagur 11. nóvember: 

Áfram SA-lægur vindur, hægari aftur og fremur milt í veðri. Fleiri fremur veigalitlir úrkomubakkar berast úr suðri og yfir landið. 

Spáin með þetta nánast í smæstu dráttum. Komin hægari SA-átt.  Úrkomubakkar frekar en veðraskil bárust yfir landið og úrkoma mældist talsverð um sunnanvert landið.  Líka 3 stig hér.

 

 

 

 

 

 

 

Laugardagur 12. nóvember:

Kólnar heldur með NA-stæðum vindi.  Hiti þó enn um sinn um eða rétt ofan frostmarks á láglendi.  Úrkoma, einkum A- og NA-lands, en léttir til suðvestanlands.

Hér verða kaflaskil í spágetunni.  Áfram hlýtt, þó með góðum vilja megi segja að vindur hafi um tíma náð að verða NA-stæður. Ekki úrkoma að nokkru ráði norðaustan- og austanlands og heldur létti ekki til suðvestanlands.  Öðru nær. 1 stig fæst fyrir vindáttina, en flest annað var út úr kú. 

 

 

 

 

 

 

Sunnudagur 13. nóvember:

Svipað veður, en ákveðnari NA-vindur ef eitthvað er, einkum um landið norðan- og austanvert. Hægt kólnandi.

Eins og sjá má gerði spáin ráð fyrir veðrabreytingu sem greinilega gekk eftir.  Í stað kaldara veðurs og lofts með norlægari uppruna héldurst hlýindin. 0 stig.

 

 

 

 

 

 

 

Mánudagur 14. nóvember:

Enn NA-átt.  Hæð yfir Grænlandi og uppruni loftsins verður norðlægari og við það dregur úr éljum og snjókomu.  Jafnframt rofar enn frekar til um landið sunnanvert.  Vægt frost allvíða. 

Sama hér.  Spáin alveg út úr kú.  Ekki frost á landinu, heldur nánast eins hlýtt og hugsanlega getur orðið á þessum árstíma !  0 stig. 

 

 

 

 

 

 

 

Niðurstaða:

Spádrægnin reyndist 7-8 dagar og fram að því náðu reikningar atburðarrásinni ágætlega.  Eftir það skyldu leiðir. Í mati á óvissu sagði: "Lægðir fyrir sunnan og suðavestan land mjakast til austurs og um leið snýst vindur til NA-áttar með kólnandi veðri. Tengist hægfara framrás háloftabylgju til austurs yfir landið og við það stígur loftþrýstingur við Grænland."  Það sem hins vegar gerðist var að fyrirstöðuhæðin yfir N-Evrópu hélt velli og ekki nóg með það heldur styrktist hún. Við það náði umrædd háloftbylgja sér ekki á strik eða öllu heldur strandaði hún hér suður og suðvesturundan og framrás milda loftsins var ótrufluð áfram.

Einkar mildur morgunn

Hér má sjá yfirlit veðurs á landinu kl. 06 í morgun af vef VÍ.  Ekki beint nóvemberlegt veður. Ef fetta kort vær sett fyrir framan mig óg ég beðinn á giska á árstímann hefði ég líklega sagt sem svo að þetta gæti verið frá miðjum júní og það á mildum slíkum morgni !

Ætli megi ekki segja að hiti sé um 7-8°C yfir meðallagi árstímans á Suður- og Suðausturlandi  og 10-12°C á Vestfjörðum og Norðurlandi. Frostmarkshæðin er í um 2.000 metrum sem þýðir að leysingin nær til flestra jökulsvæða einnig. 

Þetta veðurlag er með hreinum ólíkindum og í raun stendur maður bara agndofa frammi fyrir þessu.  Ég er hissa á því að fleiri stök hitamet skuli þó ekki vera sleginn eins og svo háttar til þessi dægrin.  Aðrir liggja yfir metatöflunum og birta okkur metatíðindinn um leið og þau falla.

Fyrir um viku eða 8. nóvember var fyrra hámark þessara hausthlýinda hér.  Þá reiknaði ég uppruna loftsins yfir norðanverðu landinu til hafsvæðanna úti af Biskayflóa.  Sams konar reikningar með HYSPLIT sína áþekkan uppruna.  Nú þó heldur sunnar undan Portúgal og þar um slóðir.  

Það lægir heldur á morgun í bili a.m.k. og þá kólnar yfirborðið heldur þó svo að áfram leiki mjög milt loft um landið. 

Hálka á blettum

Nú í morgun tók ég eftir því að á sama tíma og hiti mældist 8 stig á Blönduósi við þjóðveg 1 voru aðeins vestar við veginn á Gauksmýri ekki nema 2 gráður.  Á fyrrnefnda staðnum blástur af SA, en við Gauksmýri eða í Línakradal eins og svæðið er oft nefnt var hægviðri.  Þar var frost við veg og líkast til hált svo fremi að vegurinn hafi verið blautur eða rakur (Vegagerðin sagði veginn lausan við hálkubletti á færðarkorti sínu !).  Á Blönduósi hins vegar eins langt frá þvi að vera hált og hugsast getur í þessum hita og blæstri.

Í gærkvöldi varð óhapp í svokallaðri Biskupsbrekku sunnan Holtavörðuheiðar.  Þar fór sjö manna fólksbíll margar veltur vegna hálku þó svo að vegurinn hafi virst vera þurr. Um svipað leyti var hiti um +3°C uppi á heiðinni og veghiti greinilega ofan frostmarks.  Ísingin hefur sennilega verið staðbundinn þar sem meira skjól var og kælingin því þar ákveðnari við yfirborð.

Það er tíðarfarið eins og nú sem er hvað varhugaverðast í þessu sambandi, milt veður og bleyta.  Þegar hins vegar léttir til á milli og vind hægir kólnar yfirborðið hratt á þessum árstíma skammdegisins, jafnvel þó mælar séu að sýna hita vel yfir frostmarki.  Það þarf eiginlega frekar að fylgjast með vindi og skýjafari heldur en að einblína á lofthitann. Veghitamælarnir þar sem þeir eru gefa góða vísbendingu þegar skyndilega dregur frá og hitahverf myndast næst jörðu.  En við sjáum það í gærkvöldi að veghitamælirinn efst á Holtavörðuheiði var ekki í neinu samræmi við aðstæður aðeins sunnar og neðar á heiðinni þar sem líkast við hefur verið alveg kyrrt og ráðrúm þar fyrir hraðari kólnum vegyfirborðsins.   

Fádæma hlýindi á landinu síðustu 8-10 dagana

Eftir kafla með ríkjandi NA-átt og kalsasamri haustverðráttu  þegar setti niður talsverðan snjó til fjalla, brá til betri tíðar 4. nóvember.  Síðan þá og sérstaklega síðustu 6 dægrin hefur hitafarið verið með fádæmum. Náði hámarki sl. mánudag og þriðjudag (7. og 8.) þegar hámarkshiti á landinu fór yfir 20 stig á Skjaldþingsstöðum á Vopnafirði.

Hlýjasti nóvembermánuður sem sögur fara af er frá 1945 á miðju (eða aðeins úthallandi) hlýskeiði 20. aldar. Þá mældist líka hæsti hiti þess mánaðar á veðurstöð, 6,7°C í Vík í Mýrdal.  Í nóvember 1945 var látlaus S-átt fyrstu þrjár vikurnar með einmuna hlýindum.  Síðan gerði stutt kuldakast áður en hlýnaði aftur í lokin.

Hitinn er enn mældur í Vík, en ég hef ekki aðgang enn sem komið er að þeim mælingum sem færðar eru í bók af veðurathugunarmanni.  Á Stórhöfða er meðalhitinn það sem af er mánaðar 6,5°C.  En ég tek reyndar eftir öðru og það er hitafarið í Skaftafelli.  Þar er þessa fyrstu 12 dagana meðalhitinn 7,2°C.  Aðstaæðaur þar eru kjörnar þegar SA-átt er jafnríkjandi og verið hefur.  Þá háttar þannig til að handan Öræfajökuls rignir mjög mikið og þegar loftið berst niður hlémegin í sannkölluðum hnúkaþey nýtur Skaftafells gufunarvarmans sem losnar úr læðingi við uppstreumið og losun rakans með rigningunni áveðurs.  Þar er einmitt Kvísker, úrkomusamasta veðurstöð landsins.  Það sem af er mánaðar hafa mælst eitthvað nærri 350 mm á Kvískerjum. (Ekki nákvæm tala).  

Upp á síðkastið hefur hiti meira og minna verið 8 til 9 stig og þar yfir í Skaftafelli, jafnt á degi sem nóttu.

Maður hlýtur að velta fyrir sér hvort nýtt met hitameðaltals á veðurstöð sé í uppsiglingu ? Það ræðst vitanlega af veðráttu næstu tveggja vikna og rúmlega það.  Ljóst er að tíðan helst næstu daga og sennilega a.m.k. fram undi næstu helgi hið skemmsta og því er nokkur von enn a.m.k.  Þrátt fyrir hita í lofti og frostmarkshæð ofar fjalla að mestu er þó spáð heldur hægari vindi og minni úrkomu sunnantil á landinu svona heilt yfir en verið hefur.  Það hefur aftur í för með sér að hæglega getur kólnað við yfirborð og ekki síst í innsveitum.

Til að viðhalda nóvemberhlýindum þarf að berast stöðugt milt og rakt loft sunnan úr höfum og helst með nokkrum vindi.  Þannig losnar líka gufunarvarminn úr læðingi sem aftur heldur kvikasilfrinu hátt yfir frostmarkinu. 

Myndin er úr safni Jóns Inga Cæsarssonar og tekin 5. nóvember í Eyjafirði.

6-11 daga spá, 16. til 21. nóvember

Langtímaspáin að þessu sinni er nokkuð eindreginn eða er frekar viðeigandi að segja að spáð sé einsleitu veðri.  Ekki er  annað að sjá annað en staða meginveðurkerfanna haldist í stórum dráttum frá því sem nú er og þessi milda og vætusama tíð verði viðvarandi fram yfir aðra helgi.           

Veðurspá fram á komandi miðvikudag má sjá hér á vef VÍ

Miðvikudagur 16. nóvember:

Lægð er spáð fyrir suðvestan land.  Hún ekki mjög djúp, en hægfara.  Milt og jafnvel mjög milt í veðri.  SA-átt og nokkur rigning um sunnanvert landið.

Fimmtudagur 17. nóvember:

Heldur svalara loft í kjölfar kuldaskila á leið austur yfir landið.  Þó verður almennt séð frostlaust.  Úrkoma í flestum landshlutum, a.m.k. um tíma.

Föstudagur 18. nóvember: 

Nýrri lægð spáð á Grænlandshafi og aftur SA-átt með hlýnandi veðri.  Rigning sunnan- og vestanlands.

Laugardagur 19. nóvember:

Svipað veður, en kannski heldur ákveðnari vindur (SA-átt).  Vætusamt verður sunnantil á landinu, en að mestu þurrt á Norðurlandi.

Sunnudagur 20. nóvember:

Kólnar lítið eitt að nýju, en engu að síðu verður að teljast frekar milt.  Í raun er óhætt að tala um nokkuð keimlíkt veður flesta þessa daga.

Mánudagur 21. nóvember:

Mun er af líkum lætur berast til okkar loft af frekari vestlægum upprauna með SV-átt.  Enn verður þó lægð á sunnanverðu Grælnadshafi og háþrýstingur yfir Bretlandseyjum líkt og lengst af þessa spátímabils. Frystir á fjallvegum, en mun síður á láglendi.

Mat á óvissu:

Þröskuldurinn í reikningunum liggur að þessu sinni fremur aftarlega. jafnvel á 10. til 11. degi.  Oftar gerist það mun fyrr í ferlinu að spárnar taka að vaxa út og suður í stað þess að fylgjast sæmilega að. Í raun og sanni má segja að ekki sé verið að spá neinum breytingum. Fyrirstöðuhæðin yfir Skandinavíu er látin halda sér og því verða lægðir fyrir sunnan- og suðvestan land hægfara og heldur ekki mjög djúpar.  Hins vegar beina þær (ásamt hæðinni í austri) raka og úrkomu í gríð og erg.  Óvissan lítur því einkum að tímasetningum á minnháttar atburðuum eins og fari skila eða úrkomubakka yfir landið og snúningi vindsins um S og SA. En auðvitað verður þessi staða ekki eilíf.  Þó er athyglisvert að nánast ekkert er það, jafnvel síðast á spátímanum, sem bendir til þess að fyrirstöðuhæðin brotni niður. 

Lítil saga úr hausthlýindunum

Var á leið suður frá Sauðárkróki í kvöld akandi og sæmilega vakandi (vona ég).  Veðrið á leiðinni suður í Borgarfjörð vakti nokkra furðu.

Fyrst var ekið yfir Þverárfjall.  Hafði ég augun hjá mér gagnvart mögulegri ísingu, enda stillt og sást í stjörnur og tungl.  Vegurinn var ekki blautur, frekar rakur á köflum.  Þar sem hæst var farið sýndi hiti í bíl 6°C. Enginn hálkuhætta þar. Á Blönduós var vegurinn skraufaþurr og áfram um Húnaþing eystra og vestur um Þing. Greinileg suðaustan gola og milt í lofti.  Það dropaði aðeins í Víðidalnum, en við Hvammstangagatnamótin skipti veðrið algerlega um gír.  Þar var húðarigning og vegur rennblautur með pollum.  Líkt og verið hefði vatnsveður síðustu klukkustundirnar. Þannig héldust aðstæður niður í Hrútafjörð þar sem rétt utan við Reyki varð vegur skyndilega aftur alveg þurr. 

Á Holtavörðuheiði var síðan 8 stiga hiti og klukkan nálgaðist miðnætti.  Kolniðamyrkur og aðeins einn og einn flutningabíll á ferðinni.  Leit mín að hálkublettum bar því engan árangur og ekki skánaði það þegar komið var niður í Norðurárdal og mælirinn sýndi 11,5°C (Stöð VÍ á Hvanneyri var með áþekkan hita.) Ég opnaði gluggann og um leið og milt og súrefnisríkt nóvembernæturloftið lék um vanga minn hugsaði ég með mér hvort þetta gæti verið satt !?

Talandi um Hvanneyri að þá sló ég á það að meðalhiti fyrstu 9 daga í nóvember er 5,2°C. Langt yfir meðaltali.  Þó voru fyrstu tveir dagarnir fremur kaldir !

Og þessi tíð heldur bara áfram. Ef undan er skilinn ca 1/2 sólarhringur á föstudag, haldast þessi hausthlýindi fram á þriðjudag eða miðvikudag í næstu viku hið skemmsta.

6 - 11 daga spár, yfirferð (10)

Skoðun á langtímaspánni frá því á miðvikudag og þar til í gær má sjá hér að neðan.  Tímabilið endaði með látum í veðrinu og fróðlegt verður að sjá hvort spáin hafi verið í það veru ?

Matskvarðinn sem stuðst er við er hér einnig og kortin eru fengin af vef Veðurstofunnar.

3 stig. Spáin gekk eftir í öllum aðalatriðum.  Á það við um stöðu veðurkerfa, vindátt á landinu og einnig þann breytileika veðurs eftir landshlutum sem spáin gat til.  

2 stig. Spá gekk eftir að sumu leyti, en öðru ekki.  Staða veðurkerfa er a.m.k. í áttina og hitafar með þeim hætti sem spáin gaf til kynna.  Vindátt var e.t.v. ekki sú sama eða greinileg tímahliðrun veðurkerfa. 

1 stig. Ekki hægt að segja að spáin hafi ræst og flest með öðrum hætti, en þó a.m.k. einn tilgreindur veðurþáttur eitthvað í áttina (staða kerfa, vindátt, hiti eða úrkoma).

0 stig. Veður nánast alger andstæða spárinnar að flestu eða öllu leyti. 

Miðvikudagur 2. nóvember:

Djúp og víðáttumikil lægð verður langt suður í hafi.  Vaxandi NA-átt á landinu og fer að rigna sunnan- og suðaustanlands þegar frá líður.

Lægðin er vissulega djúpt suður í hafi og vaxandi NA-átt.  Eins fór að rigna frá skilum lægðarinnar síðdegis.  Spátextinn náði þessu mjög vel held ég verð að segja. 3 stig.

 

 

 

 

 

 

Fimmtudagur 3. nóvember:

Hitaskil með talsverðri rigningu fara norður eða norðvestur yfir landið með tiltölulega mildu veðri.  SA-átt, fremur hæg en líkast til hvöss NA-átt á Vestfjörðum og þar um slóðir.

Þarf eiginlega ekki að hafa um þetta fleiri orð.  Spáin er nánast lýsing veðurssins.  Úrkoman var þegar upp var staðið ansi drjúg suðaustanlands og á Austfjörðum.  3 stig.

 

 

 

 

 

 

Föstudagur 4. nóvember: 

Enn lægð eða afsprengi lægðar viðloðandi suðvestanvert landið.  Vindáttin A-læg eða SA-læg og milt á landinu.  Líklega frostlaust upp úr öllu.  Úrkomusamt eystra, en síður annars staðar.

Sama upp á teningnum á föstudag.  Spáin er ótrúlega nákvæm á stöðuna. Lægð úti fyrir suðvestanverður landinu, milt og rigning í nokkru magni suðaustanlands. 3 stig.

 

 

 

 

 

 

Laugardagur 5. nóvember:

Nokkur hitastigull líklegur yfir landinu til austurs.  Því milt austantil, en svalara vestantil.  Frostlaust þó á láglendi við þessar aðstæður.  Einhver úrkoma í flestum landshlutum.  Vindátt S-læg eða þá tvíátta á landinu og strekkingsvindur ef af líkum lætur.

Strekkingsvindur, en varla hægt að segja að tvíátta sé, heldur eindregin SV-át. Hitastigull til staðar og úrkoma allvíða.  Sæmileg spá þegar upp er staðið, en ekki fullkomin. 2 stig. 

 

 

 

 

 

 

 

Sunnudagur 6. nóvember:

Útlit fyrir fremur aðgerðarlítið veður og hægt kólnandi.  Lægðasvæði á Atlantshafi suður- og suðvesturundan.  Vindátt því á milli S og A.

Spáin náði ekki lægðabylgjunni sem skaust norður yfir Austurlandi. Hún olli hvassri V-átt austanlands um tíma.  Þáð kólnaði reyndar eins og spáð hafði verið.  Flest aflaga, en þó ekki allt.  1 stig. 

 

 

 

 

 

 

Mánudagur 7. nóvember:

Upp úr þessu nálgast vaxandi lægð landið úr suðvestri með hvassri SA-átt og slagviðri.  Þessi væntanlega lægð gæti svo sem allt eins bankað upp á degi fyrr, þ.e. á sunnudag.

Óveðrið gerði um kvöldið.  Verður að teljast harla gott að spáin gerði ráð fyrir vaxandi læg. Hún kom reyndar ekki úr suðvestri, heldur beint úr suðri.  En hvað máli skiptir það þegar horft er 11 daga fram í veðrinu.  Í raun má telja þessa spá ótúlega, þrátt fyrir varnaglann um lægðina jafnvel fyrr. Hiklaust 3 stig. 

Niðurstaða: 

Þrátt fyrir öll lætin í veðrinu að undanförnu er ekki hægt að segja annað en spálíkönin hafi verið vel á spori með myndun og ferðir veðurkerfanna. Ég held að þetta sé besta niðurstaðan hingað til í stigum talið. Þau eru 15 af 18 mögulegum.   Sjálfum mér kom það þægilega á óvart hvað veðrið varð keimlíkt spánni og aðeins minni blæbrigði sem ekki náðust.