Yfirlit næturinnar

Yfirlit næturinnar kallast upptalning útgildanna í veðurfregnum VÍ kl. 10:03.  Hér kemur nokkurs konar yfirlit næturinnar nú þegar stórisunnan er að ganga niður að morgni 8. nóvember.

Lægðin á Grænlanshafi náði hámarsdýpt sinni seint í gærkvöldi og var greind um 948.  Á veðurkorti MetOffice í Bretlandi kl. 00 sést vel hvað um ræðir.  Heilmikið háþrýstisvæði hélt á móti og fyrir vikið blés kröftuglega af S og SSA á lanindu.  Kjarni vindrastarinnar lá nærri vestanverðu landinu.  

Ég spáði í gær vindhviðum (á vef Vegagerðarinnar) allt að 40-45 m/s undir Hafnarfjalli og á norðanverðu Snæfellsnesi.  Við Hafnarfjall sló í 49 m/s laust fyrir miðnætti. Takið eftir því hvað verði skall skyndilega á í gær rétt fyrir kl. 15.  Við Kolgrafarfjarðarbrú mældist mesta hviða 43 m/s snemma í nótt. Hviðurnar hér eru sekúndugildi. Ég gerði líka ráð fyrir hviðum á Siglufjarðarvegi, en ég sé á mælistöðvum í morgun að veðrið náði ekki fyllilega þangað.

Ég tók líka eftir því að á Hólmsheiði ofan Reykjavíkur (þar sem sumri vilja setja niður inannlandsflugvöll) náði meðalvindur um kl. 02 til 03 um 30 m/s og mesta hviða mældist 40 m/s. (3 sek. gildi).  Þessi veðurhæð jafngildir ofsaveðri eða 11 vindstigum.   ÞAð er því ekki furða þó lausir hlutir hafi farið af stað suðvestan og vestanlands og skemmdir orðið á mannvirkjum á stöku stað.  

Hlýtt loft fylgdi eins og vænta mátti.  Hiti þegar þetta er skrifað hefur náð 16°C á Hámundarstaðhálsi við Dalvík.  Ég hefði fyrirfram allt eins búist við 17 til 18°C mest við þessi skilyrði.  En hvaðan skyldi nú þetta milda loft vera upprunið.  Með því að bakfæra feril lofts á miðnætti á Norðurlandi í 500 metra hæð reiknast uppruninn vera vestur af Biskayflóa eins og HYSPLIT keyrslan hér að neðan sýnir.  Upprunalega er loftpakkinn dreginn niður úr 2.000 metra hæð áður en veðurkerfin skjóta honum hingað norður eftir á rétt um sólarhring.  

Óvenju skörp hitaskil á leið norður yfir landið

Mjög hlýtt loft fyrir árstímann æðir nú norður og norðvestur yfir landið. Í framrás þess eru skörp hitaskil og samfara þeim nokkuð áköf úrkoma.

Við sjáum á meðfylgjandi korti af Brunni Veðurstofunnar spá um hita (og vind) í 925 hPa fletinum eða í um 600-700 metra hæð hvað hitastigullinn er skarpur.  Spákortið gildir í dag kl. 18.   

Græna línan táknar 0°C í þessari hæð og norðan hennar er frost. Rauðu línurnar skipa sér síðan þétt sunnan hinnar grænu með 2 stiga millibili. Á meðan það er um 0°C í þessari hæð við Hornbjarg er +°8°C í Búðardal.  Látum liggja á milli hluta língrautinn yfir miðju landinu sem verður vegna þess að miðhálendið rís talsvert hærra  en þessi þrýstiflötur.

Þetta er svona með skarpari dráttum sem við sjáum alla jafna þegar hitaskil eru annars vegar.  Miklu frekar að maður sjái svona nokkuð með kuldaskilum um miðjan vetur. Enda fór það svo að þegar þessi skörpu hitaskil fóru fyrir sunnanlands upp úr hádegi laust niður nokkrum eldingum í Flóanum, Grímsnesi, Grafningi og Þingvallasveit, eins og lesa má um hér.

Listræn tilþrif vefmyndavélar Vegagerðarinnar

Þó vefmyndavélar Vegagerðarinnar séu afar góðar til síns brúks eru myndgæðin oftast eins og búast má við.  Maður sér einfaldlega það sem linsan í staurnum fangar hverju sinni. Stundum er myndin yfirlýst á móti sólarljósinu og í annan tíma markar vart fyrir umhverfinu þó full dagsbirta sé.

En það kemur líka einstaka sinnum fyrir að það koma myndir úr þessum tækjum á vefnum sem halda mætti að teknar hafi  verið af góðum ljósmyndara með næmi fyrir samspili ljósi og skugga og andstæðum lita í umhverfinu.

Þessi mynd hér til hliðar ofan af Hellisheiði nærri sólarhádegi í dag er einmitt af þeim toga að mínu mati.

 

6 -11 daga spá, 9 til 14. nóvember.

Komið er að langtímaspánni elleftu vikuna í haust og haldið verður áfram til jóla.   Áfram er að sjá frekar milt veður og mun meira af suðlægum vindi framan af, en síðan tekur norðaustanátt yfir.         

Veðurspá fram á komandi miðvikudag má sjá hér á vef VÍ

Miðvikudagur 9. nóvember:

Sunnan- og síðar suðvestanátt í kjölfar skila sem spáð er norðaustur um landið.   Lægð á Grænlandshafi.  Úrkomusamt sunnan- og vestanlands.

Fimmtudagur 10. nóvember:

Lægðardrag af einhverju tagi fer yfir landið og vindur verður SA-stæður, sennilega nokkuð hvass.  Rigning, a.m.k. um tíma, einkum sunnanlands.

Föstudagur 11. nóvember: 

Áfram SA-lægur vindur, hægari aftur og fremur milt í veðri. Fleiri fremur veigalitlir úrkomubakkar berast úr suðri og yfir landið. 

Laugardagur 12. nóvember:

Kólnar heldur með NA-stæðum vindi.  Hiti þó enn um sinn um eða rétt ofan frostmarks á láglendi.  Úrkoma, einkum A- og NA-lands, en léttir til suðvestanlands.

Sunnudagur 13. nóvember:

Svipað veður, en ákveðnari NA-vindur ef eitthvað er, einkum um landið norðan- og austanvert. Hægt kólnandi.

Mánudagur 14. nóvember:

Enn NA-átt.  Hæð yfir Grænlandi og uppruni loftsins verður norðlægari og við það dregur úr éljum og snjókomu.  Jafnframt rofar enn frekar til um landið sunnanvert.  Vægt frost allvíða. 

Mat á óvissu:

Þróun mála í veðrinu samkvæmt þessum spám er nokkuð einlínuleg.  Til að byrja með hláka og suðlægur vindur.  Lægðir fyrir sunnan og suðavestan land mjakast til austurs og um leið snýst vindur til NA-áttar með kólnandi veðri. Tengist hægfara framrás háloftabylgju  til austurs yfir landið og við það stígur loftþrýstingur við Grænland.  Óvissan tengist helst því hvenær þessi umskipt verða á spátímanum og eins hve hratt þau ganga fyrir sig.  Einnig vefst spá um úrkomu nokkuð fyrir mér eftir að vindur er kominn út í NA.  Þar getur skipt alveg í tvö horn, allt eftir uppruna loftsins.   

Sjógangur gengur loks niður.

Nú hefur verið ríkjandi samfellt NA hvassvirði og stormur úti fyrir vestanverðu Norðurlandi frá því á laugardag (29. október).  Sjá má t.d. mældan vind af vef VÍ á Gjögurflugvelli hér til hliðar. Þar hefur veðurhæðin verið stöðug á milli 15 og 20 m/s alla þessa fimm daga (neðri línan), framan af NA-átt og síðar nánast hánorðan. En nú er sem sé farið að ganga niður eins og vel sést.

Í hafinu norður undan verður gríðarmikill sjógangur þegar blæs af þessum styrk látlaust í marga daga og vindurinn að sama skapi stefnufastur.  Höfum líka hugfast að þar er enn meiri veðurhæð og blásiðaf a.m.k. stormstyrk lengst af eða um 21 til 25 m/s.  

Jón G. Guðjónsson veðurathugunarmaður í Litlu-Ávík rétt innan Gjögurs metur sjólagið og færir í veðurskeyti sín sem send eru Veðurstofunni.  Ég sé að hann hann hefur sagt "mikill sjór" í skeytunum alveg frá því á sunnudagskvöld og "stórsjór" um tíma í gær og fram á liðna nótt.   Stórsjór er þegar meðalhæð hinna stærri aldna er 6-9 m. Næsta stig þar fyrir ofan og kemur tiltölulega sjaldan fyrir í athugunum á sjólagi er hafrót.  Þá er ölduhæð álitin vera 9-14 m. 

Í miklu N- og NA-óveðri 25. október 2008, gaf Jón upp hafrót í athugunum þess dags.  Sjógangurinn þá varði þá ekki svona lengi og nú. Þá urðu talsverðar skemmdir á hafnarmannvirkjum norðanlands, m.a. á bryggjunni á Gjögri.  Einnig var eftir því tekið að rekaviður á Ströndum kastaðist langt upp á land í þessu sama veðri.

Á vef Jóns G. Guðjónssonar fékk ég myndina og er hún úr safni hans.  Þar er m.a. að frétta að ekki hefur verið hægt að fljúga norður í Árnashrepp frá 24. október og vegurinn tepptur vegna snjóa frá því í byrjun þess hrets sem nú sér vissulega fyrir endann á.

Sjólagstafla Veðurstofunnar.  Sjá meira um sjólag hér.

 

Þröskuldar

Blaðamaður af hinu ágæta blaði Bæjarins Besta hafði samband við mig vegna vegarins yfir Þröskulda frá Reykhólasveit yfir í Steingrímsfjörð. Vegurinn er hefur nú verið ófær frá á sunnudag og snjómokstur tilgangslítill á meðan ekki lægir. Áður en lagning þessa fjallvegar var ákveðin, en hann styttir leiðina verulega á Hólmavík og vestur í Djúp,  var komið fyrir tveimur vindmælum á Tröllatunguheiði.  Mælarnir voru settir nærri gamla veginum enn hann þótti ótækt að byggja upp varanlega, m.a. vegna þess hve hátt hann fer. Nýi vegurinn liggur nærri dalbotninum.

Vindmælingarnar á Tröllutunguheiði 1997-1999 gefa athyglisverða mynd af vindafarinu.  Samanburður veturinn 1998-1999 leiðir þannig í ljós á Tröllatunguheiði var vindur 15 m/s eða meiri í 15% mælingatímans á meðan Steingrímsfjarðarheiði hafði 10% og Holtavörðuheiði 9%.  Nú eiga menn kannski ekki að horfa blint á þessar tölur enda aðeins um einn vetur að ræða og hann meira að segja með slitróttar mælingar.  En hlutfallið á milli Trölltunguheiðar og hinna mælistöðvanna er verulegt og þó svo að vindur kunni að vera minni (þarf þó ekki að vera) neðar þar sem núverandi stöð er við veginn um Þröskulda.  Henni var komið fyrir árið 2009 og svo sem ekki tiltökumál að endurtaka samanburð við Steingrímsfjarðarheiði þaðan sem vindmælingar eru fyrirliggjandi frá 1995. 

Sérstakir áhugamenn geta nálgast skýrslu Veðurstofunnar um vindmælingar á Tröllatunguheiði hér. 

En upphaf þessa pistils átti nú að vera það sem BB hafði eftir mér um þennan nýjasta fjallveg okkar og fer það hér: 

Einar Sveinbjörnsson, veðurfræðingur, segir að aðalástæðan sé sú að vegurinn um Þröskulda liggur samsíða aðal óveðursáttinni sem er norðaustanáttin. „Þegar um er að ræða lausasnjó og vind samsíða akstursstefnu sjá ökumenn harla lítið, það fer allt í kóf fyrir framan bílinn,“ segir Einar.

„Hins vegar á vegum eins og Steingrímsfjarðarheiði þar sem NA-vindurinn kemur þvert á veginn á löngum köflum, verður skyggnið ekki eins slæmt og ökumenn sjá mun betur. Veglínan er nokkur veginn samsíða vindinum þegar hann er af norðaustan eins og nú er, nánast alla leiðina um Arnkötludal og Gautsdal. Í Gautsdal eru aðstæður jafnvel verri því um leið og skjól fæst þeim megin Þröskulda sest fönnin þar til í skafla.“

Aðspurður segist Einar ekki geta svarað um það hvort lega vegarins valdi því að hann sé ófær eins oft og raun ber vitni. „Það getur vel verið að aðstæður í landslaginu, þar sem Arnkötludalur og Gautsdalur koma saman efst á heiðinni, valdi svokölluðum trektaráhrifum sem gerir það að verkum að vindurinn magnast enn frekar efst uppi með tilheyrandi kófi þegar lausamjöll er í umhverfinu. Ég viðurkenni þó að ég hef ekki skoðað þetta neitt náið, en þar kemur m.a. inn á nákvæma veghönnum sem er ekki mín deild. Ég veit þó fyrir víst að það var tekið tillit til snjósöfnunar og vindafars við hönnun vegarins, en við breytum ekki landinu. Norðaustanáttin er aðal snjókomuáttin og helst að verði óveður við þau skilyrði. Erfitt er að koma veginum öðruvísi fyrir en hann liggur SV/NA og þar með eftir eða á móti vindinum með meira kófi og blindu en annars væri,“ segir Einar.

Jón Hörður Elíasson rekstrarstjóri Vegagerðarinnar á Hólmavík þekkir þetta vel.  Hann sagði við Bæjarins Besta í byrjun nóvember í fyrra:

"Erfitt að meta hvort vegurinn yfir Þröskulda sé meira ófær en upphaflega var gert ráð fyrir enda ekki mikil reynsla komin á hann.Þegar vindur er úr norðaustri, þá gerir mjög vont veður vestanmegin heiðarinnar eða fram í Gautsdal. Að mínu viti liggur vegurinn alltof lágt í landinu miðað aðstæður og það á stóran þátt í því að hve hratt hann teppist. Við hækkuðum hann á þeim stöðum þar sem við vissum að yrði snjóþungt og sums staðar um meira en einn metra, en það hefur greinilega ekki verið nóg og þyrfti að vera meira“

 

 

6-11 daga spár - yfirferð (9)

Skoðun á langtíma spánni fyrir liðna helgi og gefin var út 21. október fylgir hér. Til að byrja með eru spárnar ágætar, en drægnin minnkar síðan eftir því sem líður á tímabilið. 

Matskvarðinn sem stuðst er við er hér einnig og kortin eru fengin af vef Veðurstofunnar.

3 stig. Spáin gekk eftir í öllum aðalatriðum.  Á það við um stöðu veðurkerfa, vindátt á landinu og einnig þann breytileika veðurs eftir landshlutum sem spáin gat til.  

2 stig. Spá gekk eftir að sumu leyti, en öðru ekki.  Staða veðurkerfa er a.m.k. í áttina og hitafar með þeim hætti sem spáin gaf til kynna.  Vindátt var e.t.v. ekki sú sama eða greinileg tímahliðrun veðurkerfa. 

1 stig. Ekki hægt að segja að spáin hafi ræst og flest með öðrum hætti, en þó a.m.k. einn tilgreindur veðurþáttur eitthvað í áttina (staða kerfa, vindátt, hiti eða úrkoma).

0 stig. Veður nánast alger andstæða spárinnar að flestu eða öllu leyti. 

Miðvikudagur 26. október:

Hægfara lægð djúpt sunnan og suðvestan við landið beinir til okkar mildi og röku lofti.  Talsverð úrkoma SA-lands, en að mestu þurrt norðanlands og á Vestfjörðum.

Góð spá, sama hvernig litið er á. Lægðasvæðið á réttum stað og þar með vindáttin. Milt í veðri og talað um talsverða úrkomu suðaustanlands. Það gekk eftir að mestu.  3 stig.

 

 

 

 

 

 

 

 

Fimmtudagur 27. október:

Svipað veður og áfram SA-átt með hlýindum miðaða við árstíma.  Heldur þurrara í bili a.m.k. á landinu.

Frekar NA-átt heldur en á SA eins og spáin gerði ráð fyrir. Sæmilega hlýtt þó og eins var úrkoman orðin snöggtum minni.  2 stig hér, en vantar upp á rétta vindátt.

 

 

 

 

 

 

 

Föstudagur 28. október: 

Enn lægðir fyrir sunnan land ásamt voldugu háþrýstisvæði yfir Skandinavíu og fremur milt í veðri.  Úrkomsvæði fara þess dagana til norðurs eitt af öðru yfir austanvert landið.  

Allt stóðs hér í megindráttum.  Hæðin enn yfir Skandinavíu, meginlægðin fyrir sunnan land og læðgardrög hvert af öðru yfir austanver landið eða því sem næst.  Erfitt held ég að komast öllu nær. 3 stig.

 

 

 

 

 

 

 

Laugardagur 29. og sunnudagur 30. október :

Lægðin nálgast heldur úr suðri.  A- eða SA-átt er líklegust og sennilega strekkingsvindur a.m.k. um tíma.  Úrkoma, rigning víða um land.  Síður þó suðvestan- og vestanlands. 

Stóra myndin er ótrúlega nákvæm. Sjá má á veðurkortunum að lægðin nálgaðist vissulega. Skil með talsverðri úrkomu fóru síðan yfir landið aðfararnótt sunnudag. Segja má að úrkoman hafi síður verið á laugardag vestanlands og 3 stig þá. 

 

 

 

 

 

 

 

Á sunnudag var úrkoma talsverð um land allt svo að segja.  Eins  snerist vindur meira til NA-áttar og verulegt úrkomumagn norðanlands sumstaðar.  Sanngjarnt væri því að gefa 1-2 stig hér og við höfum það 1 stig.

 

 

 

 

 

 

 

Mánudagur 31. október:

Enn er sennilegt að loft berist til landsins sunnan úr Atlantshafi.  Lægðir á ný á Grænlandshafi og vindáttin því heldur suðlægari en dagana á undan.  Enn úrkomusamt, einkum um landið sunnanvert.

Engar lægðir á Grænlandshafi og vindur þaðan af síður suðlægari en dagana á undan.  Öðru nær, N- eða NA-átt og með kólnandi veðri og ofanhríða norðan- og norðvestantil.  Vond spá, en samt alveg út í hött. Samt sem áður 0 stig. 

 

 

 

 

 

 

Niðurstaða:  Samtals fást 12 stig af 18 mögulegum sem gerir þessa níundu veðurspá eina þá bestu til þessa samantekið fyrir tímabilið allt. Spádrægnin reyndist vera um 9 dagar, en eftir það var veðurspáin frekar ósannfærandi.  Á sínum tíma var í vangaveltum með mati á óvissu bent á tvær líklega leiðir í þróininni og segja má að "hin" leiðin hafi orðið ofan á !

Nor'easter

Hríðarveðrið snemmbúna við austurströnd Bandaríkjanna er sýnis mér af dæmigerðri tegund sem Kaninn kallar Nor'easter og getur kallast upp á Íslensku; NA-hvellur. Lægð kemur askvaðandi norður með Austurströndinni á sama tíma er meginlandið kalt og þetta haustið hafði kólnað ákveðið í lofti með næturfrosti alveg suður í Virginíu, í það minnsta síðustu daga fyrir helgi.  Lægðin ber með sér gríðarmikinn raka af Atlantshafinu og þegar þetta raka loft flæðir yfir það kaldara á meginlandinu og blandast að hluta fellur úrkoman sem snjór. Úrkomumagnið getur orðið verulegt og nokkur dæmi frá síðustu 150 árum að New York borg hafi bókstaflega fennt í kaf í mestu NA-hvellum þessarar gerðar, en þá um hávetur.

Litla kortið sýnir dæmi um afstöðu lægða og helstu loftmassa á þessum slóðum, reyndar frá fyrr tíð.  Óveður þessarar gerðar eru hvert öðru lík og oftast aðeins spurning hvar með ströndinni slái til hverju sinni og eins hvort úrkoman verði slydda eða snjór við sjávarmál þar sem líka er þéttbýlast.  

Við sjáum á meðfylgjandi ákomukorti af vef NY Times að áætluð snjódýpt er allt að um 1/2 m inn til landsins í Massachusetts og New Hampshire. 

Vandinn sem menn glíma m.a. við er sá að tré, einkum lauftré sligast undan snjónum sem oftar en ekki hefur verið blautur og þungur.  Myndin er frá Glastonbury í Connecticut og dæmigert hvernig tré sem ekki hefur misst laufið sligast og brotnar yfir raflínu með tilheyrandi straumrofi. Þessi staður er ekki í nema mesta lagi 150 metra hæð yfir sjávarmáli. (Ljósm: Jessica Hill /AP)

Ég fjallaði um veður svipaðrar gerðar vorið 2007 og þá þóttust menn þá vestra heppnir að fá það svo seint, en ekki um miðjan vetur.

 

Verður opnað í Hlíðarfjalli um næstu helgi ?

Um þetta leyti árs þegar gerir NA-átt með úrkomu, sést gjarnan skörp snjólína til fjalla norðanlands.

Frá því í gær er búið að rigna talsvert á Norðurlandi, einkum þó út með Eyjafirðinum.  Frostmarkshæðin er í um 400 metra hæð og það þýðir að ofan um 350 metra hæðar í fjöllunum setur niður mikinn snjó á meðan að rignir á láglendi.  Eins og menn vita festir snjó þó hiti sé aðeins yfir frostmarki og þannig verður til þessi tala 350 metrar, en vel að merkja er hún bara mín áætlun út frá hitamælingum, en ekki bein athugun.

Í nótt var mældist úrkoma á þessum slóðum víða sums staðar 20-30 mm, en engu að síður var hún nokkuð breytileg eftir stöðum þar sem uppstreymið við fjöllin bæði eykur á úrkomumagnið á meðan annars staðar verða skuggaáhrif þessara sömu fjalla.   Kortaklippan hér er af vef Veðurstofunnar og sýnir sólarhringsúrkomu við uppgjör kl. 09 í morgun.

Spáin hljóðar líka upp á talsverða úrkomu næstu dægrin.  Spáritið hér fyrir Akureyri gefur til kynna að dragi úr magninu á morgun, en síðan aftur skot á þriðjudaginn og þá uppsafnað um og yfir 25 mm yfir daginn eða u.þ.b. 20 -25 sm í jafnföllnum snjó.  Síðan dregur heldur úr skv. spánni og styttir upp að mestu á fimmtudag.

Skíðasvæðið í Hlíðarfjalli er allt ofan 500 metra hæðar og því áleitin spurning hvort ekki verði kominn nægjanlegur "náttúrulegur" snjór í brekkurnar eða sumar þeirra a.m.k. í vikulokin ? 

6 - 11 daga spá, 2. til 7. nóvember

Áfram skal haldið með langtímaspárnar og nú er spátíminn kominn fram í nóvember.  Útlit er fyrir frekar milda daga, en vætusama.         

Veðurspá fram á komandi miðvikudag má sjá hér á vef VÍ

Miðvikudagur 2. nóvember:

Djúp og víðáttumikil lægð verður langt suður í hafi.  Vaxandi NA-átt á landinu og fer að rigna sunnan- og suðaustanlands þegar frá líður.

Fimmtudagur 3. nóvember:

Hitaskil með talsverðri rigningu fara norður eða norðvestur yfir landið með tiltölulega mildu veðri.  SA-átt, fremur hæg en líkast til hvöss NA-átt á Vestfjörðum og þar um slóðir.

Föstudagur 4. nóvember: 

Enn lægð eða afsprengi lægðar viðloðandi suðvestanvert landið.  Vindáttin A-læg eða SA-læg og milt á landinu.  Líklega frostlaust upp úr öllu.  Úrkomusamt eystra, en síður annars staðar.

Laugardagur 5. nóvember:

Nokkur hitastigull líklegur yfir landinu til austurs.  Því milt austantil, en svalara vestantil.  Frostlaust þó á láglendi við þessar aðstæður.  Einhver úrkoma í flestum landshlutum.  Vindátt S-læg eða þá tvíátta á landinu og strekkingsvindur ef af líkum lætur.

Sunnudagur 6. nóvember:

Útlit fyrir fremur aðgerðarlítið veður og hægt kólnandi.  Lægðasvæði á Atlantshafi suður- og suðvesturundan.  Vindátt því á milli S og A.

Mánudagur 7. nóvember:

Upp úr þessu nálgast vaxandi lægð landið úr suðvestri með hvassri SA-átt og slagviðri.  Þessi væntanlega lægð gæti svo sem allt eins bankað upp á degi fyrr, þ.e. á sunnudag.

Mat á óvissu:

Nokkuð góður samhljómur er í reiknuðum spám í dag fram á föstudag, jafnvel laugardag.  Ekki  svo mikill breytileiki heldur í keyrslum klasaspánna þessa fyrstu þrjá daga spátímans.  En..... eftir það springur allt í loft upp og niðurstaðan verður út og suður og ekkert á henni byggjandi.  Ég reyni þess í stað að draga upp trúverðugt framhald, meira út frá hyggjuviti og reynslu.  Verður að koma í ljós hvort gengur eftir og er vitanlega nokkuð háð því að spáin fyrstu þrjá daganna rætist í aðalatriðum.