Kröfugur skotvindurinn og hann langt í suðri

Meginháloftavindurinn eða skotvindurinn með sinn kjarna í 7 til 9 km hæð segir mikið til um stóru drætti veðurlagsin á okkar slóðum. 

Þegar hann liggur hér nærri er það líka ávísun á lægðagang með úrkomu.  Þeim mun meiri sem röstin er þess líklegra er að lægðirnar fari hratt yfir og stundum fylgir dýpt lægðanna styrk rastarinnar eða skotvindsins.  Kannski frekar lögun hans eða beygjur og sveigjur sem ráða meiru um dýpt lægðanna eða það sem við veðurfræðingarnari köllum fremur drög og hryggi í bylgjumynstri háloftarastarinnar.

Á meðfylgjandi spákorti HIRLAM sem gildir kl. 00 á miðvikudag er röstin  mikilúðleg að sjá og hún hefur nánast beina stefnu frá austri til vesturs.  Þær ganga líka óveðurslægðirnar hver á  fætur annarri inn yfir N-Evrópu og síðar í vikunni kannski frekar yfir Mið-Evrópu þar sem þær hitta Frakkland fyrir úr vestri.

Ein stefnir á Skotland í fyrramálið, sú næsta á Bretagne skaga á fimmtudag. Báðar eru þessar lægðir líklegar til að valda tjóni vegna veðurhæðar.  En síðan gæti orðið breyting á skotvindinum sem fróðlegt verður að fylgjast með !  Sumar reiknaðar spár gera ráð fyrir því að hann skjóti upp hrygg úti á miðju Atlantshafinu og jafnvel klofni í jölfarið með ófyrirséðum afleiðingum fyrir veður og vinda á gríðarstóru svæði á milli N-Ameríku ag Evrópu, frá Azoreyjum og norður fyrir Ísland.  

Hlýnar hér svo um munar eða heldur kuldahrammurinn landinu í sinni heljargreip jafnvel fram yfir jól.  Koma óveðurslægðirnar á áttina til Íslands með illviðrum og fantaskap eða hvað ?  Breytingar eru meira en líklegar um og upp úr næstu helgi eða undir vetrarsólstöður sem verða 22. desember í ár. 

 

Athugasemdir

[Sigfús Bergmann Svavarsson (IP-tala skráð) 13.12.2011 kl. 20:12]

Hæ og takk fyrir góðan og skemmtilegan vef.  Ég velti fyrir mér, þegar ég var yngri og fram undir síðustu ár fóru lægðirnar upp með vesturlandi með tilheyrandi vestanátt hjá okkur (bý á suðvesturlandi) en nún virðast allar lægðir meira og minna fara langt fyrir sunnan land, jafnvel svo sterkar að líkja má við fellibyl.  Hvernig stendur á þessu?

Kveðja,
Sigfús

[Einar Sveinbjörnsson, 14.12.2011 kl. 00:52]

Þær fara alls ekki allar lægðirnar til austurs langt fyrir sunnan land Sigfús !

Í fyrravetur var talsvert um SV-áttir og lægðagang um Grænlandssund.  En vitanlega eru í þessu sveiflur eins og gefur að skilja. 

ESv