Stormspá 25. jan 2010

Veðurstofan spáir veðurhæð allt að 23 m/s á öllum spásvæðum nema Suðausturlandi í nótt og á morgun. Lægðinni sem nú stefnir hraðbyri í áttina til okkar fylgir mikil háloftavindröst sem slengist niður til jarðar með S- og SSA-átt.  Lægðinni er öllu heldur spáð til norðurs skammt fyrir vestan landið og verður hún í talsverðum vexti á meðan hún fer hér hjá.  Spákort Veðurstofunnar (HIRLAM 24011800 +12t) sýnir stöðuna eins og henni er spáð kl. sex í fyrramálið.

Af fyrri reynslu þekkir maður það vel að norðan í fjöllum verður hvað hvassast í þessari stöðu.  Fjallgarðar sem liggja þvert á vindstefnuna eiga stóran þátt í því að keyra niður vindorkuna.  Þeir staðir þar maður veit að verulega hvasst og skeinuhætt verður eru þessir:

1. Norðanvert Snæfellsnes, frá Hellissandi og inn fyrir Stykkishólm á Skógarströndina.  Seint í nótt og snemma í fyrramálið, (til svona sjö til níu) verður hvassast og vindhviður geta hæglega farið í 40-50 m/s.

2. Skagafjörðurinn vestanverður, frá Mælifelli og út fyrir Sauðárkrók getur orðið æði hvasst við þessi skilyrði frá því um kl. sex í fyrramáli og  fram undir hádegi.

3. Mjög skiptivindasamt í Fljótum og á Siglufjarðarvegi, sérstakalega við Sauðanes, þar sem hnútarnir geta orðið allsvakalegir í þeirri mildu S-átt sem spáð er fyrri partinn á morgun.

4. Um austanvert landið eru það Vopnafjörður og Fáskrúðsfjörður innanverður sem helst eru í kastljósi vinda ofan af fjöllum og bora sig niður til yfirborðs.  Einna hvassast þar um miðjan daginn á morgun, í þann mund sem skil lægðarinnar ganga austur af landinu.

Þetta er eins og gefur að skilja ekki endanleg upptalning. 

Reykjavík er líka nokkuð "opin" fyrir SSA-átt og kæmi mér alls ekki á óvart að meiri vindur mældist þar seint í nótt, heldur var hér fyrir helgi í A-storminum. 

Athugasemdir

[Sigríður (IP-tala skráð) 25.1.2010 kl. 13:52]

Það er nú heldur verra hér núna en var í morgun mikið hviðóttara   tek mið af vindi á Kolgrafarbrúnni  en þar eru núna 27 m/s  mjög svo ónotalegt veður

[Hjalti Már (IP-tala skráð) 26.1.2010 kl. 01:18]

Fer ekki að styttast í snjókomu á þessu landi, það vantar snjó og það mikið af honum, sleða, skíða, jeppa, göngu og allir sem elska snjó eru orðnir frekar óþreyjufullir, hvað segja veðurguðirnir með framhaldið, verður bara lokað í Bláfjöllum þetta seasonið ???????????''

kv. HMB

[Þorkell Guðbrands (IP-tala skráð) 26.1.2010 kl. 08:43]

Firringin er komin á athyglisvert stig þegar fólk er farið að óska eftir snjó. Einhvernveginn finnst manni að þegar fólk er farið að óska eftir snjóalögum, svo það getið "leikið sér" á vélknúnum tækjum eins og vélsleðum og risajeppum, sé orðið eitthvað mikið að. Meðan rætt er um hættuleg áhrif koldíoxíðs í andrúmsloftinu, erum við að stuðla að aukningu þess með því að nota í algjöru tilgangsleysi öðru en að "skemmta sér" tæki, sem eru sérlega illskeytt með framleiðslu á óæskilegum lofttegundum og mikilli notkun jarðefnaeldsneytis umfram það sem hægt er að komast af með við að komast frá A til B. Skíðaiðkun er aftur á móti af hinu góðu og ekkert nema gott um hana að segja.