Sólin farin að verma

Jafnvel á ísköldum degi eins og í dag finnur maður að sólin er farin að verma yfirborðið.  Þetta sést glöggt á veghitamælingum Vegagerðarinnar þar sem snjór og klaki er ekki til staðar, eins og til að mynda á Sandskeiði.

Dægursveiflan er mikil, frá -12°C í -4°C um kl. 15 þegar vegyfirborðið varð hvað "heitast".  Þess má geta að snemma í morgun var nánast logn og því hitahvarf við jörðu á meðan það blés ákveðið um miðjan daginn.  Dægursveiflan er samt staðreynd.  Þegar sól er í hádegisstað um kl. 13:30 er sólarhæðin 15 til 16° á suðurhimninum þessa dagana. Sú sólarhæð er næg til að upphitun yfirborðs verði merkjanleg þar sem endurkast er lítið eins og raunin er með þurra vegklæðninguna.

Sólarhæðin er undir 10° frá um 10. nóvember fram yfir mánaðarmótin janúar/febrúar.  Þá er óhætt að segja að geislun sólarinnar hafi enga þýðingu fyrir varmahag yfirborðsins.   

Athugasemdir

[Ari (IP-tala skráð) 23.2.2010 kl. 23:57]

Oft gott að nota þessa síðu til að sjá sólarupprás og setur, hádegisstöðu o.fl.

http://www.timeanddate.com/worldclock/astronomy.html?n=211&month=2&year=2010&obj=sun&afl=-11&day=1

Þessi er líka góð

http://www.gaisma.com/en/location/reykjavik.html

[Arinbjörn Kúld, 23.2.2010 kl. 23:57]

Blessuð sólin. Takk fyrir þennan fróðleik.

Kveðja að norðan.