Mýrdalsjökull sótsvartur

 

 

Á þessari MODIS-mynd frá því í gær, 11. ágúst, er verið að leika sér með styrk tiltekinna bylgjusviða.  Við getum sagt að myndin sé grænblá.  Þarna er tilteknum bylgjuböndum ljóssins raðað saman með það að markmiði að greina gróður frá auðnum.  Eins koma vötn og tærleiki vatna vel fram sem og svæði sem þakin eru ís.  Megintilgangur þessara mynda að sögn MODIS er þó sá að greina svæði sem hafa orðið eldi að bráð eða þær eru gagnlegt hjálpartæki í glímunni við gróðurelda sem geysa jafnan einhvers staðar á jörðinni.

Lítið var um ský yfir stórum hluta landsins í gær og því má greina eitt og annað á þessari ágætu mynd.

1.  Mýrdalsjökull er nær alveg hulinn gosefnum úr Eyjafjallajökli.  Ekki glittir í ís nema í jöðrunum að norðan- og austanverðu.  Sama á vitanlega við um Eyjafjallajökul.

2.  Jökulísinn á sporðum margra skriðjökla virðast vera vatnssósa ef marka má rauðan lit sem kemur fram, eða hinn sama og greinir jökullitað Þórisvatnið og Hálslón frá umhverfi sínu.  Meira að segja virðist sem vatn standi uppi efst á Langjökli norðanverðum.  Vitanlega er varasamt að túlka myndir sem þessa alveg niður í smæstu drætti, en vissulega eru þarna ágætar vísbendingar.

3.  Takið eftir litnum á vatninu við útfall Ölfusár og Þjórsár.  Jökulliturinn er greinilegur í kjarna út frá ósnum og þar úti fyrir er svörunin sú sama og frá Þingvallavatni, Öskjuvatni og Mývatni.  Ferska vatnið greinir sig með öðrum orðum frá fullsöltum sjónum úti fyrir.  Svipað má sjá í Eyjafirði og innanverðum Skjálfanda svo og úti fyrir Hornafirði. 

Athugasemdir

[Emil Hannes Valgeirsson, 12.8.2010 kl. 10:13]

Flott mynd. Ég hef velt fyrir mér hvort nokkuð bráðni í sumar á efri hlutum Mýrdals- og Eyjafjallajökuls þar sem þeir eru algerlega huldir ösku og hvort jöklabúskapur þar gæti orðið jákvæður í heildina. Askan ætti hinsvegar að auka á bráðnun á öðrum jöklum sem hafa bara óhreinkast af ösku.

[Jón Logi (IP-tala skráð) 12.8.2010 kl. 10:42]

Ég er búinn að skoða Eyjafjallajökul nokkuð oft úr lofti. Askan þar ofan til er of þykk til að sólarylur hiti ísinn undir.

Það mun kannski breytast þegar af honum skefur, og svo er til skallablettur og svo hálf-grá ísgil.

Þetta er mikil jafna til að reikna, og ekki verður hún einfaldari þegar haustar.

Verður askan að lagi sem fer undir vetrarís? Eða skolast hún niður með úrkomu eða þiðnun? Mun hún valda þiðnun með því að grípa sólarorkuna í gegn um þunnt snjó/ís lag?

Þetta munum við sjá í vetur...kannski. Því kannski gýs meira.

Gaman væri þó að sjá