Eins og í gamla daga !

4.2.2011

Eins og í gamla daga !

Þegar þetta er skrifað laust eftir kl. 20 hefur kyngt niður snjónum á Höfuðborgarsvæðinu. Nánast samfelld ofankoma frá því upp úr kl.17. Éljaklakkarnir fyrir suðvestan landið þéttu raðir sínar síðdegis og mynduðu nánast samfelldan bakka og hann má sjá á meðfylgjandi og ágætri tunglmynd frá kl. 18:39 (Dundee). Mín fyrsta hugsun þegar ég barði þessa mynd var sú að þetta væri eins og í gamla daga, þegar háloftkuldi barst úr vestri af miklum móð með grimmum éljum og skörpum dráttum éljaskýjanna.

Vel má sjá þennan éljagarð og myndin, veðurathuganir og minningar frá svipaðri stöðu fyrir alllöngu segir manni að talsvert eigi eftir að snjóa áfram á meðan á þessu varir. Á það ber einnig að líta að það er ekki ákveðin SV-átt á bak við éljagarðinn og reyndar SA-átt nærði yfirborði. Það er því engin ógnarhreyfing á þessu eins og er.

Þess má geta í framhjáhlaupi að flesta reiknaðar spár virðast að mestu vera úti að aka með þessa þróun og líka þær nýjustu sem komu eftir hádegi. Svona veður með úrkomu á smærri millikvarða í köldu lofti þar sem áhrifa Grænlands á hina stóru mynd gætir mjög, er nokkuð sem líkönin ráða verr við en margar af hinum hefðbundnari veðurstöðum.

Flokkur: Veðuratburðir hér og nú | Facebook

Athugasemdir

Magnað. Hér hjá okkur er búið að vera hið fríðasta vetrarveður í allan dag, sólskin og bjart meðan sólar naut, en núna er léttskýjað (3/8 hula) og stjörnubjart. Engin norðurljós sá ég þó þegar ég var að taka veðrið áðan.

Þorkell Guðbrands (IP-tala skráð) 4.2.2011 kl. 22:16

Veðrið í dag hefur líka minnt mig á fyrri ár eða 1970 - 90. Hvöss SA átt með köflum og blind bylur. Ekki einu sinni bloti.

Óskar J. Sigurðsson (IP-tala skráð) 4.2.2011 kl. 23:14

Kannski eru að verða alvöru kaflaskipti.

Sigurður Þór Guðjónsson, 4.2.2011 kl. 23:44

Þetta er einfaldlega það sem er að gerast út um allann heim, úrhellisrigningar hér og þar, fellibyljir annarstaðar, flóð ofan í flóð um allann heim, jarðskjálftar á víð og dreif, eldgos á stöku stað, en ekkert heyrist um þurka neinstaðar aldrei þessu vant!!!

Er eitthvað að gerast á jarðskorpunni sem ekki er vanalegt?

Guðmundur Júlíusson, 5.2.2011 kl. 00:35