SV-átt upp úr öllu

Þeir eru víst margir sem búnir eru orðnir hundleiðir á þessari endalausu og þrálátu SV-átt, belgingnum og óstöðugu veðri sem henni hafa fylgt.  Óveðrið í nótt var af þessari tegund.  Nokkuð djúp lægð fór norðaustur um Grænalandsund og á eftir henni hali eða lægðardrag sem haldið hefur við svipaðri vindátt í dag, þó svo að styrkurinn hafi heldur gefið eftir.

Meðfylgjandi kort sýnir staðsetningu skotvindsins kl. 06 í morgun (ECMWF 0,125 spá af Brunni VÍ).  Við sjáum að kjarni hans lá svo að segja beint yfir landinu.  Styrkurinn er gefinn upp í hnútum og jafngildir mesti vindurinn þarna upp í tæplega 9 km hæð um 85 m/s.  

Óveðrið niðri tengist tvímælalaust þessari stöðu og veðurhæðin skýrist af því að að mikill hitastigull er  frá norðvestri til suðaustri í öllum hæðum.  Stefnufesta vindsins er mikil frá yfirborði og upp í þessa hæð. Það má sjá m.a. þegar rýnt er í mælingar háloftbelgs sem sleppt var í hádeginu í dag líkt og aðra daga á Egilsstöðum. 

Skarpt hitahvarf var í rúmlega 2.000 metra hæð og ofan þess hafði styrkur vindsins þegar náð 50-60 m/s.  

Veður eins og þetta flokkast í óveðrakerfi Trausta Jónssonar til meginrastarveðurs.  Það felur í sér að háloftaröstin eða skotvindurinn á beinan átt í veðurhæðinni nærri yfirborði jarðar, öfugt við lágrastarveður (t.d. flest NA- og A-veður) þar sem snúningur vinds er greinilegur með hæð eða riðaveður svo notað sé orðfæri Trausta til að lýsa ólíkum gerðum óveðra. 

Góðu fréttirnar í dag eru hins vegar þær að á morgun verður stund milli stríða þega kjarni skotvindsins gefur eftir og hörfar til norðurs.  Það stendur hins vegar ekki lengi, því strax annað kvöld er aftur von á nýrri grein vindsins yfir landið með lægð vindi og úrkomu. 

Hvenær lýkur þessari tíð, er sú spurning sem ómar um allt þar sem ég fer þessa dagana !!

Athugasemdir

[Bjarni Gunnlaugur (IP-tala skráð) 12.3.2012 kl. 00:47]

Getur við í raun nokkuð búist við að hér vori almennilega, fyrr en að snjóa tekur að leysa í Kanada.Þangað til hlýtur "framleiðsla" kaldra loftmassa að verða til þess að við fáum a.m.k. hryssingsleg élja/skúra vor, eða hvað?

(Hér er semsé verið að spá í upptöku Kanada-snævar en ekki Kanada-dollars)

[Sævar Bragi (IP-tala skráð) 12.3.2012 kl. 08:44]

Þetta var svona í fyrr líka, jafnvel enn meiri snjór en nú er.  Aftur á móti var þetta ekki svona árið 2010 né áirð 2009.

Við getum því átt von á að þetta verði svona áfram og það langt fram í april, jafnvel lengur.  Munið hvernig þetta var í fyrra? 
Alla Páskana (sem reyndar voru seint það árið) var leiðinda veður og éljagnangur og hiti fór varla yfir 3 stig. 
Aftur á móti var hitabylgja í Evrópu á þessum tíma og hitinn náði allt að 30 stigum í London, sem í og Mið-Evrópu

Maí var kaldur framan af, en svo hlýnaði upp úr 10 maí en kólnaði svo aftur eftir 20. maí og var kalt fram yfir 20. júní þegar sumarið loksins kom.

Við því búast við því að þetta veðurmunstur frá því í fyrravor endurtaki sig nú í ár.

[Sigurður Þór Guðjónsson, 12.3.2012 kl. 13:08]

Ekki kvarta ég yfir veðrinu undanfarið. Það er hávetur og gæti verið miklu verra, t.d. harðar norðanáttir og frosthörkur. Veðrið í febrúar og það sem af er mars hefur bara verið ágætt, finns tmér,  miðað við að það er enn hávetur. Það  hefur svo ekki verið mikill snjór á landinu seinni hluta vetrar. Ekki einu sinni alhvítt núna i frægum snjóasveitum.

[Sævar Bragi (IP-tala skráð) 13.3.2012 kl. 14:23]

Rétt er það, Sigurður Þór. 

Reyndar hefur veðrið verið nokkuð milt í mars og reyndar betra heldur en í mars í fyrra þegar snjóaði látlaust vestan til á landinu.

Við þetta má svo bæta að úrkoma hefur verið nær alla daga ársins 2012.

[Sævar Bragi (IP-tala skráð) 14.3.2012 kl. 09:01]

Sá í veðurkorti hjá Danska sjónvarpinu að kalt loft fer eins og á færibandi frá pólarsvæðunum í suðurátt meðfram vesturströnd Grænlands og þaðan út á Atlantshaf.

Þetta kalda loft tekur svo beygju á sig (eins og öfugt J) og berst svo frá Atlantshafi hingað til Íslands og færir okkur köld él og vindasamt veður úr Suð-Vestri.

Á meðan á þessu stendur er nú óvenju hlýtt í Ameríkur (þar er víðast komið sumarveður) auk þess að það er farið að vora í Evrópu með 13-15 stiga hita víðast hvar.

Þetta veðurkerfi seinkar vorinu hjá okkur því búat má við því að þetta veðurkerfi haldist í óbreyttri mynd næstu vikurnar þannig að vorið í á verður ekki ósvipað vorinu í fyrra, kalt, vindasamt og úrkomusamt (tíður éljagangur). 

Aftur á móti má búast við sumarblíðu nætu vikurnar á meginlandi Evrópu þannig að ef fólk vill komast í sól og blíðu er ekkert annað að gera en að skella sér þangað, t.d. um Páskana.