Algjör umskipti til hins betra í veðrinu

Sjá roðann í austri....

Í Helsinki voru 23°C á hádegi í dag og austar, þ.e. í Rússlandi er afar hlýtt þessa dagana.  Það er að sjá að angi af þessu lofti eigi eftir að ná til okkar á Íslandi þegar líður á vikuna og hér verði því mikil umskipti í veðrinu, frá vorkuldum yfir í góð sumarhlýindi !

Maður þekkir vel heita loftmassa úr suðri og suðvestri.  Evrópuloft úr suðaustri er líka alþekkt.  En að hlýr lofmassi komi úr háaustri frá Rússlandi rakleiðis yfir miðja Skandinavíu og hingað til okkar er öllu fátíðara.  Þessum undarlegheitum veldur fyrirstöðuhæð norðaustur af landinu ásamt tilheyrandi lágþrýstisvæði yfir Bretlandseyjum.  Til samans beina þessi kerfi hlýjum meginlandsloftmassa með hreinni austanátt hingað til okkar.  

Ætli hlýi loftmassinn verði ekki kominn hingað að mestu á fimmtudagskvöld ef tölvuspárnar eru að ná þessu þokkalega.  Það verður gaman að fylgjast með hitaskilunum á tunglmyndum og hvernig þau munu æða yfir Atlantahafið frá Noregsströndum.  Vonandi sést þessi hlýja framrás eða skulum við segja innrás á tunglmyndunum seint á morgun eða á miðvikudag og mun verða greint frá því markverðasta sem ber fyrir augu hér á Veðurvaktinni.  

Veðurkortið af veðurvef mbl.is gildir kl. 18 á miðvikudag ( 28051200+54t) og sýnir mætavel þessa hlýju totu sem á uppruna sinn í austri. 

Athugasemdir

[Kári Kárason, 29.5.2007 kl. 11:08]

Sæll Einar. Í veðurfarsupplýsingum er talað um fjölda sólarklukkustunda í hverjum og einum mánuði. Hvaða forsendur þarf til að sólarstund sé skráð? Er það hálfskýjaður himinn eða minna, eða er það bara sólskin?

[Gunnar Sæmundsson (IP-tala skráð) 29.5.2007 kl. 12:07]

Vonandi er þessum vorkuldum lokið og hægt að segja ,,gleðilegt sumar". Er þetta ekki merkilegt að svona vor skuli koma ár eftir ár?

Gunnar Sæmundsson

[Þorkell G. (IP-tala skráð) 29.5.2007 kl. 15:33]

Það er þakkarvert þegar vísindamenn eru til með að deila með okkur þekkingu sinni á svona alþýðlegan og aðgengilegan hátt. Bestu þakkir  fyrir það. En Kári, svona sem fyrrum aðstoðarmaður við veðurathuganir get ég sagt þér, að mæling sólarstunda er eiginlega "concrete", þ.e. það er sett blað í sérstakan ramma, bogmyndaðan, og blaðið er kvarðað með klukkustundum dagins miðað við hnattstöðu viðkomandi staðar. Sólarljósið fellur svo í gegn um kúlulaga safngler, og brennir í sundur blaðið meðan sólin fellur á það. Blaðið segir því nákvæmlega til um hversu langan tíma sól hefur skinið á mælinn.

[Sigurður Þór Guðjónsson, 29.5.2007 kl. 17:09]

Nákvæmnin sem gefin er upp í sólskinsmælingum reyndar aðeins 6 mínútur og síðan í prentuðum skýrslum í Veðráttunni t.d. er því breytt í tíundahluta þar sem 0,1 er sama og 6 mínútur, 0,5 er hálftími en 1 rr 60 mínútur eða heil klukkustund, hin tíu bil í klukkustundunni eru sem sé 6 mínútur hvert um sig.

[Sigurjón, 30.5.2007 kl. 01:22]

Skyldi þetta vera einhver vísbending á hlýtt sumar eða bara tilviljun?