Talsvert frost næstu daga

Um leið og NA-áttina hægir, kólnar mjög í veðri.  Það er hreinræktað heimskaustloftið sem læðist nú úr norðri yfir landið og tryggir það að fram undir helgi a.m.k. verði ekkert annað er vetur hér um slóðir.

Á Grímsstöðum á Fjöllum var frostið orðið tæpar 9°C nú kl. 15 og þó enn nokku vindur eða 10 m/s.  Loftmassinn yfir landinu á eftir að kólna enn til mikilla muna.  Hitakortið af Morgunblaðsvefnum hér að neðan sýnir að -20°C í 850 hPa fletinum (1.200-1.400 metra hæð) nær inn á norðanvert landið.  Slíkt gerist ekki nema við köldustu skilyrði og þá gjarnan síðla vetrar.  

Því verður fróðlegt að fylgjast með frostinu næstu dagana.  Spárit fyrir Akureyri og hér fylgir með segir að kuldinn gæti náð hámarki aðfararnótt föstudagsins.  Nákvæmlega hversu kalt verður niður við jörð ræðst einkum af tveimur þáttum:

• Vindi. Í kyrru veðri er lítil blöndun og kuldinn safnast í lægðir um leið og hitahvarf við jörð myndast.
• Skýjafari.  Þar sem nær að létta vel til verður útgeislun kaldrar jarðararinnar, sérstaklega inn til landsins til þess að loftið næst jörðu kólnar enn frekar. Fyrir norðan eru líkur mestar skv. spánni hér á heiðríkju á fimmtudag/föstudag.

En leyfum okkar að spá því að frostið fari eitthvað yfir 20 stigin inn til landsins NA-til og upp undir það í stöku kuldapollum annars staðar s.s. eins og í Húsafelli og á Þingvöllum.