Meira af apríltölfræði

Greining og upplýsingagjöf Veðurstofunnar til okkar veðuráhugafólks er alltaf að batna.  Alveg er hún til fyrirmyndar taflan sem Trausti  Jónsson hefur tekið saman og sýnir ekki bara hita og frávik heldur einnig hversu lengi er búið að mæla á hverjum stað fyrir sig.

Altækt úrkomumet veðurstöðvar fyrir apríl féll, en á Kvískerjum mældist mánaðarúrkoman 523,7mm.   Eldra metið var líka þaðan, en á Kvískerjum hefur verið mælt í bráðum 50 ár.  Merkilegri tíðindi þykir mér þó úrkomumetin á Eyrarbakka og á Stórhöfða, en þar liggur yfir 100 ára gagnröð til grundvallar.  Á báðum stöðum hófust mælingar árið 1881, en á Eyrarbakka voru þær ekki alveg samfelldar framan af.  

Mér finnast öll 100 ára veðurmet (og þaðan af lengri) stórmerkileg, sama hvaða nafni þau nefnast.  

Athugasemdir

[Pálmi Freyr Óskarsson, 6.5.2009 kl. 09:43]

Sæll Einar.

Úrkomumælingar á Stórhöfða hófust árið 1924, enn voru í Vestmannaeyjakaupstað þar á undan. Svo samburður á úrkomu í 100 ár í Vestmannaeyjum er MJÖG óáræðnilegur, vegna þess að þessar 2 staðsetningar eru gjörólíkar. Á Stórhöfða er oft mikill vindur sem úrkomusafnarinn á erfitt með fanga. Enn í Vestmannabæ er lygnari vegna fjalla sem umlykur bæinn.

[Sigurður Þór Guðjónsson, 6.5.2009 kl. 09:56]

Úrkomumælingar á Stórhöfða hófust raunar í október 1921 en voru í kaupstaðnum frá 1881 til september 1921. En annars er athugasemd Pálma Freys réttmæt og þess vegna geri ég grein fyrir þessum flutningi þar sem ég segi frá úrkomumetinu á Stórhöfða á minni bloggsíðu.

[Pálmi Freyr Óskarsson, 6.5.2009 kl. 10:16]

Sæll Sigurður Þór.

Auðvitað átti ég við 1921 enn ekki 1924. Var greinilega ekki vaknaður áðan.

[Einar Sveinbjörnsson, 6.5.2009 kl. 14:14]

Gott að þið eruð báði vel vakandi !  Rétt skal vera rétt.  Talað er um að samfelldar mælingar séu frá Vestmannaeyjum frá 1881, og munur er meiri á milli kaupstaðar og Stórhöfða í úrkomu vegna þeirra vandkvæð í mælingum sem um er getið hjá Pálma, heldur en í hitamælingunum.  Þær er í það minnsta auðveldara að leiðrétta í meðaltölum eftir á þ.e. þann landfræðilega mun í hitafari sem tiltölulega auðvelt er að kortleggja.