MODIS mynd sem vert er að gaumgæfa

Þessi áhugaverða mynd var tekin af landinu og umhverfi þess miðvikudaginn 8. júlí. 

 

Við eitt og annað má staldra:

1.  Lágir bólstrarnir á Suðurlandi raða sér í garða eða múga eftir SV-hafáttinni. Þrátt fyrir háþrýstisvæði  yfir landinu og hafsvæðinu umhverfis myndaðist engu að síður dálítil hitalægð yfir miðju landinu og dró hún til sín loft af hafi úr öllum áttum.

2.  Það er nokkuð skemmtilegt bylgjumunstrið  í skýjum úti af Ólafsfirði og Eyjafirði.  Þokan er hins vegar undir þeim skýjum.  Ólík stefna bylgnanna skýrist af snúningi vindsins með hæð.

3.  Fíngerðar bylgjur og skarpur jaðar sést við Skeiðarársand.  Án þess að ég geti fullyrt nokkuð um það á Öræfajökull vafalítið þátt í þessu formi sem þarna sést.

4.  Þrír skuggar, eins og breið strik eftir strokleður sjást yfir Jökuldalnum og Möðrudalsöræfum. Við framlengingu þeirra til suðausturs, sést að þetta eru flugvélaslóðar, sem eru að dreifa úr sér.  Algengt fyrirbæri á myndum þar sem víðáttumikil háþrýstisvæði eru.

5.  Kalkþörungur litar sjóinn á Faxaflóa og á utanverðum Breiðafirði þar sem glittir niður á milli skýja.

6.  Framburður jökulfljóta er óvenjulega greinilegur í strandsjónum, meira að segja við innanverðan Eyjafjörðinn má greina jökullit og ber vott um mikla leysingu til fjalla.

7.  Snjófyrningar eru með meira móti t.a.m. í fjalllendinu beggja vegna Eyjafjarðar.  Eins er snælínan greinlega enn tiltölulega langt niðri á Brúarjökli og gamla hjarnið lítið orðið sýnilegt enn sem komið er. Þó eru greinileg slík svæði fremst á Dyngjujökli.  

 

 

Athugasemdir

[Þorkell Guðbrands (IP-tala skráð) 10.7.2009 kl. 06:24]

Staldraði við ábendingu þína varðandi snjófyrningar um mitt Norðurland. Þetta kemur heim og saman við það, sem manni sýnist hér af láglendinu. Ljósmyndir, teknar hér á þessum tíma undanfarin ár, virðast benda til hins sama. Var einnig að horfa á ljósmynd, sem tekin var í áttina að Tindastóli um þetta leyti árið 1939, en þar er nánast engar fannir að sjá. En sumarið 1939 var reyndar eitt hið hlýjasta á síðustu öld skilst mér. Annað, sem vakti athygli mína, var það að Skagafjörður er þarna nánast fullur af þoku, (sem og Eyjafjörður inn fyrir Hjalteyri og Skjálfandaflói) en bjart yfir Húnaflóa. En hvaða dökki blettur er þarna á utanverðum Eyjafirði, þetta er ekki Hrísey, er það nokkuð, mér sýnist þetta vera utar? 

[Vigfús Sigurðsson (IP-tala skráð) 10.7.2009 kl. 09:03]

Snjófyrningar í Kinnarfjöllum eru með meira móti þetta árið.  Hretin sem komu síðla vetrar voru úrkomumikil og setti mikinn snjó til fjalla.

Jökullitðað vatn er í Skagafirði en ekki Ejafirði enda rennur ekket jökulvatn þangað.

[Einar Sveinbjörnsson, 10.7.2009 kl. 10:28]

Ljósmynd þín Þorkell frá góðviðrissumrinu 1939 getur haft heimildasögulegt gildi !

Vigfús bendir réttilega á að ekkert jökulvatn renni til Eyjafjarðar.  Hins vegar eru bæði Eyjafjarðaráin, Fnjóskáin og Hörgá nokkuð skolaðar á meðan fannir er að leysa.  Sá það sjálfur með eigin augum á dögunum.  Það eitt nægir til að framkalla smá lit á myndinni.  Síðan er vitanlaega Gleráin um Akureyri hálfgert jökulvatn að sjá.

ESv 

[Sigurður Þór Guðjónsson, 10.7.2009 kl. 11:49]

Ljósmynd Þorkells frá 1939 ætti endilega að birtast á netinu. Það er hægt að skanna hana fyrst inn á tölvu og koma henni svo á netið með einhverjum ráðum, t.d. á þessari bloggsíðu.

[Þorkell Guðbrands (IP-tala skráð) 10.7.2009 kl. 16:13]

Skal athuga þetta með myndina, ég reyndar á hana ekki sjálfur. hún er tekin af Vigfúsi Sigurgeirssyni þetta sumar, hann kom hingað og tók fjölda mynda og fyrirtækið sem ég starfa hjá, var þá einmitt að halda upp á 50 ára afmæli sitt og tók hann nokkrar myndir í tengslum við það. Fyrirtækið keypti þær svo stækkaðar af erfingjum hans fyrir nokkrum árum.

[Þorkell Guðbrandsson (IP-tala skráð) 10.7.2009 kl. 21:18]

Datt í hug í sambandi við Glerána, hvort það sé nokkuð fráleitt að tala um að hún sé a.m.k. að hluta til jökulvatn? Hún fær talsverðan hluta vatnsmagns síns úr daljöklinum Lambárdalsjökli, þó nokkrum skálarjöklum (cirque glaciers) þar á meðal Glerár(dals)jökli ofl. smájöklum þarna í fjallendinu milli Hörgárdals/Öxnadals og Eyjafjarðardalsins.  - En hvernig var aftur vísan góða? Hver er þessi eina á/sem aldrei frýs/gul og rauð og græn og blá/og gjörð af SÍS?