Veðrabrigði í vændum ?

Þó ekki sú runninn upp höfuðdagur og heldur ekki byrjun hundadaga er ekki að sjá annað en að veðrabrigði gætu verið yfirvofandi.  Lýsir sér þannig að nokkuð myndarleg lægð, þrengir sér upp að landinu úr suðri með skilum og úrkomusvæðum.  Vindur verður austan- og suðaustanstæður og úrkoma þó nokkur, sérstaklega suðaustanland. 

Í kjölfar þessarar lægðar er að sjá undir helgi að vindáttin gæti orðið suðvestanstæð.  Hvort sú vindátt haldist eitthvað eða verði aðeins undantekning á reglunni ræðst af því hvort hæðarhryggur frá nái til Bretlandseyja í kjölfarið.  Þar hefur sumarið verið óstöðugt og úrkomusamt og Bretar orðnir lageygir eftir sólarkafla sem fylgir gjarnan slíku veðurlagi.  Um leið beini slík staða oft grunnum lægðum úr suðvestri til Íslands með ríkjandi vindi á milli suðausturs og suðvesturs.  

En lægðin myndarlega er allt að því staðreynd og sýnir spárkortið stöðuna aðfararnótt fimmtudagsins þar sem lægðin hefur snýr um sig úrkomusvæðunum.

Athugasemdir

[Þorkell Guðbrands (IP-tala skráð) 4.8.2009 kl. 10:19]

Tölvuspárnar gera nú ráð fyrir að hann snúi sér aftur til norðlægra vindátta frá og með sunnudegi.

[albert (IP-tala skráð) 4.8.2009 kl. 12:11]

" og heldur ekki byrjun hundadaga" halló er ég eitthvað ruglaður eða byrjuðu ekki hundadagar 13. júlí. Þá skipti um veður og hefur verið "hundleiðinlegt" síðan!

[GisliBj Egilsst (IP-tala skráð) 4.8.2009 kl. 12:45]

Ætlaði að nefna það sama um lok hundadaga.

Vonandi fer Asoreyjahæðin að teygja sig upp til Bretlandseyja, þá birtir yfir NA-landi

[Einar Sveinbjörnsson, 4.8.2009 kl. 13:12]

Hundadagar hófust í ár 13. júlí og þeim lýkur 23. ágúst.  Helstu veðrabrigði sumarsins voru í lok júní (um 29.) þegar hlýnaði á landinu ölu og næstu vikurnar mátti heita milt og mjög þurrt almennt séð á landinu.  Síðan gerði N-áttina með háloftakuldunum 23. júlí og í megindráttum hefur sú tíð haldist síðan.  Nú 4.-5. ágúst skiptir síðan um veðurlag. Auðvitað eru breytingar frá degi til dags innan þessa tímabila eins og gengur.

ESv

[Sigurður Þór Guðjónsson, 4.8.2009 kl. 13:25]

Gott væri þegar athugasemdarar tala um gott eða vont veður þar sem þeir búa tækju fram hvar það er. Þess má svo alveg geta að verslunarmannahelgin núna var sú sólríkasta í Reykjavik frá a.m.k. 1949.

[Þorkell Guðbrandsson (IP-tala skráð) 4.8.2009 kl. 14:25]

Þar sem ég bý um þessar mundir, er afar sjaldan verulega gott veður, en það má líka fylgja, að hér er afar sjaldan mjög vont veður. Með vondu veðri meina ég yfir 20 m/s vind samfara úrkomu, Sigurður Þór. Með góðu veðri á ég við vind undir 5 m/s og hita yfir +15°C. Svo er eitthvað til sem heitir leiðinlegt veður og misjafnt hvernig fólk skilgreinir það. Það er ansi oft leiðinlegt veður hér á Húnaflóasvæðinu (Strandir og Norðurland vestra heitir það á Veðurstofumáli) yfir sumarið. Síðari hluta maí og í júnímánuði er afskaplega oft þokuloft og þokuruðningur samfara svalri hafgolu. Annars má nú víst einu gilda hvernig veður er hér um slóðir, hér býr fátt fólk og fer fækkandi. Núna um vitlausramannahelgi var fremur leiðinlegt veður hér, en á sunnudagsmorguninn var samt þokkalegt veður í fáeina klukkutíma og sást til sólar um stund. Það var að vísu afleitt að fá ekki þokkalegt veður hér þessa helgi, því hér var ansi fjölmennt og margt gesta í tengslum við Unglingalandsmót UMFÍ. Fjöldinn kom m.a. fram í því að raflögn á tjaldsvæðin átti að þola 750 kw, en það dugði ekki til og varð að auka flutningsgetuna, og mér skilst að álagið hafi farið í megawatt þegar mest var. Eitthvað grunar mann að lágt hitastig eigi þátt í þessari miklu raforkunotkun húsbíla og hjólhýsa.