Hafísbreiða N-Íshafsins víðáttumeiri nú en fyrir ári

Líkt og nokkur undanfarin ár berast okkur upplýsingar um þetta leyti árs hvernig hafísnum á norðskautsstæðum hefur reitt  af  yfir sumarið.   Niðurstaðan liggur fyrir,  ísmyndun sem eftir var tekið hófst á ný 14. sept. Lágmarksútbreiðslan var um 5.1 milljónir ferkílómetra að sögn þeirra sem best fylgjast með vestur í Bandaríkjunum og rýna daglega í tunglmyndir.  Fyrir tveimur árum var lágmarkið enn minna eða 4.1 millj. km2.  Engu að síður er útbreiðslan nú talsvert innan meðaltals áranna 1979-2000 eins og sést glöggt á samanburðarmyndunum af vef BBC.

 

Ýmsir voru nokkuð brattir fyrir tveimur árum að spá endalokum sumaríssins á norðurslóðum og kepptust við að yfirbjóða ártöl þegar ísinn átti að verða horfinn að öllu leyti.  Ég held að ég hafi séð árið 2024 í spá þeirra sem lengst gengu í því hvenær afskrifa mætti sumarísinn. En eins og ég hef áður bent hér á, er þróun í einhverja veru sjaldnast línuleg og innbyggður breytileiki talsverður.  Vel má vera að hafísþekjan komi til með að vaxa í einhver ár áður en hún minnkar á nýjan leik vegna hægfara loftslagshlýnunar.   Ísinn gengur í gegn um gríðarlegar árstíðarsveiflur og hann er seigari en margur heldur.

En það er ekki aðeins hitafarið sem ræður útbreiðslu og magni hafíss á norðurslóðum.  Samspil vinda og yfirborðsstrauma þjappa ísnum saman, svo að segja hrúgað honum upp, þannig að flatarmál verður minna en rúmmálið eða ísmassinn segir til um. Það er einmitt mikill munur á 2007 og 2009 að þessu leyti.  Takið eftir að lágmarksárið var mun meiri ís við A-Grænland en nú er.   Hitt atriðið lýtur að því að ísinn berst frá norðurslóðum og bráðnar á endanum í hlýrri sjó og loftslagi.  Þessi flutningur sem mestur er um Framsund suður með Grænlandi er afar breytilegur og ræður ekki síður um heildarafkomuna í N-íshafinu en sumarhitinn einn og sér.

Athugasemdir

[Höskuldur Búi Jónsson, 18.9.2009 kl. 11:23]

Já, það er þetta með rúmmálið - ég man að í fyrra (2008) var minnsta rúmmál frá því mælingar hófust - þrátt fyrir að útbreiðsla hafi verið meiri en 2007, en mér skilst að rúmmálsmælingar séu ekki tilbúnar fyrir árið í ár - hefurðu heyrt einhverjar tölur?