Lægð æðir yfir landið

Í nótt mun lægð æða svo að segja beint yfir landið úr suðvestri, um Snæfellsnes og áfram ANA yfir norðanvert landið.

Það er óvenju mikill hraði á lægð þessari og eins er hún í foráttuvexti.  Kalt hefur verið í háloftum yfir Grænlandi sem á sinn þátt í vexti lægðarinnar.  Vitanlega er allhvasst á landinu á meðan á þessu stendur og veruleg rigning fylgir skilunum.  Þegar þetta er skrifað skömmu eftir miðnætti er húðarigning suðvestanlands. Hann gæti líka orðið nokkuð snarpur vestanvindurinn í kjölsogi lægðarinnar suðvestantil í fyrramálið, en aðeins í skamma stund.

Svalara loft nær yfirhöndinni á morgun, en á laugardag verður það enn kaldara, enda ættað að hluta til ofan frá Grænlandi.  Þá hvöss V-átt og áreiðanlega verða él á fjallvegum um vestanvert landið. 

Athugasemdir

[Þórarinn Þ Gíslason (IP-tala skráð) 25.9.2009 kl. 03:43]

Sæll Einar Sveinbjörnss.

það er alltaf fræðandi að lesa þig.

Þú ert ómissandi hér.

Kveðja.

[Haukur Kristinsson (IP-tala skráð) 25.9.2009 kl. 07:23]

Sammála Þórarni. Gaman og fróðlegt að lesa þínar Meteo fréttir. Annars sakna ég Isobaren-korts á heimasíðu Verðurstofunnar. Eða veit ég ekki hvar það er að finna? Þarf því að opna heimasíðu Meteo Swiss, til að sjá kort með skilum, Oklusjónum etc.

[Einar Sveinbjörnsson, 25.9.2009 kl. 10:48]

Haukur !

Prófaðu eftirfarandi slóð og veldu Bracknell.  Kortin eru gefin út á 6 klst fresti, en þrýstilínur eru með 4 hPa bili í stað 5 sem við eigum að venjast.

http://www.wetterzentrale.de/topkarten/fsfaxsem.html