Tíðarfarsspá jan-mars

Þá er tímabært að rýna fram í næstu þrjá mánuði sem samkvæmt okkar venju teljast vera helstu vetrarmánuðirnir.  Síðast þegar spáð var í þessi veðurlagsspil var gert ráð fyrir að meiri líkur væru til þess að mánuðirnir nóv-jan yrðu hlýrri heilt yfir en ella.

Nú er það svo með þriggja mánaða veðurlagsspárnar að þær hafa í nokkur undanfarin ár yfirleitt verið í hlýrri kantinum, þ.e. oftast er spáð hlýindum umfram meðallag. Það sem meira er að þær spár hafa oftar en ekki gengið eftir. Viðvarandi sjávarhiti, einkum suður- suðausturundan á þarna vafalítið  nokkurn  þátt.

Því kemur það mér nokkuð á óvart að veðurlagsspá ECMWF gerir ráð fyrir því að mestar líkur séu á því að mánuðurinn verði um meðallag og ef eitthvað er þá eru ívið meiri líkindi á því að  hann verði kaldari en hlýrri.  Spá af svipaðri gerð frá IRI í Columbia háskólanum í Bandaríkjunum er svipuð, þ.e. gert er ráð fyrir því að hitinn hér á landi muni ekki sýna marktæk frávik frá meðallagi.

Báðar þessar spár en einkum sú frá ECMWF fela í sér nokkur tíðindi í ljósi reynslunnar, þ.e. að ekki skuli spáð hlýindum umfram meðallag.  Sé litið á aðrar afurðir líkans ECMWF kemur í fram að a.m.k. 60% líkur verði á því að úrkoma verði í efsta þriðjungi suðaustanlands að samanlögðu yfir mánuðina þrjá og sömu líkur eru á að úrkoma verði í lægst þriðjungi vestantil á Norðurlandi.  Þrýstifrávik benda til þess að "normal" lægðabrautin verði fyrir sunnan land og yfir S-Skandinavíu.  Hér verði því meira um A-átt og síðan útsynnings-  V- og SV-átt á kostnað bæði hlýrrar S-áttar og kaldrar N-áttar.

Frávikakort Met.no í Noregi sem byggir á ECMWF sýnir þetta mætavel þar sem gert er ráð fyrir stórum jákvæðum hitafrávikum í Austur-Evrópu.  Slíkt gerist ekki að vetrinum öðruvísi en með lægðafæribandi frá Atlantshafi inn yfir N-Evrópu og S-Skandinavíu þar sem mildu Atlandsloftinu er pumpað inn yfir meginlandið og heldur þannig aftur af köldu vetrarloftinu úr austri.

Ég ætla að birta samanburð við veðurlagsspána okt-des fljótlega eftir að tölur síðasta mánaðarins liggja fyrir hjá VÍ.    

Athugasemdir

[Ólafur fannberg, 4.1.2007 kl. 08:13]

kvitt