Snjókomubakki yfir suðvestanlands

Það hefur gersí tví- eða þrígang í vetur að skil með úrkomu koma suðvestan úr hafi og inn á land og með þeim nær varla að blota sem heitið getur.  Úrkoma fellur því víðast öll sem snjókoma.  Venjulegi gangurinn í þessu er að fyrst snjói í skamma stund og fari síðan yfir í leysingu með tveggja til fimm stiga hita.  Loftið er jú suðlægt af uppruna og komandi af slóðum þar  sem er nokkru hærri sjávarhiti.

Nú er einmitt enn skilin af þessari tegundinni að koma inn á landið.  Samfelld snjókoma verður sunnan- og suðvestanlands í 3 til 4 klst Talsveður bylur á fjallvegum þar sem A-áttin nær 12-15 m/s. Eins sums staðar á Suðurnesjum, en meira sem mugga í hægum vinið á Höfuðborgarsvæðinu.

En hver er ástæðan ?  Ein helsta er sú að blöndun er við loftið vestur- og norðvesturundan sem verið hefur í kaldara lagi síðustu vikurnar.  Önnur er að yfirborðshiti sjávar hefur heldur verið að gefa eftir miðað við það sem hefur verið undanfarna vetur.  Sú þriðja og kannski veigamesta þegar allt er talið er að vindur í háloftunun (í um 5 km hæð) er nálægt því að vera hávestan-stæður í stað þess að vera úr suðvestri eins og oftast er þegar skil koma úr suðvestri með lægðum.  Suðlægur þáttur vindsins í þessari hæð ræður (eins og gefur að skilja !) miklu um uppruna loftsins. 

Ratsjármyndin sem hér fylgir af Brunni Veðurstofunnar er frá kl. 08:15.  Hún sýnir vel hvað úrkomubakkinn er þéttur og samfelldur. Hann kemur nú í rólegeitum inn á landið.  Fer ekki yfir það heldurhægir ferðin yfir miðju landinu síðar í dag um leið og sjálf lægðin berst til austurs (undan V-áttinni uppi) fyrir sunnan land.  Úrkomusvæðið klárar sig síðan og leysist upp nokkurð hratt síðar í dag og í kvöld. 

Á þriðjudag er síðan spáð enn einum skilum af þessari gerðinni með mestmegnis snjókomu.

Ísfréttir frá Diskóflóa

Danska Veðurstofan rekur umfangsmikið íseftirlit við Grænlandsstrendur.  Martin Nilsen hjá hafísmiðstöð DMI (Issentralen) segir að framgangur hafíss við Vestur-Grænland það sem af þessa vetrar verið meiri og hraðari en almennt séð hafi verið síðustu 15 árin eða svo. 

Í Diskóflóa sé útbreiðsla íssins nú þetta snemma vetrar eins og eðlilegt gat talist á  níunda og tíunda áratugnum.  Ef frem fer sem horfir með vetrarkuldann við V-Grænland gæti Diskóflóinn úti fyrir Ilulissat (Jakobshavn) allur orðið samfrosta. Slíkt gerist aðeins í hörðustu vetrum og er orðið nokkuð um liðið frá síðast slíkum vetri.

Á sama tíma berast fregnir af því að Eystrasaltið og Helsingjabotn séu íslaus með öllu um um miðjan janúar.  Slíkt ástand þykir fáheyrt og með talsvert öðrum brag en var síðustu tvo vetur þegar ísilögð hafsvæði voru með meira móti.

Rétt að halda því til haga að veðurfarsbreytingar eða langtímaþróun veðurfars á þarna ekki hlut að máli, heldur eru þetta sveiflur á árakvarða sem eru vel þekktar og ansi hreint magnaðar hér norðurfrá og beggja vegna Atlantshafsins. 

Um þær var m.a. fjallað í tengslum við NAO á dögunum.

 

 

Mokaður út úr skafli

Við fréttum af gríðarmikilli snjókomu í Austurísku Ölpunum um síðustu helgi.  Þessa mynd rakst ég á frá Obertauern í Salzburgarhéraði. 

Bíllinn var vissulega mokaður út  en hreinsuninni ekki alveg lokið áður en hægt var að halda af stað !

Þess má geta að víða í vesturhluta Austurríkis snjóaði í logni nær samfellt í á fimmta sólarhring. Mjöllin var því jafnfallin og bíll þessi því ekki dreginn út úr mesta skaflinum, heldur var ástandið þessu líkt heilt yfir. 

 

Tíðin í vetur í tengslum við NAO vísinn

Þær eru ýmsar leiðirnar til að mæla og bera saman tíðina eða eigum við kannski frekar að tala um ótíðina í vetur.  Ein er svokallaður NAO vísir sem margir þekkja til a.m.k. afspurn.  Myndin hér til hliðar sem Morgunblaðið lét útbúa til skýringa í fyrravetur sýnir megindrætti þessarar merkilegu veðursveiflu og menn hafa þekkt lengi. Eitt helst einkenni hennar er að hitafar við V-Grænland og í N-Evrópu er í andstæðum fasa.

 

• Jákvæður vísir NAO: Verður þegar lægðagangur er frá austri til vesturs yfir Atlandshafið og braut lægðanna nærri Íslandi eða hér skammt sunnan við land. Jafnframt er háþrýstisvæði staðsett vestur af Portúgal, nærri Azoreyjum.  Yfir meginland Evrópu berst þá milt og úrkomusamt loft, en á sama tíma er kalt við á Vestur-Grænlandi.

• Neikvæður vísir NAO: Þá er þrýstimunur á milli Íslands og Azoreyja minni, jafnvel hærri þrýstingur við Ísland. Lægðabrautin færist til suðurs inn yfir Miðjarðarhaf og N-Afríku.  Milt verður við V-Grænland, en heimskautaloft streymir úr norðri og austri yfir Norður- og Vestur-Evrópu.

Ítarlega umfjöllun um flest það sem viðkemur eðli og einkennum NAO má sjá hér á fróðleikssíðu Veðurstofunnar.

Skemmst er frá því að segja að ríkt hefur jákvæður fasi (mæling) NAO samfellt frá því um miðjan nóvember.  Meðaltölugildið var hærra í desember en sést hefur um árabil að vetrarlagi (+2,52).  Og enn er það í hærri kantinum og alltaf jákvætt það sem af er janúar.  Staða veðurkerfanna hafa líki einkennst mjög af efri hluta myndarinnar. 

Þó erfiðara sé að heimfæra hitafarið upp á Norður-Atlandshafssveifluna hér á landi mitt á milli gagnstæðra pólanna, eru engu að síður aðrir veðurþættir sem greina sig skýrt.  Þannig fylgja stormar og vindasöm tíð oftast jákvæðum NAO.  Einnig eru úrkomusömustu og snjóþyngstu vetur á landsvísu gjarnan líka þeir sem mælast með hátt meðalgildi NAO.  Kaldir vetur með hafísum og miklum N-áttum eru hins vegar fylgifiskar neikvæðra gilda, en þar eru reyndar líka þeir afbrigðilega hlýju.  Skýrist af því að þegar vísir NAO er neikvæður eru háloftarastirnar frekar S- eða N-stæðar heldur en að koma úr vestri til austurs. 

Ég hef undir höndum reiknuð mánaðargildi NAO frá 1950 (frá NOAA).  Þau er "normalíseruð" eins og það er kallað á vondu máli.  Á sumrin þegar lítið er um að vera eru útgildina því ekki jafn merkingarbær og yfir vetrarhelming ársins þegar mikill hitamunur norðurhjarans og heittempruðu svæða í suðri knýr veðurkerfin áfram.   

Meðalgildi fyrir hafa stundum í desember til mars farið yfir +1,0 (NAO+), síðast árið 2000. Frá 1950 hefur meðalgildi þessara fjögurra vetrarmánaða verið stærra en +0,8 eftirtalda vetur.

• 1983 (+0.95)
• 1984 (+0.89)
• 1989 (+1.26)
• 1994 (+1.02)
• 1995 (+1.36)
• 2000 (+1.30)

Það er ekki tilviljun að þetta eru líka helstu snjóavetur síðustu áratuga hér á landi.  Kannski síst 1994, ( fremur snjóþungt var samt norðanlands).

Á hinn bóginn höfum við veturinn í hitteðfyrra , 2010 með stórt neikvætt gildi; -1.26. 

En hverjar eru þá  horfurnar ?  Með því að skoða spár fyrir stóru myndina hér við Atlantshafið er fátt sem bendir til breytinga. Í það minnsta er ekkert sem bendir til algerrar umpólunar úr jákvæðu í neikvætt gildi NAO vísisins.  Langdræga bandaríska spáin gerir reyndar ráð fyrir því að gildið verði lægra eða jafnvel hlutlaust þegar fram í sækir á meðan sú evrópska heldur fullum dampi ef svo má segja í þessum efnum. 

 

 

 

 

10. janúar 2012

10. janúar 2012 verður einn þessara daga sem minnst verður í framtíðinni fyrir illviðri, samgöngur og rafmagnstruflanir.  Það er kannski réttara að tala um 9-10. janúar saman í þessu tilliti.  Kem hér með dáltila samantekt, einkum í því skyni að halda veðursamhenginu til haga.

Þó veðrið flokkist varla með allra verstu V- og SV-óveðrum sem gengið hafa yfir landið síðustu áratugi, er það engu að síður mjög slæmt þegar horft er til afleiðingar þess á samgöngur og truflanir á raforkuflutningum.  Í raun var um tvö aðskilin veður að ræða, en samt voru þau nátengd þegar allt kemur til alls.  

Seint þann 9. æddi til norðausturs nokkuð óvenjuleg lægð yfir suðausturhluta landsins.   Hún var kröpp og í miklum vexti (mynd 1). Veður á undan henni var ekki svo slæmt, enda keyrði lægðin inn í talsvert mikla vestanröst í lofti sem fyrir var yfir landinu og hér vestur af því. Það kom þó ekki í veg fyrir það að talsvert náði að snjóa um mikinn hluta landsins með lægðinni, en rigning var suðaustaustanlands og á láglendi norður með allri austurströndinni.  Í kjölfar lægðarinnar gerði snarpan V-ofsa með skafrenningi snjókomu og tilheyrandi ófærð.  Yfirleitt stóð veðrið ekki yfir í nema í um eða innan við 1 klst. frá því um kvöldið og fram yfir miðnætti. Verst varð skotið austanlands þar sem fokskemmdir urðu á mannvirkjun m.a. í Skriðdal og á Héraði.  Vindhviður fóru víða austanlands yfir 40 m/s og sem dæmi að mældi veðurstöð Vegagerðarinnar á Breiðdalsheiði 40 m/s í meðalvind í stutta stund rétt fyrir miðnætti og mesta hviða 50 m/s (mynd 2).  

Eftir að sjálf lægðin var úr sögunni dembdist yfir landið þétt éljaloft úr vestri strax um nóttina (mynd 3) með veðurhæð um 15-20 m/s.  Fjölmargir vegir tepptust og Hellisheiðin reyndar strax um kvöldið.  Þar voru talsverðar aðgerðri alla nóttina við að losa um fasta bíla og bjarga fólki.  Ófært var á milli landshluta um morguninn um vestur og norðurhluti landsins og til lítils fyrir moksturstæki að aðhafast nokkuð fyrr en veðrið tæki að lagast (mynd 4). Bilun varð í raflínu vestur á Snæfellsnes um morgunin vegna veðursins og komst rafmagn ekki á að fullu fyrr en um 14 til 16 klst. síðar. 

Á meðan á  þessu vatt fram voru hlutir að gerast vestur við strönd Grænlands sem kröfust þess að sjónum væri beint þangað.  Þar var í uppsiglingu verðurfyrirbæri sem Grænlendingar kalla Pitreaq og er fallvindur ofan af Grænlandsjökli niður með hlíðunum og út á sjó. Ekki nóg með að loftið sem þannig steypist niður sé mjög kalt, heldur er það einnig afar þurrt þegar kröftugur V-vindurinn bar það út á haf (mynd 5).  Trausti Jónsson fjallaði nánar um þennan þátt málsins og lesa má um hér.

Köld lægð eða lægðardrag var að verki á Grænlandssundi og beindi þessu þurra og kalda lofti í áttina til Íslands frá því snemma um morguninn.  Það drakk í sig aukin raka og élin voru þvi viðvarandi. Veðurhæð í V-áttinni náði síðan hámarki um og upp úr miðjum degi um leið og umrætt lægðardrag renndi sér til austurs skammt fyrir norðan land. Þegar að var gáð reyndist veðurhæðin úti á Grænalndshafi vera um 22-25 m/s þar sem vestanloftið ofan af Grænlandi fór um (mynd 6).  Í svo hvössum vindi þyrlast upp mikið sjávarlöður sem aftur gufar upp í svo þurru lofti. Smágerðar saltagnir svífa hins vegar áfram um loftið.  Ekki má heldur gleyma þætti brims við ströndina og á grunnsævi vestanlands, en ölduhæð á Garðskagadufli mældist 11,2 m þegar mest var um kl. 18.  

Eftir því sem leið á daginn fækkaði heldur éljunum enda varð loftið  þurrara. Skömmu fyrir kl. 18 verða skil í þessum efnum þegar kjarni þurrasta loftsins úr vestri nær til vesturhluta landsins (mynd 7).   Rakastigsmælingar  á stöð Vegagerðarinnar við Akrafjall sýna þetta glöggt þegar rakastigið féll úr 90% í 50-60% á skömmum tíma (mynd 8). Fljótlega í kjölfarið sló út rafmagni í tengivirki Landsnets á Brennimel ofan Grundartanga, en þar átti seltan sem fylgdi þurra loftinu ríkan hlut að máli.   Þessi selta í  lofti olli margháttuðum erfiðleikum í rafmagnsflutningum á vestanverðu landinu um kvöldið og nóttina og leiddi m.a. til stöðvunar Hellisheiðarvirkjunar sem aftur hafði ýmis hliðaráhrif á hitaveitur o.fl.   

Veðrið gekk niður um nóttina um leið og snerist til hægari NV- og N-áttar. Hellisheiðin var lokuð í meira en sólarhring og margir mikilvægir vegir einnig s.s. Holtavörðuheiði, frá Borgarnesi vestur á Snæfellsnes, Vatnsskarð og Öxnadalsheiði svo nokkrir séu nefndir.  Þá lá innanlandsflug niðri vegna ókyrrðar í lofti.  Samgöngur voru því lamaðar 10. janúar 2012, þungfært á Höfuðborgarsvæðinu, en vel hafðist undan að hreinsa og halda stofnbrautum í standi. Seltan olli rafmagnstruflunum og verulegu  fjárhagstjóni sem ekki er allt komið fram þegar þetta er skrifað.

 

 

 

 

 

 

 

 

 

 

 

 

Mynd 1.  Spákort með gildistíman kl. 21. 9. janúar.  Lægðarmiðja á hraðri leið norðaustur yfir Suðausturland.  Vel má sjá hvað stutt er á milli þrýstilína vestan og suðvestan lægðarinnar. (HIRLAM  +3 t, sótt í Brunn Veðurstofunnar) 

 

 

 

 

 

 

 

 

 

 

Mynd 2.  Línurit vinds og mestu vindhviðu frá stöð Vegagerðarinnar við veginn yfir Breiðdalsheiðinni sýnir vel hversu snöggt V - veðrið skall á um miðnætti og hve þetta var mikill hvellur í raun. (Af vef Vegagerðarinnar)

 

 

 

 

 

 

 

 

 

 

 

 

 

Mynd 3.  Ratsjármynd frá því snemma að morgni 10. janúar, kl. 04:52 sýnir glöggt hve éljagangurinnn var þéttur um nóttina og fram eftir degi. Kvarðinn er mm úrkomu á klst. (Veðurstofan, sótt í Brunn VÍ.

 

 

 

 

 

 

 

 

 

 

 

 

 

Mynd 4. Færðarkort kl. 14:47 af vef Vegagerðarinar. Þá var ófært m.a. um Hellisheiði, veginn vestur á Mýrar, víðast á Snæfellsnesi, um Bröttubrekku, Þröskulda og Steingrímsfjarðarheiði.  Einnig norður yfir Holtavörðuheiði, um Vatnsskarð, Öxnadalsheiði og til Siglufjarðar um Fljót. Afar fátítt verður að teljast að þessar megin samgönguæðar séu ófæarar vegna snjóa og blindu allar á sama tíma. 

 

 

 

 

 

 

 

 

 

 

 

 

Mynd 5. Greiningarkort kl. 00, 10. janúar. Sjá má lægðarmiðju á Grænlandssundi og þéttar þrýstilínur með ákveðinni sveigju af Grænlandsjökli og á haf út.  Þarna er niðurstreymi lofts eða Piteraq vindur af fjöllum eða öllu heldur jökli. (Kortið er frá Metoffice í Exeter).

   

 

 

 

 

 

 

 

 

 

 

 

 

Mynd 6. Þetta kort er athyglisvert, en það gildir kl. 12 þann. 10. janúar.  Skyggðu fletirnir sýna vind í 100 metra hæð. "Niðurfallið" við Grænland sést á kortinu þar sem er eins og strengurinn slitni í sundur.  Í dökk bleika svæðinu í kjarnanum er vindur 28-30 m/s í 100 metra hæð.  Ætla má að nærri sjávar máli hafi veðurhæðin verið 22-25 m/s á þessu hafsvæði.  Þarna gufar sjávarlöður upp í miklum mæli og berst á endanum til Íslands eins og glöggt má sjá. (ECMWF 0,125 + 12 t. Sótt í Brunn VÍ).

 

 

 

 

 

 

 

 

 

 

 

 

 

 

 

 

 

Mynd 7.  Hér er búið að reikna uppruna lofts við vesturströndina kl. 18 þ. 10. janúar. Vel sést að loftið er komið ofan af Grænlandi síðasta sólarhringinn á undan. Línuritið að neðan sýnir reiknað rakastig (ath að ferillinn hefur gangstæða stefnu við þann efri).   Rakastig loftsins  er ætlað um og innan við 30% eftir fall þess (og hlýnun) niður af Grænlandsjökli.  Rakinn eykst síðan á leiðinni yfir hafið og reiknast 55% hér sem kemur vel heim og saman við mælingar á Akrafjalli. (HYSPLIT / NOAA ARL)

 

 

 

 

 

 

 

 

 

 

 

 

 

 

 

 

Mynd 8. Rakastig á veðurstöðinni undir Akrafjalli.  Efri hluti myndarinnar skiptir engu í þessu samhengi, en takið eftir falli rakastigsins á milli kl. 17 og 18 þ. 10. janúar.  Það hafði verið breytilegt í éljaloftinu fyrr um daginn, en fyrst þarna má segja að loftið frá Grænlandi með seltu af hafinu sé að berast af fullum þunga. (Af vef Vegagerðarinnar).

Flaggað í V-áttinni

Ég á alls ekki við að veðrið sé að gott að nú rjúki menn út til að flagga, heldur meina ég þetta í óeiginlegri veðurmerkingu.  Á vindakorti HIRLAM sem gildir kl. 18 ( af Brunni VÍ) er búið að "flagga" yfir mest ölu landinu.  Þarna erum við stödd í um 1.200 metra hæð og 25 m/s vindstyrkur er táknaður með flaggi.  Heilt strik er hins vegar 5 m/s og hálft 2,5.

Við sjáum að hann nær allt að 30 m/s yfir landinu.  Þetta þýðir að vindur til fjalla er 20-25 m/s og 15-20 m/s á láglendi.  Þá er ekki tekið tillit til hvers kyns misvindis s.s. í éljum eða vegna landslags.  Þetta á við um næstum því allt landið.  Helst að nyrstu hluti Vestfjarða sleppi betur.

Það er veðurhæðin sem fyrst og fremst er að valda vandræðum nú í samgöngum á vegum og ófærðinni. Þetta mikill vindur kemur hreifingu á snjóinn sem fyrir er veldur og veldur miklum skarfrenningi.  Síðan bætast dimm élin ofan á um vestanvert landið, en útlit er fyrir að heldur dragi úr þeim þegar líður á daginn.  Vind tekur hins vegar ekki að lægja fyrr en í nótt. 

 

 

Brast á austanlands rétt um miðnætti

Þessi klippa af síðu Vegagerðarinnar segir allt sem segja þarf.  V-áttin brast á nú rétt um miðnætti austan Beturfjarðar, en sunnan Vatnajökuls er veður farið að ganga niður.

31 m/s á Öxi og 36 m/s á Breiðdalsheiði. Þetta er mældur 10 mín meðalvindur.  Hviðurnar eru meiri.  Á Eyjabökkum 37 m/s og á Fjarðarheiði og Oddssskarði var hann rétt að ganga upp þegar "myndin var tekin".

Athygli vekur Fagridalur.  Landslagið stýrir vindi þar og V-átt nær sér ekki á strik.  Hins vegar í SA-áttinni í aðdragandsa lægðarmiðjunnar fyrr í kvöld eða um kl. 21 mælidst hviða upp á 51 m/s á Fagradal.  Athyglisvert það verð ég að segja á þeim stað.

Eins er það með Hvalnes.  Þar er áttin ekki rétt ef svo má taka til orða.  Um 500 metrum austar í Hvaldal gæti hins vegar slegið til.  Þar er enginn mælir.

Fyrr í kvöld mældist ofsaveður í Mýrdal og á Mýrdalssandi.  Það stóð hins vegar stutt yfir sem og annars staðar.

 

Varhugaverð lægð yfir suðaustanvert landið í nótt.

Það er skammt stórra högga á milli í veðrinu um þessar mundir.  Nú er rétt að beina sjónum að lægð sem fer mjög hratt yfir og á sama tíma sem hún er í foráttuvexti.

Sést kannski best með því að bera saman tvö veðurkort úr spá HIRLAM af Brunni VÍ.  Það fyrra hefur gildistíma kl. 15 og hið síðara á miðnætti.  Ferðin á þessi lægð er mjög mikil og lægðarmiðjunni er spáð norðaustur yfir suðaustanvert landið.  Ekki mun hvessa að ráði á undan, þ.e. fólk um suðaustan- og austanvert landið mun ekki finn fyrir SA-átt að ráði.  Hins vegar er það V- og NV-áttin í kjölfar lægðarinnar sem rétt er að beina sjónum að.  Í tiltölulega skamma stund er því hætt við að að vindur veður bæði mjög hvass og ekki síður byljóttur þar sem hann stendur af fjöllum frá Eyjafjöllum austur um á Austfirði.

Það skiptir máli hver ferill lægðarinnar verður segja má í smáátriðum.  Nái sjálf lægðarmiðjan ekki inn á land verður mestur vindur úti á sjó (strengurinn næði þó til syðsta hluta landsins). Hins vegar er allt útlit nú fyrir það að miðjan komi inn á land við Mýrdalssand og þaðan til norðausturs.  Vindröstin í kjölfar miðjunnar nær þá betur til landsins fyrir austan.

En rétt á meðan dregur úr SV-útsynningnum vestan- og norðvestantil í stuttu stund, en síðanstrax á eftir ná élin sér aftur á strik með dimmviðri.

 

 

 

 

 

 

 

 

 

 

"Ekki séð annað eins"

Flughálka er það færi kallað þegar blotnar í þjöppuðum snjó eða klaka á vegi.  Víða um land hefur ástandið verið slíkt í morgun og nánast er ófært sums staðar sökum svella.

Frétti fyrr í dag af reyndum mokstursmanni sem sagðist ekki muna annað eins ástand og nú.  Á hans slóðum var erfitt að halda tækinu á veginum þó svo að aðeins hafi verið lúsast áfram. Engir eða afar fáir voru á ferli. Vegfarendur láta líka flestir segjast og taka mark á viðvörunum.  

Verstur er klakinn þar sem umferð er er alla jafna frekar lítil, þá treðst nýr snjór undan hjólum ökutækja og myndar með tímanaum þennan klaka sem við horfum upp á nú.

Nokkrir kaflar þar sem flughálkan hefur verið sérlega slæm í dag eru: Grafningsvegur, Lyngdalsheiði, Barðaströnd, Djúpvegur, frá Egilsstöðum út á Borgarfjörð eystri, Fagridalur og hringvegurinn um A-Skaftafellssýslu. Þá eru margir vegkaflarnir ótaldir. 

Einu hálkuvarnirnar sem duga er að bera sand, en þá má heldur ekki rigna að ráði.  Rigning hefur einmitt líka verið að gera mönnum lífið leitt í dag að þessu leytinu til og þá skolast sandurinn einfaldlega út í kantana.

Sums staðar hefur leysingin sem betur fer náð að eyða klakanum. Vegagerðin hefur líka verið að beita heflum og öðrum þörfum tækjum í því skyni að reyna að rífa klakann upp. Verst er hvað hann er sums staðar þykkur og mikill eftir snjó- og kuldatíðina sem var lengst af í desember á landinu. 

(Myndin er af mbl.is/Golli)

 

Kröftugri leysing í vændum

Með lægðinni sem fer norðaustur um Grænlandssund á morgun fylgir kröftugri leysing en á föstudag.  Það er nokkuð ljóst.

Bæði er það svo að hitinn verður hærri og eins nær þessi tunga af mildu og röku Atlantshafslofti í ríkari mæli norður yfir landið. 

Byrjar um miðnætti að rigna vestantil og í hámarki verður lýsinginn snemma í fyrramálið, en um miðjan daginn austanlands. Gera má ráð fyrir 5 til 6°C og talsverðri úrkomu.  Eins hvöss SA-átt og jafnvel stormur.  Á fjallvegum hefst reyndar ballið víða sem snjór eða slydda, en líka þar nær að hlána um tíma. 

Óhætt er því að flokka þetta leysingarveður til asahláku, en það blotinn fer hratt hjá, því eftir miðjan daginn kólnar ákvdðið og við sjáum fram á nokkra daga með éljum og snjókomu vestantil í framhaldinu.

En ég vildi ekki vera á ferðinni í nótt og á morgun á meðan hvassviðrið verður og alls ekki þar sem vegir eru svellaðir.  Spyrnan er lítil við þær aðstæður og  hætt við því hreinlega að bílar fjúki út af þegar vindur blæs og vegurinn er flugháll.

Efra kortið sýnir stöðu mála, þrýstilínur (með 4 hPa millibili) og skil kl. 06 í fyrramálið.  Kortið er frá Bresku Veðurstofunni.  Greinilegur hlýr geiri á milli hita- og kuldaskilanna sem nær til landsins. Neðra kortið gildir kl. 12 á morgun. Það er HIRLAM-spá af brunni VÍ. Guli liturinn yfir landinu er til marks um frostmarkslínuna upp í 1.000 til 1.200 metra hæð.