Landið úr lofti 9. desember 2011

Landið er snævi þakið á þessari áhugaverðu tunglmynd frá því í gær kl. 12:58 og Ingibjörg Jónsdótir á Jarðvísindastofnun HÍ sendi mér.

Þarna er eitt og annað áhugavert. 

Fyrir það fyrsta sér í nýmyndaðan ís um 42 sjómílur norðvestur af landinu.  Yfirborðslög sjávar hafa vitanlega orðið fyrir mikilli kælingu í frostinu að undanförnu.  Fullsaltur sjór frýs þó ekki heldur sekkur og blandast dýpri lögum við kælingu. Hins vegar þegar seltan er komin niður undir 2,5% eru aðrir eðliseiginleikar til staðar og ís getur myndast (ef sjór er mjög lagskiptur getur yfirborðið frosið við hærri seltu).  Þessi nýís er ekki þykkur og annar en hinn eiginlegi hafís.  Hins vegar er fróðlegt nú í framhaldinu að fylgjast með hvernig ferski sjórinn vestur undir "miðlínu" hefur brugðist við í kuldakaflanum.

Fyrir norðan land eru él yfir sjónum og ná þau lítt eða ekki inn á land.  Þessi él voru þeirrar náttúru að myndast í mjög óstöðugu lofti þar sérlega kalt var í um 1.000 til 1.500 metra hæð í gær.  Talsvert snjóaði frá þeim við Eyjafjörð og austur með norðurströndinni.  Allur sá raki var tilkominn við uppgufun úr sjónum hér skammt fyrir norðan. Yfirborð sjávar tapar varma einkum með því móti, þ.e. með uppgufun.

Í þriðja lagi sjáum við að landið er snævi þakið meira og minna allt, síður kannski á Skeiðarársandi. En það er líka eina landsvæðið.  Stóru vötnin þrjú eru ekki enn lögð þrátt fyrir frostið.  Þetta eru: Þingvallavatn, Þórisvatn og Lagarfljót.  Hálslón er komið á ís.  Þessir miklu vatnabolir eru lengi að tapa varma sínum, en það hlýttur að styttast í að þau leggi. Síðast þó Þingvallavatn ef af líkum lætur. 

 

 

 

yr.no og Storm í Noregi - spár út og suður

Ég heyrði í Guðna Ölverssyni í þættinum Samfélagið í Nærmynd á Rás 1 í dag.  Guðni býr í Noregi og segir fréttir þaðan með sínu "nefi" eins og sagt er.  Hann gerði m.a. að umtalsefni umfjöllun í þarlendum fréttamiðlum á mun sem notendur tóku eftir á spám annars vegar frá yr.no sem framleiddar eru af Norsku Veðurstofunni.  Hins vegar hjá þeirri einkareknu í Bergen Storm Weather, en Storm sér flestum blöðum og sjónvarpsstöðum öðrum en NRK fyrir veðurspám.

Málið snerist um langtímaspá sem gefin var út fyrr í vikunni fyrir Bergen.  Um var að ræða hitaspá 12. desember nk.  (mér sýnist það hafi við útgáfu verið 9 eða 10 daga spá).  yr.no spáði +5°C á meðan Storm var með -13°C.  Þetta er munur upp á 18 stig ! Ég veit að veðurfræðingur kemur ekki nálægt og engar leiðréttingar eru gerðar í átt til eðlilegar skynsemi eða samfellu í sjálfri spánni frá degi til dags. 

Í umfjöllun Bergens Tidende (hér á bt.no. Myndin hér til hliðar er þaðan) segir að þetta komi oft og iðulega fyrir að munur á spám frá þessum helstu miðlurum sé oft á tíðum mjög áberandi og jafnvel sláandi og það jafnvel þó upplýsingarnar séu fengnar úr sömu átt.  Þó það komi ekki fram sýnist mér spábrunnurinn vera ECMWF í Englandi.  Hinn sem kæmi til greina væri GFS í Bandaríkjunum (RÚV notast við ECMWF, en Stöð 2 við GFS í sínum veðurkortum). 

Talsmaður Storm útskýrir þeirra aðferð og bendir á að að langtímaspár séu óvissar ónákvæmi mikil og öll sú rulla. Tekur hann fram að spárnar geti breyst mikið með hverri keyrslu.  Ekkert bendir til að Kalmansían, sem stundum hefur gert garðinn frægan hér á landi, sé þarna að verki.  Kemur þó ekki fram og ég veit svo sem ekkert um það.

En það er svarið hjá yr.no sem vekur meiri athygli mína. Þar kemur fram að spáin sé byggð á meðaltali 50 keyrslna.  Klasaspá ECMWF samanstendur einmitt af 50 hliðstæðum keyrslum í líkansins sem notaðar eru einkum til að leggja mat á óvissu og breytileika.  Fyrirfram hefði ég alls ekki trúað að meðalgildið væri nokkurs staðar notað sem "spáin".  Aðalkeyrslan í hvert sinni er ævinlega  "best búni bíllinn" á allan hátt í þessari keyrsluflóru, þ.e. þéttasta reikninetið, mest lagt upp úr upphafsástandi o.s.frv.   Ég útskýri muninn á þessu tvennu betur í síðustu færslu 6-11 daga spáa hér.

Sé þetta aðferðin hjá yr.no fyrir allar langtímaspár, líka hér á landi fer ég að skilja betur af hverju þær hafa sérstaka tilheigingu til að jafna út sveiflur, m.a.  í hita og vindi eftir því sem á spátímann líður.   Sér kannski ekki staða fyrstu þrjá til fjóra daganna, en frekar eftir það.  

6-11 daga spár, 14. til 19. desember

Nú er komið að næst síðustu langtíma spánni í þessari lotu.  Sú eftir viku veður sannkölluð jólaspá.  Eins og glöggir lesendur hafa tekið eftir hef ég ekki birt yfirferð spánna hér á blogginu nú í þrjú skipti.  Það þýðir ekki að hún hafi ekki farið fram.  Öðru nær, því öllum upplýsingum er haldið til haga og yfirferð síðustu spánna verður birt með öllum hinum í lokin á sérstöku fylgiskjali þegar útbúið verður tölfræðilegt yfirlit þessara spáa allt frá því seint í sumar.

 

Eftir vægan blota á láglendi á sunnudag og mánudag tekur loft úr norðri aftur öll völd og rekstefna lægðanna  fjarlægist aftur og verður til austurs, nokkru sunnan Íslands.            

Veðurspá fram á komandi miðvikudag má sjá hér á vef VÍ

Miðvikudagur 14. desember:

Mjög djúpri lægð er spáð við Skotland eða Færeyjar.  NA-átt hér á landi. Hún nokkuð ákveðiðn, jafnvel hvöss. Hríð norðaustan- og austanlands. Væg hláka um tíma með austur- og suðausturströndinni, en annars frost á landinu.  

Fimmtudagur 15. desember: 

Heldur hægari N-átt og dáltið, en ekki svo hart frost um land allt. Él norðan- og austanlands, en bjart sunnan- og vestanlands. 

Föstudagur 16. desember: 

Enn verða krappar og skeinuhættar lægðir að ferðinni inn yfir meginland Evrópu.  Við liggjum hins vegar nokkuð djúpt inn í heimskautaloftinu.  Hægviðri eða N-átt í grunninn og vaxandi frost, einkum til landsins.  Úrkomulítið, en eflaust lægðardrög og/eða snjókomubakkar að læðupokast einhvers staðar skammt úti fyrir.  

Laugardagur 17. desember:

Svipað veður og á sunnudag, ef eitthvað er meiri líkur á éljum eða snjókomubökkum við strendurnar.

Sunnudagur 18. desember:

Hæðarhryggur á leið til austurs yfir landið.  Heiðríkt víða og nokkurt frost í stillu. 

Mánudagur 19. desember:

Á eftir hæðarhrygg líkum þeim og spáð er á sunnudag, kemur oftast mildara loft með S-átt í kjölfarið.  Spáð SA-átt með hláku af einhverri gerð, í það minnsta um sunnanvert landið.

Mat á óvissu:

Sæmilegur stöðugleiki er í reiknuðum spám langt fram eftir næstu viku.  Erfiðara kannski með túlkun á landinu þegar þetta kalt er í veðri og smái veðurkvarðinn verður stundum þeim stóra yfirsterkari.  Ég sýni hér 2 kort úr kerfi ECMWF.  Bæði eru 240 stunda spár og gilda sunnudaginn 18. desember.  Það til hægri sýnir þrýsting við yfirborð.  Látum skyggða flötinn og túlkun hans liggja á milli hluta í bila a.m.k. Til hægri er síðan meðaltal allra 50 klasaspánna sem keyrðar eru samhliða.  Við sjáum að á þessum tveimur kortum er talsverður munur ef túlka skal veður hérlendis. Aðalspáin t.h. sem vel að merkja er keyrð í þéttasta reikninetinu gefur til kynna S-átt og samkvæmt því hlýnandi veður.  Meðaltal allra 50 klasaspánna segir hins vegar að ann sé hæðarhryggur og fremur kalt.  Hvor er þá trúverðugri ?  Þá kemur til kasta þessa að rýna breytileikann sem settur er fram með skyggðu svæðunum.   

Éf sé reyndar strax að munur þessara korta er einkum fasamunur í tíma.  Aðalspáin gerir einfaldlega ráð fyrir veðurbreytingum með hæðarhrgg úr suðvestri og S-átt í kjölfarið um sólarhring fyrr en "meðalsullið". 

Enn ein smálægðin með snjókomu

Sé nú rétt fyrir miðnætti að smálægðin sem lengst af í dag var skammt úti af Reykjanesi farin að sýna sig. Á  ratsjármynd frá VÍ  kl. 22:22 má sjá vel afmarkaðan snjókomubakka umhverfis lægðarmiðju og sem dregur inn í sig krók.  Ratsjáin við Sandgerði sýnir þetta afar vel og er hún þarft greiningartæki.

Kl. 23 var komið vonskuverður víða á Suðurnesjum.  Hríð og skafrenningur.  Sennilega líka í Ölfusi og á Hellisheiðinni.  Þó erfitt sé að segja nákvæmlega fyrir hver þróunin verður, er engu að síður líklegt að það komi til meða að snjóa meira og minna í mest alla nótt suðvestanlands.  Vestan lægðarinnar, einkum á Suðurnesjum verður NA-vindur 10-15 m/s auk ofanhríðarinnar og þar því skafrenningur.  

Á Höfuðborgarsvæðinu er úrkoman komin yfir fjallgarðinn með SA- og A-átt og því mun meira var og minna magn, en þegar bakkarnir koma úr suðvestri eða beint utan af Faxaflóa. 

 

 

Frosthorfur

Þennan miðvikudgsmorgunn er komið hægviðir um mikinn hluta landsins.  Eins er heiðríkt annars staðar en austan- og norðaustanlands.  Þar með er útlit fyrir að það herði á frostinu í dag þegar loftið næst jörðu er stöðgut og blandast ekki við efri loftlög.  Kannski ekki víst í dag að hitinn fari almennt séð niður fyrir -20 stigin, en í það heila er frostið vaxandi í kyrrviðrinu. 

Í það heila tekið á landsvísu veður þetta kannski kaldasti dagurinn í þessari lotu sem hófst 29. - 30. nóvember.  

Hins vegar er spáð kaldari loftmassa eða gangumkaldara lofti hér undir helgi, eða náðara sagt á föstudag.  Kortið sem hér fylgir er spákort HIRLAM af Brunni VÍ. Það sýnir annars vegar hita í 850 hPa fletinum.  Tunga með  -20°C þar nær norðurströndinni og eins og Trausti Jónsson vísaði til á dögunum er fremur fátítt að svo kalt loft nái landi.   Sérstaklega ef haft er í huga að sjórinn fyrir norðan land vermir stögut loftið.  Þætti af þeim sökum síður frættnæmt væri hafís útbreiddur skammt norður undan.  Svo er ekki heldur lítið um hafís eins og venja er þetta snemma vetrar. 

Hin stæriðn sem spákortið sýnir er þykkt í dekametrum á milli 1000 hPa þrýstiflatarins og 500 hPa. Henni er spáð norðaustanlands kl. 09 á föstudagsmorgunn niður fyrir 500 dekametra (5.000 metra).  Það yrði þá lægsta gildi þessa mikilvæga kuldavísis í yfirstandandi kuldakasti.  Það hefur samt ekki endilega í för með sér að frostið verði meira en annars.  Hægviðrið og heiðríkjan eru ekki síðri þættir fyrir lágar frosttölur á hitamælum.  Oft fylgir nefnilega þessu allra kaldasta lofti gjóluvindur, skýjaður himinn og jafnvel ofankoma.

En hversu lengi varir kuldatíðin ?  Sennilegt er að dragi verulega úr frostinu á sunnudag og geri jafnvel vægan blota a.m.k. um sunnan- og austanvert landið.  Fari svo mun kaflinn telja allt í allt 11 daga og þar með orðinn með þeim lengri á síðari tímum, þe. eftir að tók að hlýna í lok tíunda áratugarins.  

Hins vegar gæti kólnað aftur í næstu viku.  Spár eru óljósar enn hvað það varðar, en reynslan hefur kennt manni að sjaldan er ein báran stök í þessum efnum.  

Enn herðir á frostinu

Nú í kvöld (mánudag 5. des) sé ég að frostið hefur náð nýjum lægðum í þessu kasti sem nú gengur yfir.  Í Svartárkoti í Bárðardal hefur það farið lægst í 24,1°C.  Kuldinn á mjög sennilega eftir að verða meiri í nótt og fyrramálið til landsins norðaustan- og austantil.  Kannski þetta 28 til 30 stig á að giska þar sem frostið verður mest.  Ótruflaður meginlandshjúpur verður að leggjast yfir þar sem útgeislun er mikil.  Þar skiptir sjálfur kuldinn í loftmassanum kannski minnstu.  Frekar útgeislun yfirborðs, snjóhula og ekki minnst lognið eða hægviðrið.

Veðurkortið frá Veðurstofunni kl. 20 í kvöld gefur ágæta mynd.  Á  meðan Torfur í Eyjafjarðarsveit eru með um -20°C er ekki nema -4°C á Mánárbakka á Tjörnesi.  Vindur þar er N-stæður.  Segja má að lofmassahitinn þar sé "réttur" að því leyti að þar er um hinn raunverulega hita að ræða.  Að vísu er varmastreymið frá hafinu mjög mikið þegar svo háttar til og frostið á Mánarbakka því líklega heldur minna en ef varmastreymið væri lítið sem ekkert. 

Meginlandsáhrifin til landsins eru tvíþætt.  Í fyrsta lagi nær "varminn" úti við sjóinn ekki svo langt inn til landsins á meðan vindur er svo hægur sem raun ber vitni.  Útgeislun er ráðandi og djúpt hitahvarf myndast til landsins og snævi hulið yfirborðið eykur þar á. Kólnar bara og kólnar við jörð svo fremi vindur blandar ekki loftlögum.  Í þriðja lagi má kannski segja að í innsveitum sé loft þurrara, en við sjávarsíðuna. Sú staðreynd dregur úr náttúrulegum gróðurhúsaáhrifum eða varmageislun frá lofthjúpi.  Allt ber það að sama brunni og leiðir til enn meiri kólnunar við jörðu. Eða þar til blöndun við hlýrri loftlög á sér stað. 

Á þessum árstíma er sólin ekki til neins.  Varmi frá henni er nær enginn og breytir engu til eða frá. Dægursveifla hitans er að sama skapi nánast sem engin.

Hlýr nóvember og í tengslum við háloftavinda

Hér á landi var nýliðinn nóvember með þeim hlýrri eða nálægt því að vera í um 10. sæti heilt yfir landið hvað hita varðar.  Það náðist þó svo að mjög svo hafi kólnað í lok mánaðarins. Greinargott yfirlit má nálgast hjá Veðurstofunni.

Í Noregi er hins vegar talað um hlýjasta nóvember þar í landi frá upphafi mælinga.  Engar vomur eru á Norðmönnum hvað það varðar. 111 ára met ! Fjölmörg hitamet stöðva féllu og við vitann á Svíneyju suður af Þrándheimi mældist hæsti meðalhiti nokkru sinni á stöð í nóvember eða 9,8 m/s.  Þetta er sérlega athyglisvert fyrir þær sakir hvað staðurinn er langt norður með ströndinni. Eldra metið átti vitinn á Líðandisnesi allra syðst í Noregi (eðlilegur staður fyrir mánaðarmet að vetrarlagi). 

Í Svíþjóð, sérstkalega norðantil í landinu var mánuðurinn einnig hlýrri en áður hefur sést.  Í þessu tíðarfari sást heldur varla snjór og jafnvel þótt farið væri hátt til fjalla.  Svipað var umhorfs hér hjá okkur fram undir þann 20.

En hvað olli ?  Hvers vegna var þett hlýtt hér við N-Atlantshaf á víðáttumklu svæði ?  Fyrst er það að telja að fyristöðuhæð var við lýði yfir N-Evrópu lungann úr mánuðinum. Hún kemur ekki síst fram á háloftakortum og hér á eftir fara fjögur slík til skýringa á því hvað var í raun frábrugðið.  Öll eru þau reiknuð út frá veðurgreiningagrunni NOAA.

Hæð 500 hPa flatarins að jafnaði í nóvember 2011. Mikill hryggur frá Evrópu og norður í Skandinavíu, en hálofta lægðardrag er fyrir vestan land.

 

 

 

 

 

Frávik hæðar 500 hPa flatarins í nóv 2011 frá meðaltali (1981-2000). Hér sést vel hvað fyrirstöðuhæðin var afbrigðileg miðað við meðaltalið yfir N-Evrópu og Skandinavíu.  Lægri staða suður af Grænlandi og Ísland lendir þarna nokkuð á milli. Framan af mánuðinum náði áhrifasvæði jákvæða fráviksins einnig yfir Ísland, en síðustu dagarnir (þeir köldu) telja vitanlega til jafns við aðra.

 

 

 

 

Frávik sunnanþáttar vindsins í 850 hPa fletinum í nóvember. Um er að ræða eingöngu sunnanþáttinn í um 1.300 til 1.400 metra hæð og horft fram hjá vestanþætti vindsins.  Við sjáum að sunnanþáttur er afbigðilega sterkur við Írland og Skotland (bláu svæðin eru minni S-átt, klárlega N-átt austast á kortinu).  Þetta þýðir að kröftugt aðstreymi lofts úr suðri var vestan við fyrirstöðuhæðina og mest á milli Íslands og Noregs. Segja má að þarna hafi verið viðvarandi færiband sem beindi suðlægu lofti til norðurs.  Nokkurs konar varmadæla  sem áhrif hafði frá Íslandi í vestri austur til Skandinavíu og langleiðina norður undir Svalbarða. 

Síðasta kortið sýnir frávik hita í 850 hPa fletinum í nóvember. Áhrifamáttur hins sterka S-þáttar kemur vel í ljós með sérlega háum hita í um 1.300 metra hæð yfir Skandinavíu.  Hiti þarna uppi er í ágætu samræmi (oftast) við mældan meðlahitann í 2 m hæð.   

6 - 11 daga spá, 7. til 12. desember

Óhætt er að segja að kuldatíðin ætla að verða viðvarandi hér komandi daga.  Litlar líkur eru á þíðviðri og frostið nokkuð varanlegt að sjá.  Í fyrst lagi gæti hlánað 9 eða 10. desember.  Gæti hlánað segi ég því alls ekki er víst að það náist áður kólnar á ný um þar næstu helgi eins reiknaðar spár bera með sér.              

Veðurspá fram á komandi miðvikudag má sjá hér á vef VÍ

Miðvikudagur 7. desember:

N-lægur eða breytilegur.  Rólegheitaveður og frekar kalt á landinu. Kuldhæð yfir miðju landinu og sennilega éljabakkar snuddandi sums staðar við ströndina. 

Fimmtudagur 8. desember: 

Áfram N-átt í grunninn og herðir á frostinu ef eitthvað er.  Kuldakastið eftir helgi nær líkast til hámarki þarn um og eftir miðja viku.  Él verða með norður- og austurströndinni.

Föstudagur 9. desember: 

Enn hægur vindur.  Hæðarhryggur við landið úr suðvestri og vindur því suðvestlægur í stað N-áttar. Minnkandi frost sunnan- og vestanlands og eitthvað um él vestan- og suðvestantil.  Tunga af mildu lofti með leysingu í skamman tíma fer hratt austur yfir landið seint á föstudag eða snemma á laugardag.

Laugardagur 10. desember:

Ákveðin útsynningur.  Lægð á Grænlandshafi eða Grænlandssundi.  Éljagangur vestantil og hiti um eða rétt undir frostmarki. 

Sunnudagur 11. desember:

Áframhaldandi útsynningur fram á sunnudag og éljagangur vestan- og suðvestanlands. Heldur kólnandi.

Mánudagur 12. desember:

Heldur lítið um að vera hér við landinu, nema það að köldu lofti í vestri og norðri vex ásmeginn.  SV- eða V-átt í grunninn og enn él vestantil á landinu.

Mat á óvissu:

Flest bendir til þess að staða veðurkerfanna verði með þeim hætti langt fram eftir næstu viku að Ísland og nánasta umhverfi verði á áhrifasvæði lægðardrags í háloftunum sem aftur tengist megin kuldahvirfli norðurhvelsins sem spáð er um þessar mundir yfir Grænlandi og hafsvæðunum hér norðurundan. Hefur í för með sér vetrarkulda hér á landi.  Undir helgina er spáð suðlægri bylgju og hæðarhrygg í háloftunum (í stað háloftadrags).  Við það gæti blotað um stund og reyndar er það óvíst.  Helsta óvissan tengist einmitt þessari bylgju sem bægir frá háloftakuldanum um skamma stund. Í kjölfarið  er sennilegast að kuldinn nái aftur yfirhöndinni og þá frekar úr vestri heldur en norðri.  Hér við land því útlit fyrir útsyningsveðráttu um þar næstu helgi.

Kortið sem hér fylgir er frá ECMWF.  Sýnir spá um stöðu 500 hPa flatarins laugardaginn 10 desember. Staðan er nokkuð dæmigerð fyrir útsynningsveðráttu.  Skyggðu svæðin eru staðalfrávik í hæð flatarins í 50 öðrum hliðarkeyrslum dagsins fyrir sama tíma.  Há staðalfrávik þá hér við land þurfa ekki endilega að tákna meiri óvissu, heldur geta þau líka komið fram þegar stigull (gradient) er mikill við landið.  Með örðum orðum þegar mikið er að gerast og skarpir drættir í veðrinu eins og svo gjarnan er við N-Atlantshafið að vetrinum.  

Kuldinn toppar í nótt - æsiveðurfrétt

Það kuldakast sem nú er á landinu nær hámarki í nótt.  Á morgun verður víðast heldur meiri gola sem veldur uppblöndun loftsins, einkum vestantil á landinu og líka í uppsveitum Suðurlands.  Þó gæti hithvarfið við jörð hæglega haldið velli heldur lengur norðanlands og á miðhálendiu og þar á stöku stað verið um og undir 20 stiga frost.

Nú á miðnætti er það helst að segja í æsispennandi keppni á milli stöðva að Þingvellir hafa takið forustuna frá Svartárkoti í Bárðardald með -21,6°C í mesta frost hingað til sem er  aðeins sjónarmun meira á Þingvöllum. En baráttan harðnar og Húsafell í Borgarfirði gæti velgt Þingvöllum undir uggum (afar óviðeigdi orðtak í þessu samhengi !!), en þar nálgast frostið óðfluga 20 stigin. 

Á morgun kemur síðan Brú á Jökuldal og Möðrudalur sterklega inn í myndina.  Á þeim bæjum kalla menn ekki allt ömmu sína þegar kemur að dökkbláum hitatölum og frostið þar vart til frásagnar fyrr en við 25 stigin eða svo....

 

Ekta norðankast og það alvöru !

Búið er að spá mjög slæmu veðri um norðvestanvert landið í kvöld og einkum í nótt.  Ekkert er þar ofsagt held ég.

Sýni hér greiningu frá Veðurstofunni í dag kl. 18, 28. nóv.  Lægðarmiðja er úti af Öxarfirði 958 hPa skv. greiningunni.  Hún hefur verið að þokast til norðausturs í dag og var kl. 15 yfir Melrakkasléttu.  Jafnframt hefur þrýstingur í miðju hennar fallið um sem nemur um  3hPa/3klst þ.e. á milli hverra korta sem greind eru hverja 3. klst. Loftþrýstingur fellur enn. Það sé ég m.a. á loftvogarbreytingunni á Raufarhöfn þrátt fyrir að miðjan hafi fjarlægst aðeins. 

En á á meðan þessu vindur fram er loftvogin farin að stíga lítið eitt í Bolungarvík.  Einkenni á því að kalda loftið úr norðri er farið að þrengja að.  Það er þungt í neðri lögum og veldur hækkun loftþrýstings.  Sá raunveruleiki ásamt því að lægðin er enn að dýpka og hægfara að auki gerir það að verkum að þrýstilínur á veðurkorti flæða að bæði úr vestri og austri.  Þessi staða er alþekkt í N-veðrum þegar milt loft fyrir austan land keyrir inn í heimskautaloftið hér norður undan.  Við það hvessir mjög þarna á milli og að þessu sinni er mesta átakasvæðið frá Eyjafirði vestur um á Strandir.  Skörp skil í hita eru þarna í nokkur hundruð metra hæð yfir sjávarmáli.  Á skilunum líka mikil ofankoma og tiltölulega mildur sjórinn fyrir norðan kyndir enn frekar undir og gefur líka frá sér raka með uppgufun sem aftur eykur enn á úrkomumagnið.

Sannkallað alvöru norðanveður sem varir fram á morgundaginn eða þar til lægðin bæði grynnist og hörfar til norðausturs.