Sökudólgur ragmagnstruflana

Síðustu mínúturnar hefur geysað eldingaveður á Suðurlandi og þær náð að leysa út rafmagn og valda truflunum.

Veðrið suðvestanlands er afar athyglisvert.  Lægðabylgja hefur komið á fleygiferð úr suðri og með henni mjög myndarlegur úrkomubakki sem jafnframt er frekar lítill um sig.  Í tengslum við lægðabylgjuna eru afar skarpar hitaandstæður þar sem sem loftið í háloftunum skammt vestur af landinu hefur verið að kólna mjög ákveðið síðasta sólarhringinn.  Þessi hlýja gusa úr suðri sem svo að segja er kýld inn í kalda loftið veldur uppstreymissprengingu.  Hún á sér einkum stað á afmörkuðu belti í vestanverðu skýjaþykkninu eða á þeim stað þar sem gula röndin kemur fram á ratsjármyndinni frá kl. 20:22.  

Merki ratsjárinnar er þarna öflugt og skýr vísbending um kröftugt lóðstreymi sem aftur veldur niðurslætti eldinga.  Gula bandið virðist hafa myndast við Ölfus og stækkað ört í báðar áttir.  Það er á leið til norðurs.  Lyfting loftsins yfir fjallendið á vafalaust hlut að máli.  

 

6-11 daga spá, 19. til 23. október

Greinilegar breytingar eru í vændum nú eftir helgina, Grænlandshæð byggist upp, en svo merkilegt sem það kann að hljóma eru spálíkönin nokkuð samræmd í sinni niðurstöðu í þeirri viðleitni að brjóta hana aftur niður áður en vikan er liðin.    

Veðurspá fram á komandi miðvikudag má sjá hér á vef VÍ

Miðvikudagur 19. október:

N-átt, nokkuð hvöss með éljum og snjókomu norðan- og norðaustanlands.  Lægð á milli Íslands og Noregs, en hæð að byggjast upp yfir Grænlandi.

Fimmtudagur 20. október:

Hæðarhryggur yfir landinu eða hér nærri.  N-áttin gengur niður og fremur kalt í veðri en jafnframt bjart og fallegt veður víða um land.

Föstudagur 21. október:

Dálítilli lægð er spáð til austurs skammt fyrir sunnan land.  Vindurinn verður því SA- og A-lægur um tíma og heldur hlýnar að nýju.  Rigning sunnan og suðaustanlands, en snjókoma til fjalla.

Laugardagur 22. október:

Lægðabrautinni er spáð fyrir sunnan landið til austurs.  Meinlítið veður hér á landi.  Fremur hæg A-læg vindátt og eiginlega hvorki milt né heldur kalt. Einhver úrkoma sennileg, syðst á landinu og suðaustanlands. 

Sunnudagur 23. október:

Lægð gæti verið á ferðinni fyrir sunnan landið og þá með A- og NA-átt hér á landi.  Mögulega nokkuð hvass.  Rigning eða slydda austan- og síðar norðaustanlands.  Einhver úrkoma í flestum landshlutum.

Mánudagur 24. október:

Snýst í N-átt með kólnandi veðri og hríðarveðri norðan- og norðaustantil. 

Mat á óvissu:

Spáin fyrir miðvikudag og fimmtudag er í nokkru rökréttu framhaldi af því sem reiknilíkönin setja fram með nokkurri vissu framan af vikunni.  Eftir það eykst ósamleitnin stórum. Mesta óvissan liggur í bylgjulögun háloftavindanna eða öllu heldur skotvindsins í 8-9 km hæð, en hann ræður miklu um veðrið hér hjá okkur á þessum árstíma. Sem dæmi um ósamleitnina hvað þetta varðar sýni ég hér tvö kort.  Bæði eru þetta spákort hæðar 500 hPa flatarins fyrir laugardaginn 22. október.  Það efra er úr hádegiskeyrslu ECMWF fimmtudag (13. okt), en hið neðra úr hádegiskeyrslu miðvikudagsins.  Munur á milli þessara spákorta er sem dagur og nótt. Meðan nýrri keyrslan gefur til kynna að til landsins berist milt loft úr suðri er skv. eldri spánni mun kaldara veður.   Nokkuð ljóst er þó að stóra hæðin á Atlantshafinu og oft er kölluð Azoreyjahæðin að henni er spáð því að verða frekar vestarlega á hafinu um þetta leyti.  Það hefur í för með sér að hérlendis verða lægðir á ferð annað hvort skammt fyrir sunnan land til austurs eða að brautin verði frekar til suðausturs og Ísland meira og minni baðað svölu og jafnvel köldu heimskautalofti með norðlægri vindátt. Spákortin eru fengin af vefnum weatheronline.ac.uk.

 

 

 

 

 

 

 

 

 

Alveg hreint dæmigerð októberlægð

Við veðurfræðingarnir sem fylgjumst daglega með veðurkortunum og því sem helst ber þar til tíðinda hér við norðanvert Atlantshafið, komumst ekki hjá því að sjá hluti úr einhverri ótilgreindri fortíð endurtaka sig nánast upp á punkt og prik. Þannig er veðrið hjá okkur eilífar endurtekningar, en þó með ótal blæbrigðum og útúrdúrum.

Lægðagangi hér við við land má mjög gróflega skipta í þrennt.  Í fyrsta lagi þær sem kom úr suðvestri upp að suðurströndinni, með austan hvassvirði þar og rigningu (að haustlagi). Berast síðan undan sterkum vesta eða suðvestanvindi háloftanna austur á bóginn og vindur hjá okkur snýst til NA-átt og með hægt kólnandi veðri. Veðurlag sem þett er feykilega algengt og þá undanskil ég þegar stefnan er svipuð, en brautin það sunnar að viðkomandi lægð kemur ekki við sögu hér með beinum hætti.  Hinn ríkjandi farvegurinn er djúpt úr suðvestri þar sem lægðin dýpkar á Grænlandshafi vestur eða suðvestur af Íslandi. Hitaskil far þá yfir landið með SA-átt, hlýnar mjög í nokkrar klst. með S-átt og ekki líður á löngu að kuldaskilin koma úr vestri með SV-átt í kvölfarið og svalara að nýju. Frávikin frá þessum tveimur meginstraumum falla síðan í þriðja flokkinn sem eðli málsins samkvæmt er fjölbreyttur.

Lægðin sem hér er í dag er alveg dæmigerð fyrir seinni meginflokkinn.

Á spákortinu af Brunni Veðurstofunnar og ættað er úr líkani ECMWF í Reading sjáum við kl. 06 í fyrramálið víðáttumikla lægð á Gænlandshafi.  Hitaskil hennar fara yfir í dag og á undan þeim SA-hvassviðri.  Frekar hlýtt loft verður í kjölfarið á leið norður yfir landið og sumir myndu meira að segja halda fram að það væri mjög hlýtt. Með því allhvöss eða hvöss S-átt og byljótt norðan undir bröttum fjöllum. Ekki ósennilegt að hiti verði  þetta 13 til 15 stig norðan- og norðaustanlands í myrkrinu komandi nótt. Úrkomusvæði kuldaskilanna teygir sig síðan langt suður á Atlantshaf, en allur er sá bakki á austurleið og í kjölfar hans svalari SV-átt sem vara mun næstu daga.  

Yfir Norður-Ameríku, nánar tiltekið Labrador má sjá lægðabylgju og úrkomusvæði.  Hún kemur til með að taka stóran sveig til suðvesturs og síðar til norðurs. Kemur þá og vex inn í þá lægð sem fyrir.  Hvassari S-átt og aukin úrkoma hennar vegna hjá okkur seint á föstudag eða snemma á laugardag.  

Atburðarrás eins og þessi er algeng að haustinu hér og mér finnst nánast óþægilegt að fylgjast með lægðinni og því sem hennir fylgir því mér finnst ég hafa séð hana áður, nánast nákvæmlega í þessari mynd.  Ekki bara einu sinni heldur oft.

6-11 daga spár (6) yfirferð

Í mati á óvissu þegar spáð var fyrir dagana 5. til 10 október var þess getið að mjög sennilega mundi skotvindurinn og þar með lægðabrautin liggja vestur/austur hér fyrir sunnan land þessa dagana.  Óhætt er að segja að það hafi gengið eftir.  Við ákvörðun á spánni var líka tilgreint að öðru spálíkaninu hefði einfaldlega verið hent og þess í stað verið veðjað á einn og sama hestinn svo notað sé líkingamál úr veðreiðum. 

Enn og aftur er matskvarðinn rifðjaður upp. 

3 stig. Spáin gekk eftir í öllum aðalatriðum.  Á það við um stöðu veðurkerfa, vindátt á landinu og einnig þann breytileika veðurs eftir landshlutum sem spáin gat til.  

2 stig. Spá gekk eftir að sumu leyti, en öðru ekki.  Staða veðurkerfa er a.m.k. í áttina og hitafar með þeim hætti sem spáin gaf til kynna.  Vindátt var e.t.v. ekki sú sama eða greinileg tímahliðrun veðurkerfa. 

1 stig. Ekki hægt að segja að spáin hafi ræst og flest með öðrum hætti, en þó a.m.k. einn tilgreindur veðurþáttur eitthvað í áttina (staða kerfa, vindátt, hiti eða úrkoma).

0 stig. Veður nánast alger andstæða spárinnar að flestu eða öllu leyti. 

Miðvikudagur 5. október:

NA-átt, fremur hæg.  Slyddu- eða snjóél norðan- og norðaustanlands, en bjart syðra.  Frost víða um kvöldið og nóttina.

Eins og venjulega er miðað við veður eins og það var kl. 12 og er það gildistími kortsins. Vindáttin passar vel við spánna, þ.e. NA-átt. Ein er hún ekki hvöss og fremur hæg, í það minnsta annars staðar en á Vestfjörðum. Slydduél voru norðantil rétt eins og í spánni, en hins vegar var bjart syðra. Eins frysti almennt séð ekki um nóttina.  Ágæt spá, en nær ekki smæstu dráttum. 2 stig. 

 

 

 

 

 

 

 

Fimmtudagur 6. október:

Mikil hæð verður langt fyrir sunnan landið og kemur hæðarhryggur til með að teygja sig í áttina til landsins.  Hæglætisveður og svalt á landinu framan af, en síðan nálgast lægð þvert úr suðvestri og beinir til okkar mildara og rakara lofti úr suðri og suðvestri að nýju.  Rigning sunnan- og vestantil.

Hæðin er til staðar, en heldur fjarlæg.  Ekki hæglætisveður, heldur N-átt.  Þó hæglæti þegar leið að kvöldi.  lægðin sem tala var um var heldur ekki til staðar.  Frekar vond spá, en alls ekki alvitlaus.  1 stig. 

 

 

 

 

 

 

 

 

Föstudagur 7. október:

S-læg vindátt og frekar rólegt um að litast í veðrinu.  Fremur milt, þokusuddi sunnan og suðvestanlands, en þurrt norðan og norðaustantil.

Það má segja að spáðu veðri á föstudag hafi lekið yfir laugardag, en kannski er það tilviljun !  Ekki S-átt fyrr en líða tók á daginn.  Að teknu tilliti til þess að í raun var atburðarrásin nokkuð rétt en greinileg 12 til 18 tíma hliðrun í henni, mákannski segja að spáin hafi verið allgóð.  Af því að það var vissulega rólegt hvað sem annars má segja eru 2 stig fyrir föstudag.

 

 

 

 

 

 

 

Laugardagur 8. október:

Mögulega fer lægð yfir landið eða því sem næst.  E.t.v. verður hún á ferðinni heldur fyrr, jafnvel strax á föstudag.  Þá allhvass vindur á milli S og V og úrkomusamt um landið vestanvert.  Fer hratt yfir landið enda verða til staðar sterkir vestanvindar í háloftunum.

Þarna næst í skottið að nýju í atburðarrásinni.  Ég held að ekki sé hægt að komast nær í spánni.  lægð eða öllu heldur skil hennar á fleygiferð yfir landið. Klárlega  3 stig.

 

 

 

 

 

 

 

 

 

Sunnudagur 9. október:

Skammvinn N-átt með kólnandi veðri um skamma hríð, en milda loftið nær fljótt aftur yfirhöndinni með SV-vindi.

N-átt klárlega, en svo geta menn deilt um það hvort hún hafi verið skammvinn (sem hún var ekki í raun.) Hlýja loftið náði heldur ekki yfirhöndinni heldur var víða frost um nóttina. 1 til 2 stig ?  Í spánni er kannski of mikið sagt, því ef talað hefði verið eingöngu um N-átt með kólnandi veðri hefði niðurstaðan litið mun betur úr. 

 

 

 

 

 

 

 

Mánudagur 10. október:

SV- eða V-lægt loft yfir landinu.  Frekar að það verði svalt, en milt.  Enn er vænst úrkomu vestantil, en þurru norðaustan- og austanlands. 

Spá nánast út í hött. Reyndin var N og NV-átt.  Engin úrkoma vestantil, heldur bjart og fallegt veður þar.  Aftur á móti úrkoma Norðaustanlands.  Hins vegar var V-loft yfir landinu og frekar svalt heldur en hitt og því 1 stig fyrir allt. 

 

 

 

 

 

 

 

Niðurstaða: 

Hálf sérkennileg útkoma og vegna þess hve breytingar voru örar hittist stundum á rétt veður, en þess á milli var það nokkuð fjarri.  Dálítið merkilegt, en samt sem áður var spáin um stóru myndina allgóð, þ.e. um meginlægðabrautina og mikil umskipti nokkuð rétt. Samlagningin segir 10-11 stig að þessu sinni.

Siðferðisleg þversögn í loftslagsmálum

Þau urðu fleyg eftirfarandi ummæli Myles Allen frá eðlisfræðideild Oxford Háskólans fyrir nokkrum árum: " It took us 250 years to burn the first half trillion, and on current projections we'll burn the next half trillion in less than 40 years."

Allen er þarna vitanlega að vísa til bruna jarðefnaeldneytis og frá upphafi nýtingar kola og síðar olíu tók það mannkyn 250 ár að brenna samsvarandi magn og ætla má að verði notað sem orkugjafi næstu 40 árin.

Á dögunum var tilkynnt um fund nýrrar gríðar mikillar olíu- og gaslindar í Norðursjónum í norskri lögsögu.  Mikill fögnuður greip um sig meðal Norðmanna sem sjá fram á áframhaldi olíuævintýri eins og þeir kalla sjálfir olíuvinnslu sína.  Á sama tíma telja þeir sig vera ábyrga í afstöðu sinni til hnattrænnar hlýnunar og taka fullan þátt í þeirri alþjóðlegu stefnumörkun sem kveður á um að dregið skuli úr losun gróðurhúsalofttegunda.  Þá er oft vísað til þess að halda megi hnattrænni hlýnun neðan tveggja gráðu hlýnunarmarkið sem skilgreint hefur verið af loftslagsnefnd Sameinuðu þjóðanna (UNFCC). 

Fyrir loftslagsfund Sþ. í Kaupmannahöfn rétt fyrir jólin 2009 sýndi Potsdam-loftslagsstofnunin með Stefan Rahmsdorf í fararbroddi fram á það að til að ná halda sig undir 2°C markinu mætti ekki brenna meira en innan við helming nýtanlegra birgða jarðefnaeldsneytis sem þá voru þekktar. Í raun eru þetta tiltölulega einfaldir útreikningar þar sem menn vita upp á hár hve hvert tonn af olíu, kolum og jarðgasi gefur af CO2 út í lofthjúpinn við bruna.  Í framhaldinu spáðu menn hvernig sú aukning  koltvísýrings á breytt geislunarálag lofthjúps hefði áhrif á meðalhitastig jarðar og er sú spá byggð á bestu vitneskju og þekkingu eins sagt er.

Norðmenn eru í siðferðislegri klemmu með alla þessar olíu- og gaslindir.  Óhreyfðar olíulindir menga vissulega ekki og valda þar með ekki auknum gróðurhúsaáhrifum.  Til að hreinsa samvisku sína eða a.m.k. að reyna það, er gríðarlegum upphæðum varið í þróun á aðferðum við að dæla koltvísýringi niður í bergrunninn, einkum neðansjávar.  Hugmyndin er sú að koma koltvísýringshluta einkum jarðgassins aftur fyrir þaðan sem því var dælt upp. Göfugt verkefni vissulega, en þrífst á því að áfram verði dælt upp olíu og gasi til brennslu í heiminum.  Á milli 40 og 60 milljarðar (íslenskra króna) hafa á síðustu tveimur árum farið í slík niðurdælingarverkefni sem álíka upphæð og varið var til allra verkefna samanlagt í landinu við að auka hlut endurnýjanlegra orkugjafa sem og almennra orkusparandi aðgerða í samfélaginu.

Til viðbótar hafa Norðmenn sett gríðarmikla fjármuni til verndunar regnaskóga í S-Ameríku.  Slíkt hefur einfaldlega verið stefna stjórnvalda og hún vitanlega einnig í þeim tilgangi að friða samviskuna sitjandi á öllum þessum olíu- og gaslindum á sama tíma og eingin hörgull er heima fyrir endurnýjanlegum orkugjöfum, sérstaklega vatnsafli. Á því sviði eru Norðmenn einnig stórir orkuútflytjendur.

Eina raunhæfa leiðin að mínu mati til að ná markmiði Sþ um +2°C markið er að hverfa markvisst frá jarðefnaeldsnyti yfir í endurnýjanlega orkugjafa eins og vatnsafl, vindorku, beinnar sólarorku, sem og  öldu, strauma eða sjávarfallaorku.  Þessar orkulindir eru gríðarstórar og sumar að mestu alveg ónýttar.  Þarna liggur mikil áskorun fyrir heimsbyggðina, líka fyrir Norðmenn og ekki síður okkur Íslendinga.   

Myndin er frá Sleipnissvæðinu í Norðursjónum, um 250 km frá landi og sýnir mikil mannvirki út frá borpallinum sem nýtt eru til niðurdælingar á koltvísýringi sem berst með gasinu.  Fyrir áhugasama er nánari umfjöllun Statoil um þessi mál hér.

 

 

Sló í 56 m/s undir Hafnarfjalli fyrr í morgun

Þó ekkert sé neitt óvanalega hvasst á undan skilum lægðarinnar sem nú gengur yfir landið hefur heldur betur blásið hressilega undir Hafnarfjalli í morgun.  Á mæli Vegagerðarinnar var vindur nokkuð stöðugur um 30 m/s.  Þessi mikla veðurhæð varði í um 2 klst. og kannski ríflega það. Það sló í hviðu með þessu upp undir 56 m/s um kl. 08 eins og sjá má á vindritinu af síðu Vegerðarinnar.  Stöð Veðurstofunnar á Hafnarmelum hefur ekki sent upplýsingar í morgun og samamburður það ekki tiltækur.

Ekki er gott að segja svona við fyrstu sín hvað veldur að talsvert hvassara er undir Hafnarfjalli en þrýstisviðið gæfi ef til vill tilefni til.  Loftið virðist vera fremur stöðug, þ.e. lítið hitafall með hæð upp fyrir brúnir fjalla a.m.k.  Heldur er ekki ólíklegt að fjallabylgjur eigi líka hlut að máli, að ein slík hafi brotnað fram yfir sig og vindorkan að ofan streymi niður hlémegin Hafnarfjalls. 

Skarpir drættir í nýsnævinu norðanlands

Eftir að létti til í dag beið ég í ofvæni eftir ljósmyndum utan úr geimi. Áætlun MODIS-tunglanna í dag var okkur ekki sérlega hagstæð.  Bæði AQUA- og TERRA-tunglið mynduðu Ísland í ytri ramma og því er landið ýmist hálft eftir daginn eða þá bjagað. 

Samt sem áður sést vel hve fjöllin við Eyjafjörð, á Tröllaskaga og í Fjörðum og á Flateyjardal eru snævi þakin eftir hretið um miðja vikuna.  Skaginn er lágur og nánast má lesa frostmarkslínuna þar sem fjöllin hækka inn til landsins.  Víst er að ofan ákveðinnar hæðar er kominn talsverður snjór og mótar vart fyrir klettabeltum eða auðum svæðum á þessari mynd.  Skuggar eru vissulega líka teknir að lengjast og sjást vel.  AQUA-tunglið náði myndinni í dag kl. 13:50  þar sem norðanvert landið er í suðurjaðri hennar. Svarfaðardal og Skíðadal má líka nánast teikna upp út frá snjónum sem og fleiri !

6-11 daga spá, 12. til 17. október

Langtímaspáin fer hér á eftir eins og undanfarna fimmtudaga. Það er langt því frá að verið sé að spá einhverjum rólegheitum.  Lægðir verða við landið ef af líkum lægur áfram rétt eins og undanfarna daga.  

Veðurspá fram á komandi miðvikudag má sjá hér á vef VÍ

Miðvikudagur 12. október:

Lægð sem dýpkar á Grænlandshefi beinir til okkur mildu lofti.  SA-átt, hvöss eða jafnvel stormur á undan skilunum og rigning um mest allt land, einkum sunnantil.

Fimmtudagur 13. október:

Sama lægðin verður enn fyrir vestan landið og þá komin SV- eða jafnvel V-átt með nokkuð svalara veðri.  Þó alls ekki hægt að segja að það verði kalt miðað við árstíma. Skúrir vestan- og sunnantil, en bjart norðaustan- og austanlands.

Föstudagur 14. október:

Enn lágþrýstingur fyrir vestan og suðvestan landið og með svipuðu veðri.  Þó  gæti hæglega verið bylgja á ferðinni úr suðvestri og þá samfelld rigning um tíma a.m.k. sunnan- og suðvestanlands og vindur meira S-stæður á meðan.

Laugardagur 15. október:

Ný lægð af einhverju tagi við sunnan eða suðvestanvert landið og SA- eða A-átt og enn væta, sérstaklega sunnan- og suðaustantil.  Heldur hlýnandi á ný.

Sunnudagur 16. október:

Snýst í NA-átt um leið og þessi nýja lægð hreyfist norður eða norðaustur yfir landið (eða með ströndinni) Kólnar og slydda eða snjókoma norðaustan- og austanlands.

Mánudagur 17. október:

Trúlega enn ein lægðin upp að landinu úr suðvestri strax á mánudag.  Mögulega þó dagur með hléi á milli og lægðin þó ekki fyrr en á þriðjudag, en hitt er ekki síður líklegt miðað við þá stöðu sem uppi er. 

Mat á óvissu:

Bæði stóru spálíkönin, austan hafs og vestan eru ótrúlega samhljóða um þróun mála hér þessa daga.  Yfirgnæfandi líkur eru á því að loftþrýstingur verði lágur við landið og að sama skapi úrkomusamt.  En eins og alltaf þegar lægðirnar koma hver á fætur annarri, en óvissan mest varðandi tímasetningar og þar getur skeikað miklu þegar upp er staðið, þó svo að í öllum megindráttum gangi spáin um "stöðuna" eftir. Þó mikill samhljómur sé á milli líkana að þessu sinni þarf það ekki endilega að merkja sérstakan gæðastimpil á spánum.  Vel kann að vera að í líkönin sé innbyggður svipaður vanmáttur til að höndla tiltekin en óskilgreind fyrirbrigði einhvern tímann í ferlinu. En slíkt verður bara að koma í ljós, nú sem endranær í þessum spábransa.

Mikil úrkoma norðanlands

Hún hefur verið einkar drjúg úrkoman sums staðar norðanlands síðustu tvo sólarhringana og rúmlega það.  Um 110mm á Ólafsfirði og litlu minna á Tjörn í Svarfaðardal. Við utanverðan Eyjafjörðinn var hiti sem betur fór aðeins yfir frostmarki og því rigndi í byggð.  Til fjalla er samkvæmt þessu því kominn allmikil snjór, þ.e. ofan 300-400 metrar hæðar.

Nú er að birta til og gaman væri að geta sýnt myndir af af snævi þöktum fjallshlíðum  á þessum slóðum.  Má senda mér á [e-mail].

Nokkrar veðurstöðvar til landsins í Þingeyjasýslum (og Torfum í Eyjafirði) gefa upp snjóhulu í byggð í morgun. Einnig þá mælda snjódýpt. Í Svartárkoti fremst í Bárðardal var þannig getið um 16 sm jafnfallinn snjó. 

6-11 daga spár(5) - yfirferð

Um síðustu helgi var glímt við lægðagang.  Spáin í sjálfu sér ekki alvitlaus, en fasamunur  til staðar, þ.e. lægðirnar seinkuðu sér miðað við spárnar. Þó var braut þeirra og far við landið allvel fyrirséð. En að vanda er viðmiðunar stigagjöfin rifjuð upp. 

3 stig. Spáin gekk eftir í öllum aðalatriðum.  Á það við um stöðu veðurkerfa, vindátt á landinu og einnig þann breytileika veðurs eftir landshlutum sem spáin gat til.  

2 stig. Spá gekk eftir að sumu leyti, en öðru ekki.  Staða veðurkerfa er a.m.k. í áttina og hitafar með þeim hætti sem spáin gaf til kynna.  Vindátt var e.t.v. ekki sú sama eða greinileg tímahliðrun veðurkerfa. 

1 stig. Ekki hægt að segja að spáin hafi ræst og flest með öðrum hætti, en þó a.m.k. einn tilgreindur veðurþáttur eitthvað í áttina (staða kerfa, vindátt, hiti eða úrkoma).

0 stig. Veður nánast alger andstæða spárinnar að flestu eða öllu leyti. 

Miðvikudagur 28. september:

Lægð verður á leið til austurs fyrir sunnan landið með A- og NA-átt og rigningu um suðaustan- og austanvert landið. Vestanlands rofar til.  Fremur milt í veðri.

Vissulega lægð fyrir sunnan landið og vindur af A og síðar NA þennan dag.  Mikil rigning var suðaustanlands.  Nær held ég að vert sé hægt að komast í spánni og klárlega 3 stig.

 

 

 

 

 

 

Fimmtudagur 29. september:

Víðáttumikið háþrýstisvæði verður samkvæmt spánni staðsett yfir Bretlandseyjum og þar í kring.  Mikil sunnanvindröst í háloftunum norður yfir Ísland.  Gert er ráð fyrir að kröpp lægð verði á hraðri leið til norðurs yfir landið eða skammt hér vesturundan.  Þá með hvassviðri og mikill rigningu um tíma.

 Háþrýstingurinn yfir Bretlandseyjum var á sínum stað strax á fimmtudag og hann það mikill að hitamet voru slegin þar um helgina.  Krappa lægðin sem talað er um er ekki sjáanleg.  Hún var hins vegar raunin dálítið seinna, eða á laugardag.  Alveg má helda fram að stóra staða veðurkerfana haldi í öllum megindráttum.  Eina sem vantar upp á er að lægðinni var spáð 1/2 til 1/1 degi og snemma.  Þess vegna í raun ágætis spá, þó nokkuð vanti upp á í smáatriðum. 2 stig.

 

 

 

Föstudagur 30. september:

Í kjölfar lægðarinnar kröppu snýst vindur um skamma hríð til V- og SV-áttar og dregur úr mestu hlýindunum á meðan. Úrkoma vestantil á landinu, en rofar til eystra.

Sama hér.  Spáin er á undan áætlun og SV-áttin skilar sér daginn eftir.  Þó veður nákvæmlegar á föstudag sé alveg úr fasa er spáin engu að síður rétt sé tekið tillit til sömu seinkunnar.  Óréttmæt annað en að gefa hér 2 stig, þó svo að ýmsir mundu gjaldfella spánna niður úr öllu þar sem veðrið hittir engan veginn á laugardaginn, segjum t.d. fyrir brúðhjón sem lögðu allt undir veðurspána síðdegis þennan dag !

 

 

 

 

Laugardagur 1. október:

Nokkrar líkur eru til þess að hæðin yfir Bretlandseyjum skjóti kryppu í áttina til okkar.  Enn SV-átt, en fer aftur hlýnandi.  Enn verður fremur úrkomusamt um landið vestanvert, en sólríkt annars staðar.

 

Kryppan á hæðini var til staðar, en þó lítið eitt seinna en þetta kort segir til um.  SV-átt á landinu og væn hlýindi að auki.  Úrkomsamt var vissulega vestanlands og reyndar einnig á Suðurlandi. Ekki hægt að segja annað en að spáin hafi verið vel viðundandi, þó fullkomin sé hún ekki.  2 stig. 

 

 

 

 

 

 

Sunnudagur 2. október:

Háþrýstingurinn færist enn nær og miðjan fyrir sunnan eða suðaustan landið.  Þá berst hlýtt loft sunnan úr höfum, gætu jafnvel orðið óvenjuleg hlýindi miðað við árstíma. Fremur smávægileg úrkoma (þoka ?) suðvestanlands, en annars léttskýjað.

 Alls engin háþrýstingur, heldur lægð við landið.  Hins vegar passar ágætlega að streymi lofts er sunnan úr höfum.  Smávægileg úrkoma var ekki, heldur mígaandi rigning og heldur ekki léttskýjað norðantil. 1 stig.

 

 

 

 

 

Mánudagur 3. október:

Litlar breytingar á á mánudag frá sunnudegi.

Svo sem ekki miklar breytingar á milli daga, en spáin átti þó við annað veður en hér má sjá. Þó ekki alveg galin spá. 1 stig hér einnig.

 

 

 

 

 

 

 

Niðurstaða:  11 stig af 18 mögulegum.  Ágæt spá, en fellur nokkuð  í virði við þá seinkun sem var frá spá til raunveðurs í dögum talið.