6-11 daga spár yfirferð (2)

Nú er komið að annarri yfirferð 6-11 veðurspánna og að þessu sinni fyrir dagana 7.  til 12. september. Eins og greint var frá í síðustu viku er stuðst við eftirfarandi huglægan matskvarða þar sem hver dagur er skoðaður sérstaklega:

3 stig. Spáin gekk eftir í öllum aðalatriðum.  Á það við um stöðu veðurkerfa, vindátt á landinu og einnig þann breytileika veðurs eftir landshlutum sem spáin gat til.  

2 stig. Spá gekk eftir að sumu leyti, en öðru ekki.  Staða veðurkerfa er a.m.k. í áttina og hitafar með þeim hætti sem spáin gaf til kynna.  Vindátt var e.t.v. ekki sú sama eða greinileg tímahliðrun veðurkerfa. 

1 stig. Ekki hægt að segja að spáin hafi ræst og flest með öðrum hætti, en þó a.m.k. einn tilgreindur veðurþáttur eitthvað í áttina (staða kerfa, vindátt, hiti eða úrkoma).

0 stig. Veður nánast alger andstæða spárinnar að flestu eða öllu leyti. 

Til samanburðarins er sótt veðurgreining, hádegisveðurkort með jafnþrýstilínum af Brunni VÍ.

Miðvikudagur 7. og fimmtudagur 8. september:

Snörp N-átt frá lægð sem er spáð fyrir austan land. Haustsvipur er á þessari lægð og heldur kólnar með henni einkum þegar frá líður. Mögulega gránar í fjöll NA- og A-lands.

Lægðin fyrir austan land og N-hret. Ekki aðeins gránaði í fjöll, heldur snjóaði. Varfærið orðalag þetta snemma haustsins.  Góð spá og 3 stig. 

 

 

 

 

 

 

 

 

Sama hér lægðin tók að hægja á sér fyrir norðaustan land og hélt við N- (NV-áttinni) og kuldanum og hretinu.  Einnig 3 stig hér.

 

 

 

 

 

 

 

 

Föstudagur 9. september:

Ný lægð upp að suðvesturströndinni með hvassri SA-átt og rigningu um mest allt land.   Hlýnar aftur.

Engin hlýindi hér og heldur ekki lægð sjáanleg við suðvesturströndina.  Ekkert varð af myndun slíkrar við Hvarf þetta snemma.  Spáin alger andstæða við veðrið. Hún var afspyrnu vond og því 0 stig.

 

 

 

 

 

 

 

 

Laugardagur 10. september:

Áhrifa mun enn gæta frá þessari djúpu lægð við landið.  Annað hvort nokkuð hvöss SV-átt eða þá NA-átt (í því tilviki að sjálf lægðarmiðjan verði austar) Úrkomusamt og kólnar heldur á ný. 

Þar sem lægðinni sem ætlað var að mundi myndast er hvergi sjáanleg er veðrið með allt öðum hætti.  NA-átt var og mjög þurrt í stað úrkomu sem vænst var.  0 stig.

 

 

 

 

 

 

 

 

Sunnudagur 11. september:

Rólegra veður, mögulega hæðarhryggur yfir landinu eða hér í grenndinni með bjartara veðri og þá líklega næturfrosti. 

Hæðarhryggurinn sem talað er hér um var daginn áður, kannski ekki sá sami.  Þó ekki beinlínis rólegheitaveður, en 1 stig fyrir bjart veður og næturfrost sem vissulega mældist. 

 

 

 

 

 

 

 

 

Mánudagur 12. september:

Reiknað er með að fellibylurinn KATIA gæti lónað hingað norður eftir og þess vegna orðið að myndarlegri læg hér suður eða suðvesturundan fljótlega eftir aðra helgi.  Það er þó háð fjölmörgum óvissuþáttum  m.a. að fellibylurinn komi ekki að landi í Ameríku sem enn er alveg óljóst. En líkurnar eru vissulega einhverjar og spálíkönin hafa ítrekað allra síðustu daganna reiknað djúpa lægð upp úr KATIA um þetta leyti.  

Þótt ótrúlegt megi virðast var því spáð að KATIA yrði á ferðinni hér við norðanvert Atlantshaf þennan dag með 11 daga fyrirvara !  Lægðin upp úr þessum gamla fellibyl fór yfir Skotland og kannski ekki til þess ætlast að hægt væri að reikna nákvæma braut með alla þá óvissuþætti sem koma við sögu. Miðað við allt og allt er hér óhætt að gefa 2 stig fyrir spá mánudagsins.  Fullt hús ef brautin hefði orðið nær Íslandi.         

 

 

 

Niðurstaða:  9 stig af 18 mögulegum.  Megnið að spágetunni var fyrstu 2 dagana en eftir það varð óvissan meiri en svo að fékkst við ráðið.  Þó var það vart nein tilviljun að spálíkönin reiknuðu dýpkun fellibyljaleifanna á hárréttum tíma með þetta margra daga fyrirvara, en þann usla sem  KATIA ein og sér veldur í veðurkerfum okkar breiddargráða er næg til að setja allt úr skorðum þegar langtímaspár er eru annars vegar.  þ.e.  litla þúfan sem veltir þunga hlassinu. 

Fokmistrið suðvestanlands frá Hagavatni

Um helgina benti ég á það að hvimleitt sandmistrið í lofti væri ekki allt upprunið frá öskusvæðum Suðurlands.  Vissulega hefur eldfjallaösku þar lagt yfir byggðir og ból, bæði frá Markarfljótsaurum og Eyjafjallajökli og ekki síður ofan af Vatnajökli í grennd við Grímsvötn, eins og Hálfdán Ágústsson benti réttilega á sl. laugardag í veðurfregnum Sjónvarps. 

Meðfylgjandi tunglmynd er sk. MERIS gervitunglamynd (frá ESA, Evrópsku geimstofnuninni) af landinu í dag 12. september (kl. 11:54).  Þetti er þriðji dagurinn sem þessi ófögnuður sem sandurinn, leirinn og askan fyllir loftið sunnan- og suðvestanlands. Þessi mynd er nokkuð mögnuð. Hún sýnir gjósku- og jarðvegsfokið yfir landinu sunnan- og vestanverðu mæta vel. M.a. afmarkaðan straum frá
Grímsvötnum og eins frá uppblásturssvæðum sunnan Langjökuls og leggur þann taum yfir Reykjanesfjallgarðinn og Höfuðborgarsvæðið.

Mbl.is hefur verið að fjalla um mistrið í dag og birti tengil á þessa sömu mynd. Eins tekið fram að fokið hér og það svifryk sem mælist hátt er alfarið af náttúrlegum orsökum, engin mengun, ekki bílar eða neitt slíkt eiga þarna sök.

Fyrir tæpum tveimur árum eða um 20. nóvember 2009 gerðan áþekkan atburð hér suðvestanlands í þurru veðri sem fjallað var sérstaklega um.  Þá var vísað í frétt af vef Orkuveitunnar frá 2007.  Hún fer hér að neiðan í heild sinni og útskýrir þann vanda sem við er að glíma nokkuð afmörkuðum upptakasvæðunum suðvestan Hagavatns. 

Við gjóskunni er lítið hægt að gera annað en að biðja um snjó sem kaffærir skaflana upp á Vatnajökli og mikilli rigningu og skolun í byggð, en af henni höfum við haft heldur lítið undanfarna mánuði.  

Hagavatnsbotninn má e.t.v. græða upp, en í það minnsta er æskilegt að fá umræðu og tillögur um aðgerðir til að koma í veg fyrir sí endurtekið fok úr þessum gamla vatnsbotni. Það er ljóst að vandinn er ekki nýr af nálinni og hann hverfur heldur ekki í nánustu framtíð.  Annað sambærilegt svæði og tiltölulega lítið um sig er Sandkluftavatn (eð þurr botn þess) við Uxahryggjaleið en úr honum fýkur úr eftir þurrkatíð.

"

Samstarf um endurheimt Hagavatns

12.11.2007

Landsgræðsla ríkisins, Bláskógabyggð, landeigendur Úthlíðartorfunnar og Orkuveita Reykjavíkur hafa ákveðið að hafa með sér samstarf um könnun á möguleikanum á því að endurheimta eldri stærð Hagavatns. Öðrum hagsmunaaðilum verður jafnframt boðið að taka þátt í samstarfinu.

Botn gamla Hagavatnsins var eins og eyðimörk yfir að líta sl. sumar
Markmið endurheimtar Hagavatns er að hefta sandfok á upptakasvæði þess sunnan Langjökuls og verða möguleikar á raforkuframleiðslu þar kannaðir samhliða.

Umfangsmesta rannsóknin á þessum möguleika fór fram fyrir áratug þegar Landsgræðslan stóð fyrir mati á umhverfisáhrifum stækkunar vatnsins með stíflugerð. Ekki varð af framkvæmdum þá.

Hagavatn minnkaði um a.m.k. tvo þriðju í jökulhlaupum á síðustu öld og við það opnuðust stór svæði sem  úr fýkur jökulleir og sandur.

Sveitarstjórn Bláskógabyggðar og áður Biskupstungnahrepps hefur ályktað um mikilvægi þess að færa yfirborð Hagavatns til fyrra horfs til að hefta sandfok og tryggja árangur annars uppgræðslustarfs sem hún hefur tekið þátt í um árabil m.a. í samstarfi við Landgræðslu ríkisins. Í því augnamiði átti sveitarstjórn þátt í því að ráðist var í mat á umhverfisáhrifum endurheimtar Hagavatns árið 1997.

Í þurrkum síðastliðins sumars var uppblástur sérstaklega mikill og þéttur uppblástursmökkur lá yfir byggðinni í Bláskógabyggð svo dögum skipti.

 

Af mjög svo þurru lofti yfir landinu sunnanverðu

Loftið sem hefur leikið um okkur síðustu tvo sólarhringana sunnan- og suðvestanlands er ekki aðeins "óhreint" af öskufjúki heldur líka  sérlega þurrt.  Tók eftir því í gærdag að þá voru sumar veðurstöðvar að mæla allt niður í 20% raka. Sé að Trausti Jónsson er líka að velta þessu fyrir sér og ágætt að skoða líka hans umfjöllun.

Rakastigið er kannski ekki heppilegur mælikvarði þar sem það sveiflast svo mjög með dægursveiflu hitans.  Eiginlegt rakainnihald loftsins er hins vegar hægt að reikna út frá hitanum og rakastiginu, nú eða út frá daggarmarki loftsins og hita.  Hér er t.a.m. ágætis reiknivél til þessara hluta.  Hún biður líka um loftþrýsting en hann sveiflar örlítið til rakagildum öðrum er rakastiginu.

Tökum dæmi frá Þingvöllum af vef Veðurstofunnar, en lengst af í gær var daggarmark loftsins um -10°C (blái ferillinn) og um tíma reyndar -12°C.  Þarna skiptir hiti ekki máli heldur segir daggarmarkið til um raunverulegan raka.  Í gær þegar hvað þurrast var reyndist rakainnihaldið því um 1,3 grömm á kg lofts. Það er óskaplegar lítill raki verður að segjast.  Til samanburðar skulum við horfa á hinn enda línuritsins frá Þingvöllum, þ.e. 5. september þegar daggarmarkið var um +8°C.  Það er dæmigert sumargildi og samsvarar um 6,7 grömmum vatnsgufu á hvert kg. lofts. 

Í gær var rakainnhaldið því ekki nema 1/5 þess sem það var fyrir tæpri viku.  Í þessu sambandi er áhugavert að kanna hvaðan þetta mjög svo þurra loft er upprunið og enn og aftur er stuðst við reiknitól HYSPLIT.  Við sjáum ferilinn yfir stað nærri Þingvöllum og reiknað er 72 klst aftur í tímann.  Loftið er upprunið hér langt norður frá og þaðan komið ofan af Grænlandsjökli.  Þurrari loftmassa en þaðan eru vandfundir á þessum árstíma, en þekkt er hvernig skraufþurrt heimskautaloftið fær meiri útbreiðslu yfir háfíssvæðum á útmánuðum eða vorlagi og berst þannig til okkar, flestum til leiðinda. 

Neðri ferillinn sýnir rakastig loftsins og aftur verðum við að gæta að okkur með rakastigið.  Lesið er frá hægri til vinstri.  Fyrst í stað uppi á Grænlandsjökli er rakastigið sagt vera 90%.  Það fellur síðan hratt þegar loftið streymir niður af jöklinum vegna þess að það hlýnar við niðurstreymið. Rakastigið helst um 35-40% suður með strönd Grænlands og yfir hafið að norðurströnd landsins. Athugið að hæð loftpakkaans yfir sjávarmáli getur sveiflast. Rakastig hækkar síðan heldur við lyftinguna yfir hálendið (loftið kólnar) og endar hlémegin í 200 metra hæð í 32 %.

Í dag endurtók ég leikinn (ekki sýnt). Ívið meiri raki er í loftinu þó vissulega sé það mjög þurrt enn, en uppruninn er líka frekar af Íshafsvæðunum við Svalbarða, frekar en að vera þvingað með niðurstreymi ofan af Grænlandi (þó ekkert útilokað að þar hafi a.m.k. hluti þess verið áður !).

Viðbót:  Grautaði aðeins í gömlum tilvikum í leit að álíka þurru lofti þetta snemma haustsins.  Á Þingvöllum frá 1997 er ekkert tilvik með jafn þurrt loft og mældist nú (10. sept)  á mælakvarða daggarmarks.  Lægst var -12,2°C í gær, en finna má lægra -13,4 í daggarmarki 29. september 2004.  Ekkert kemst nærri því sem nú er svo snemma sem fyrir miðjan september.   sumrinu eða fyrstu vikuna í júni má finna á síðustu árum tilvik álíka þurru lofti.

Í Reykjavík má leita allt aftur til ársins 1949. Í 10. sept var lægsta daggarmark í athugun með sk. votum mæli -9,7°C.  Í safninu má finna örfá tilvik með hærri gildum, en þau eru greinilega rangfærð. Það er ekki fyrr en alveg undir blálok mánaðarins þegar tekið er að kólna að ráði norðurundan að álíka þurrviðri getur orðið vart. 

Sama hvernig á málið er litið að þá er þurra loftið nú afar óvenjulegt á þessum árstíma.

 

Ekki bara gosaska sem fýkur í þurrum vindinum

 

Meðfylgjandi tunglmynd er með þeim magnaðri sem maður sér af landinu okkar. Hún er tekin kl. 13:27 í dag (9. sept.).  Hana má stækka með tvísmellun. Áberandi og miklir sandstrókar af Suðurlandi ná langt á haf út. Mökkurinn fyrir austan Mýrdalsjökul er klárlega öskufjúk.  Vindur í lofti var þó ekki sérlega hvass, vart nema 8-10 m/s, en þrátt fyrir það var verulega takmarkað skyggni í veðurathugun á Kirkjubæjarklaustri eða ekki nema 1 km kl. 12 á hádegi. Annar er síðan yfir eða skammt austan Vestmannaeyja. Þar leggur farvegur Markarfljóts til drjúgan hluta. Sá þriðji er síðan enn vestar og það er mjög afmarkaður sandstrókur.  Hann er ekki af öskuuppruna, heldur eru upptök hans á jökulaurunum suður af Langjökli og síðan bætir í á sandinum við Ölfusá ofan Þorlákshafnar og þar um slóðir.

Einkennilegt að sjá hvað kjarninn heldur sér og er sýnilegur langt suður af landinu.  Reiknaði feril til samanburðar í HYSPLIT líkaninu frá kl. 12 í dag til næstu 12 tíma frá stað suður af Langjökil eða hér um bil. Ferillinn er keimlíkur þeim sem MODIS myndin sýnir. 

Tunglmyndin sem Ingibjörg Jónsdóttir rétti upp og sendi mér sýnir líka fleira ef vel er að gáð.  Nýsnævið í fjöllunum beggja vegna Eyjafjarðar sést vel í undir þunnri skýjaslæðu. 

6 til 11 daga spá; 14. -19. sept.

Þá er að spreyta sig á 6-11 daga veðurspám í þriðja sinn. Sú fyrsta hefur þegar verið metin.  Ég skal alveg viðurkenna að sjálfur hef ég ekki of mikla trú á gagnsemi veðurspáa þetta langt fram í tímann, þar sem jafnframt er krafist svipaðrar nákvæmni í framsetningu og þegar m er að þða þriggja til fimm daga spár.  Verkefnið væri vissulega einfaldara ef maður kæmist upp með almenna vísbendingu um veðurlag allr daganna í heild sinni, þ.e. eitthvað um ríkjandi vindátt eða hvort hiti væri yfir eða undir meðallagi árstímans.

En þá er bara að skella sér beint í djúpu laugina !

Miðvikudagur 14. september:

N-átt verður að ganga niður snemma á miðvikudag og hæðarhryggur á leið austur yfir landið.  Norðan- og austantil birtir upp, en í SV- og V-áttinni verður þá meira skýjað vestantil og smá væta suðvestanlands. Hiti þetta 8 til 12 stig á landinu.

Fimmtudagur 15. september:

Grunn lægð eða lægðardrag fyrir suðvestan og vestan land og fremur hægur sunnanstæður vindur. Lítilsháttar væta sunnan- og suðvestanlands, en öllu bjartara norðan- og austantil.  Tiltölulega milt í veðri. 

Föstudagur 16. september:

Vaxandi lægð sem kemur askvaðandi úr suðvestri og fer að hvessa og rigna með henni.  Kannski ekki snemma dags heldur frekar þegar frá líður og þess vegna ekki fyrr en aðfararnótt laugardags.  Fremur stillt og víðast þurrt verður á undan þessari nýju lægð. 

Laugardagur 17. september:

Djúpa lægðin á leið yfir landið með hvassviðri og jafnvel stormstyrk.  Vindáttin vitanlega breytileg fari svo að sjálf lægðarmiðjan æði yfir landið eða í það minnsta mjög nærri því.  Alltaf þó N- eða NA skot í kjölfarið um tíma og þá með kólnandi veðri.

Sunnudagur 18. september:

Hægari vindur og áttin NV eða V.  Kólnandi veður og niður undir frost um norðanvert landið. Smáél þar eða slydda. 

Mánudagur 19. september:

Svipað veður, V-læg vindátt og fremur svalt.  Skúrir eða slydduél suðvestan- og vestantil, en bjart eystra.

Mat á óvissu.

Svo fremi að reiknilíkönin nái sæmilega dýpt og stefnu þeirrar lægðar sem til verður upp úr fellibylnum KATIA og mun herja nú strax eftir helgi, er sennilegt að NA-átt verði hér í 1 til 2 daga fyrir miðja vikuna.  Hún með bleytu austanlands og alls ekki köld. Í kjölfarið rólegra veður og hæðarhryggur sem líka er frekar sennilegt framhald.  Hins vegar eykst óvissan til muna frá föstudegi og einkum laugardegi þegar gert er ráð fyrir hagstæðum skilyrðum til dýpkunar alvöru haustlægðar.  Í fyrsta lagi hvort hlýtt og kalt loft verði almennilegar í fasa á réttum tíma sem aftur hefur áhrif á stefnu sjálfrar læðgarmiðjunnar.  Til viðbótar þessum klassísku ólíkindavandamálum lægðamyndunar í veðurspám, getur hitibeltislægðin MARÍA hæglega komið þarna við sögu og aukið enn á óvissuna.  Einkum þá hvað varðar tímasetningu og kraft hennar. Þessar hitabeltislægðir hingað norðureftir valda talsverðum usla í líkönunum, sumir munda segja svo miklum að ekki þýddi að vera að  velta vöngum yfir þessu lengra en 3 til 5 daga fram í tímann.  En við reynum nú samt ! 

Fellibylurinn KATIA tekur nú strikið norður Atlantshaf

Fellibylurinn KATIA hefur haldið sig fjarri landi allan sinn lifitíma.  Um skeið náði KATIA að verða öflugur 3. stigs fellibylur, jafnvel 2. stigs eða á mörkum þess í stutta stund.  Nú er hún tekin að veikjast, ekki er lengur til staðar nægjanlegur hiti sjávar undir henni til að kynda "varmavélina".

Á laugardagsmorguninn er því spáð að þetta tiltölulega smáa veðurkerfi komist í tæri við vestanvindabeltið þar sem það hlykkjast yfir Atlantshafið.  Á kortinu hér að neðan af Brunni Veðurstofunnar má sjá skotvindinn (e. jet stream) upp í ca. 9 km hæð.  Ekki mótar fyrir fellibylnum að öðru leyti en því að truflanirnar í línunum er af völdum hans suður af Nýfundalandi.  

 

 

 

 

 

 

 

 

 

 

 

Á öðru spákorti svipaðrar ættar og gildir einnig kl. 06 á laugardag má sjá alla hringina utan um KATIA.  Þrátt fyrir það að vera farin að slappast er engan vegin hægt að segja að hún sé dauð úr öllum æðum.  Nú verður einkar athyglisvert að sjá hvað gerist þegar hún hafnar þarna inni í straumnum.  Það er nokkuð skörp sveigja í skotvindinum norðvestan við þann stað þar sem stefnumótið mun eig sér stað. Slík sveigja myndar gjarnan nýja lægð og þá nánast ofan í gamla fellibylinn.  Við sjáum hins vegar á skotvindinum að lítil hætt er á að þetta nýja afsprengi berist hingað til lands.  Spálíkön gera í dag ráð fyrir versta veðrinu á Írlandi og Skotlandi og þar um slóðir á mánudag. 

Hríðarhragglandi á Þverárfjalli

Eins og þessi mynd úr vefmyndavél Vegagerðarinnar á Þverárfjalli kl. 17:15  ber með sér er kominn hríðarhragglandi á þessum slóðum.

Þetta er ekkert einsdæmi og kólnað hefur niður að frosti á flestum fjallvegum og vegfarendur á Norðurlandi og alveg austur á norðanverða Austfirði mega búast við versnandi skilyrðum, krapa og hálku í kvöld og nótt.

 

 

Norðan (allt að því) áhlaup

Umskiptin nú í veðrinu eru ansi glögg.  Lægð fyrir austan land dýpkar og bæði beinir til okkar og ekki síður dregur niður úr háloftunum kaldara lofti.

Í dag og einkum í kvöld og nótt kólnar mjög ákveðið.  Gera má ráð fyrir krapa eða snjó á flestum fjallvegum frá miðju Norðurlandi og austur um á norðanverði Austfirði. Vestantil á Norðurlandi rofar til og einmitt þar er útlit fyrir að kjarni kaldasts loftsins komi niður.  Þar og á Vestfjörðum, í Dölum og ofantil í Borgarfirðinum gæti hæglega fryst í nótt, líka í byggð og það þó dálítil vindgjóla verði á þeim slóðum.  Hins vegar verður þar nánast alveg þurrt frá því síðdegis.

Allhvass vindur með þessu einkum um austanvert landið, allt að 13-18 m/s. 

Á morgun styttir upp, þó ekki fyrr en um miðjan dag á norðausturhorninu og léttir til um mest allt landið.

Næturfrost verður óumflúið í flestum landshlutum aðfararnótt föstudags og einkum þó nóttina þar á eftir.

Þetta eru glögg straumhvörf í veðráttunni eftir heldur sumarlega fyrstu daga september. Allt tekur þó enda og á sinn tíma ekki satt ? 

Og fyrir þá sem uppteknir eru af fyrirbærinu "fyrstu haustlægðinni", má alveg kalla þessa í dag því nafni. 

(Spákortið er af Brunni Veðurstofunnar oggildir kl. 18 í dag, 7. september.)

6-11 daga spár - hversu nákvæmar reyndust þær ?

25. ágúst spáði ég hér fyrir veður næstu 6-11 daga, þ.e. frá síðasta miðvikudegi (31. ág.) til dagsins í dag (5. sept.).  Nú fyrst er því tímabært að kanna hvernig til tókst.

Valin er sú leið að gefa spánum stig fyrir hvern dag frá 0 og upp í 3.  Spátextinn er vitanlega huglægur og matskenndur og þá ekki síður þegar gæðin eru metinn til stiga. Til að skora hátt verður textinn því að vera sæmilega ítarlegur, en þegar horft er svona langt fram hefur það litla þýðingu að spá breytingu á veðri yfir daginn, frekar frá einum degi og til þess næsta og taka verður tillit til þess. 

Legg til að kvarðinn verði einhvernvegin svona: 

3 stig. Spáin gekk eftir í öllum aðalatriðum.  Á það við um stöðu veðurkerfa, vindátt á landinu og einnig þann breytileika veðurs eftir landshlutum sem spáin gat til.  

2 stig. Spá gekk eftir að sumu leyti, en öðru ekki.  Staða veðurkerfa er a.m.k. í áttina og hitafar með þeim hætti sem spáin gaf til kynna.  Vindátt var e.t.v. ekki sú sama eða greinileg tímahliðrun veðurkerfa. 

1 stig. Ekki hægt að segja að spáin hafi ræst og flest með öðrum hætti, en þó a.m.k. einn tilgreindur veðurþáttur eitthvað í áttina (staða kerfa, vindátt, hiti eða úrkoma).

0 stig. Veður nánast alger andstæða spárinnar að flestu eða öllu leyti. 

Hver dagur verður skoðaður sérstaklega og sótt veðurgreining á hádegi af Brunni VÍ.

Miðvikudagur 31. ágúst:

Grunn lægð eða lægðardrag á Grænlandshafi.  SV-læg vindátt. Þungbúið og úrkoma vestan- og suðvestantil, en þurrt og jafnvel bjart norðan- og austanlands.  Þokkalega hlýtt á landinu.

 Mjög góð spá í flesta staði.  Lægðin á svipuðum slóðum, SV-lægur vindur og hlýtt norðaustantil. Rigning suðvestantil.  3 stig.

 

 

 

 

 

 

 

 

Fimmtudagur 1. september:

Svipað veður og ekki markverðar breytingar.

Sjá má að lægð er uppi í landsteinunum (sú sem bar með sér restarnar af IRENE). Hennar var hins vegar ekki vænst fyrr en á laugardag. Hvass suðvestanlands af SA og talsverð úrkoma suðaustan- og austanlands. Fremur hlýtt.

Strangur dómur hér og aðeins 1 stig.  

 

 

 

 

 

 

Föstudagur 2. september:

Lægðagangur úr suðvestri með S-átt og röku og mildu lofti.  Rigning sunnan- og einkum þó vestanlands. Fremur vindasamt.

 Vissulega lægð við landið og hún var komin upphaflega úr suðvestri, en borist lengra en spáin gerði ráð fyrir.  Milt loft klárlega, en ekki S-átt, heldur A- og NA-átt. Það rigndi talsvert austanlands en mun síður vestanlands.  1 stig. 

 

 

 

 

 

 

 

Laugardagur 3. september:

Svipað veður og sennilega vindasamt. Þessa dagana verður háþrýstisvæði heldur að styrkja sig í sessi við Bretlandseyjar og eykur þannig á líkurnar á suðlægu og mildu lofti komandi daga.  

Lægð við landið eins og spáð var og klárlega vindasamt.  Loftið var suðlægt að uppruna þó vindáttin hafi vart verið S- eða SA. Háþrýstisvæðið sem talað var um reyndist líka austar en yfir Bretlandseyjum (sést ekki) og lægðarmiðjan kannski þessa vegna líka lítið eitt austar þessa daga en ætlað var í spánni og því önnur vindátt og úrkoman í sömu landshlutum.  2 stig hér. 

 

 

 

 

 

Sunnudagur 4. september og mánudagur 5. september:

Fremur hlýtt með S -g SA-átt.  Einkum milt í veðri norðan- og norðaustanlands.  Lægð af einhverju tagi við landið sunnan eða vestanvert á sunnudag/mánudag og rigning frá skilum hennar.

Tveir dagar teknir saman og hér verður vitanlega að bera veður saman nokkuð bókstaflega við raunveruleg veðurkortin. Á sunnudag gekk þetta nokkuð vel eftir lægð við sunnanvert landið og milt norðaustanlands (hitinn komst í 19 stig á Egilsstaðaflv.) Tvíátta á landinu og S-átt aðeins um austanvert landið. Hins vegar ekki rigning. 

2 stig (nokkuð klárlega).

 

 

 

 

 

 

Mánudagur: Fremur hlýtt var í dag með S- og SA-átt.  Lægð fyrir sunnan land og kannski ekki beint hægt að tala um mikla vætu.  Þó skúraleiðingar sunnantil.  Nokkuð góð spá í það heila tekið, en getur þess vegna hafa verið hrein tilviljun ?  3. stig.

 

 

 

 

 

 

Spátímabilið í heild sinni gefur því summuna 12 stig af 18 mögulegum með þessari aðferð.

(Enginn er dómari í eigin sök og því ætti annar en einmitt ég að meta og dæma þessar spár mínar. Allra handanna gagnrýni verður því vel tekið)  

Kvöldskúr í Tungunum

 

 

 

Sigurður Hjalti Magnússon á Högnastöðum í Hrunamannhreppi sendi mér þess skörpu mynd sem tekin var kl. 20:35 í gærkvöldi (4. sept).

Þær voru einmitt nokkuð síðbúnar síðdegisskúrirnar á Suðurlandi í gær.  Sólin lægra á lofti en um mitt sumar og þar með minni kraftur í uppstreymi til myndunar skúrskýja. Í gær, eins og rakið var í síðasta pistli, var tiltölulega hlýtt loft í lægri lögum, en heldur kaldara ofar og slíkt ástand hjálpar til við skúramyndun. 

Þessi skúr í kvöldsólinni í Biskupstungum er skýrt afmörkuð. Myndin er tekin ofan við Haukholt í Hrunamannahreppi. Bærinn fyrir miðri mynd er að ég held Hjarðarland og Stekkholt þar handan við í miðri skúrinni. Gufustrókarnir frá Syðri-Reykjum eru þarna til vinstri. 

Getið var um úrkomu í grennd í veðurathugun á Hjarðarlandi kl. 21 og við vitum nú nákvæmlega hvar sú grennd var séð frá athugunarmanni af hlaðinu á Hjarðarlandi !