Frekari skýringar á flóðunum í Englandi

Þegar ég ók í bæinn nú síðdegis hljómuðu allar fréttir ljósvakastöðvanna nánast eins af flóðunum skelfilegu í Englandi.  Þær hófust iðulega á því að konunglegi herinn hefði komið til aðstoðar og síðan kom að rignt hefði tvöfalt meira en gerir venjulega á heilum mánuði.  Hins vegar var aldrei nefnt hve mikið rigndi og hvar og engin tilraun gerð til að bæta við einfalda þýðinguna á Reuterskeytinu.

Það var sem sagt á stað sem nefnist Pershore í Worcestershire (sjá kortið) þar sem rigndi 135 mm á 24 tímum sl. föstudag.  Meðalúrkoma júlímánaðar á þessum stað er hins vegar 35 mm.  Ekki voru það hefðbundin skil úr vestri sem hafa verið tíð á Bretlandi að undanförnu sem ollu mestu rigninunni.  Að þessu sinni var háloftakuldi og lægðardrag meira austlægrar ættar sem boraði sig niður yfir Englandi á föstudag og staðbundin úrkoma reyndast afar mikil í héruðunum næst fjalllendinu í Wales.

Breska Veðurstofan gaf út ágæta viðvörun daginn áður (sjá  hér), en eins og áður hefur verið rakið, ráða Bretar illa við slíka aftakaúrkomu, vegna þess hve erfitt er að koma ofanvatni í burtu á þéttbýlum svæðum.

Áin Severn rennur um þetta svæði og út í Bristolflóa.  Hún á upptök sín m.a. í fjöllum Wales og er Severn vatnsmesta fljót Englands með 107 rúmmetra meðalrennsli á sekúndu sem er álíka og rennsli Héraðsvatna í Skagafirði. Flóðin í Severn nú eru nálægt því að vera álíka og þau voru í mars 1947.  Þá var um vorleysingaflóð að ræða og þau mestu í ánni í 300 ár eins og ég gat um í pistli fyrir nokkru.

Vatnshæð árinnar náði 10,4 m í Gloucester, en flóðvarnir þar miðast við 10,7 m.  Vandamálið er þó það að Severn er náttúrulegt afrennsli allrar þeirrar úrkomu sem fellur á vatnsviði hennar.  Vandmálið í hnotskurn er það að sökum vatnshæðar í Severn nær vatn frá aðliggjandi svæðum ekki að renna til árinnar og situr eftir þar til sjatnar í sjálfri ánni.  Myndin hér frá miðbæ Stratford-upon-Avon sýnir vandann vel í hnotskurn og greint er frá því nú í kvöld að sums staðar sé vatnsdýpið allt að 1,8 metrar. 

Áfram er spáð vætutíð á Bretlandseyjum líkt og verið hefur undanfarnar vikur.  Svo fremi að vatnsföllin hafi undan við að koma regnvatninu til sjávar skapast ekki umtalsverð vandamál, en um leið og stórrigning verður inni í landi fer af stað keðjuverkun flóðaatburða.  Mun minna þarf til nú en venja er til þegar jarðvegurinn er algjörlega vatnssósa og tekur ekki við meiru.