Útsynningur - loksins !

Ég hef verið að bíða í allan vetur eftir að útsynningur með éljum gerði vart við sig.  Nánast með ólíkindum að ekki hafi gert éljaveðráttu suðvestan- og vestanlands fyrr en nú þennan veturinn.  Er við hæfi að fá þetta hressandi veðurlag á sjálfan Bóndadaginn.  Klakkarnir koma vel fram á veðursjá Veðurstofunnar kl.13:15. Kunnuglegir "hnappar" þar á ferðinni. 

Fyrir nokkrum dögum,  varð hálfgildings útsynningur.  Þá komu veimiltítulegir klakkar úr suðri og suðaustri, í raun loft frá Bretlandseyjum, dreggjarnar af kuldunum sem þar voru.  Þá voru ekki él heldur skúrir og það langt á milli þeirra að ísaði á götum og gangstéttum með þeirri afleiðingu að þrjár til fjórar tylftir manna slösuðu sig á Höfuðborgarsvæðinu einu saman.  

En sem sé, vertu velkominn kæri útsynningur með þínum fagurlöguðu klökkum, hörðu litlu snjókúlunum og hressandi vindblæ úr suðvestri !

En vel að merkja þetta er bara mín óska veðrátta í einn dag, ekki lengur, svo það sé á hreinu.  Enda spáir svo að ekki þarf að hafa áhyggjur af því að útsynningur verði að gera mönnum lífið leitt alveg á næstunni.

Svo njótið endilega dagsins !

 

Athugasemdir

[Höskuldur Búi Jónsson, 22.1.2010 kl. 14:11]

Væri ekki ráð að yrkja ljóð um útsynninginn - ég skal byrja :

Nú anda kaldir vindar kúlum hörðum
klakkar fagrir, augum land á gjóa
sjá þar glitta í opinn Faxaflóa
og fjöllin brátt kitla í háum þröngum skörðum.

[Þorkell Guðbrands (IP-tala skráð) 22.1.2010 kl. 14:50]

Haltu nú áfram, Drangsnesskáld,  með sonnettuna

Svo mættirður setja hana fullbúna á Leirinn, Höskuldur félagi.

[Pálmi Freyr Óskarsson, 22.1.2010 kl. 20:16]

Var að rekast á þetta blogg sem gestir veðurbloggs Einars gætu haft áhuga á.

http://vulkan.blog.is/blog/vulkan/

[Þorkell Guðbrandsson (IP-tala skráð) 23.1.2010 kl. 08:24]

Ég sé að dr. Haraldur segir að ekki hafi náðst ljósmyndir af gjóskuflóði. Ég man hinsvegar ekki betur en til séu ljósmyndir af flóðinu frá Mt. St. Helens 1980. Bæði var að ljósmyndarar voru í talsverðri fjarlægð frá gosinu, sem náðu myndum, og svo fannst filma í vél eins jarðfræðings, sem fórst í flóðinu. Nokkrar myndanna var hægt að skoða, þótt filman væri raunar ansi mikið skemmd. Þetta mátti lesa um í umfjöllun National Geographic árið eftir og þar birtust myndirnar, sem ég vitna til hér að ofan.

[Sigurjón, 24.1.2010 kl. 03:47]

Sæll Einar.

Þú ert einn af þeim fáu sem ég veit um sem fagnar útsynningi...

Hafðu þökk fyrir að vera öðruvísi!