Staðfesting á útbreiðslu öskumóðunnar

Þessi Meris-mynd frá því í hádeginu frá Ingibjörgu Jónsdóttur sýnir vel útbreiðslu öskufjúksins yfir Suður- og Suðvesturland. Það er strekkingur af A og SA syðst á landinu og á Stórhöfða voru um 20 m/s fyrir skemmstu. Segir allt sem segja þarf og ekki er af sökum að spyrja, rykið og morið fýkur auðveldlega. Ég þreytist ekki á að minnast á þátt jökulleirsins í þessu, úr farvegi Markarfljóts sem situr þarna afar þurr og fínn frá upphafsdögum gossins.

Skyggni í Reykjavík var í flugvallarathugun gefið 6 km kl. 14 og og ekki sér lengur til sólar nú þegar er 18 stiga hiti í höfuðborginni.   Mökkurinn í dag nær upp í Borgarfjarðardali, það sé ég sjálfur með eigin augum.

Það versta er að margboðuð væta á sunnudag er á undanhaldi, aðeins skúrir eða smá rigning skv. nýjustu spám. 

VIÐ ÞURFUM RIGNINGU Í NOKKRA DAGA sem nær að bleyta vel í jarðveginum og binda betur öskuna.

Athugasemdir

[Þorkell Guðbrands (IP-tala skráð) 4.6.2010 kl. 15:15]

Já, þetta beinir huga manns að því máli, að maður fær ekki betur séð en úrkoma fari minnkandi hér á skerinu? Ég hef oft minnst á rigningarsumarið 1955, en þá rigndi,  að mér fannst allavega, sérlega mikið og hefði verið gott að fá eitthvað af þeim ósköpum núna til að skola drullunni úr Eyva burtu!  

[Sigurður Þór Guðjónsson, 4.6.2010 kl. 16:37]

Sumarið 1955 var nú eiginlega hamfarasumar fyrir sunnlenska bændur þó ekki væri það vegna öskufalls.

[Þórarinn Þ Gíslason (IP-tala skráð) 4.6.2010 kl. 17:18]

Sæll Einar.

Já við þurfum skýfall í 3 daga,

það væri ágætt , allra hluta vegna.

Kveðja.

[ÞÞ (IP-tala skráð) 5.6.2010 kl. 21:50]

Einar, má ekki með góðum árangri nota garðaúðara með fínni úðun upp við opna glugga til að hreynsa loftið? ég er mjög viðkvæmur fyrir ryki. tilraunin hefur verið í gangi hjá mér í nokkrar klukkustundir. mér finnst hún bæta loftið. kv. þþ