Straumhvörf í veðrinu með fyrirstöðuhæð suður af Íslandi

22.jan kl. 18. Greining GFS í Washington Það eru orðnar breytingar í veðrinu. Veðurlag það sem ríkt hefur meira eða minna frá því fyrir áramót ef ekki lengur, með gangi rigningalægða til austurs yfir Bretlandseyjar og S-Skandinavíu, er lokið og nýr kafli tekinn við. Voldug og víðáttumikil hæð af þeirri tegundinni sem kallast fyrirstöðuhæð er til orðin suður af Íslandi eins og sjá má á veðurkortinu. Hefur hún áhrif á veðurlagið um allt N-Atlantshafið, lengst inn í Evrópu og allt suður í Miðjarðarhaf.

Fyrirstöðuhæðir eru merkileg fyrirbæri, þá varpast upp loftstraumurinn í háloftunum umhverfis norðurhvelið, að þessu sinni einmitt hér í grennd við okkur. Slíkur hlykkur í loftfæribandinu gerir það að verkum að hlýtt loft berst norðar en annars gerist þegar allt er með felldu.

Loftþrýstingurinn með fyrirstöðuhæðinni náði um 1042 hPa með suðurströnd landsins fyrr í dag (Sjá pistil í gær) og um 1044 hPa inn á suðurhálendinu þar sem loftið var kaldara í lægstu lögum og jók því enn á heildar loftþyngdina.

Hæðin veitir lægðum fyrirstöðu og þaðan er hugtakið komið. Hún var þess valdandi að sólin tók að skína loks í dag í Bergen eftir 85 samfellda rigningardaga. Þá er veturinn að verða með eðlilegum hætti í Evrópu. Sjá má á kortinu hvernig kalt loft í háloftunum (í um 5000 metra hæð) sem sýnt er með bláum lit, streymi nú til suðurs yfir Skandinavíu og áfram yfir Mið-Evrópu. Nú undir kvöld var líka komið 4 stiga frost á Kastrup og í N-Svíðþjóð minnti venjulegur vetur á sig með -30°C í Lappahéruðun við landamæri Finlands.

Það er líka farið að snjóa í Svissnesku og Austurrísku Ölpunum. Sem sagt allt nokkuð eðlilegt fyrir miðjan vetur um 22. janúar. Meira að segja snjóaði heilan Vetrarríki í Skotlandi 22. jan. 2007 (BBC) helling eða 80 sm í Skotlandi, nánar tiltekið í Nevis Range. Eðlilega spyr fólk, er þá allt með eðlilegum hætti ? Tja.. nema... að nú verður lægðabrautin harla óvenjuleg með ýmsum furðum í veðrinu annars staðar en þeim sem áður er á minnst. Þannig berast lægðir til norðurs fyrir vestan Grænland og það ásamt fyrirstöðuhæðinni hleypa miklu lífi í hitamæla vesturstrandar Grænlands. Nú í kvöld var t.a.m. +12°C í höfuðstaðnum Nuuk.

Hin lægðbrautin verður inn yfir Miðjarðarhaf með þeirri afleiðingu að innantil berst heitt Saharaloftið til Balkanlandanna. Í gær fór hitinn þannig í 22,5° í Búlgaríu á stað sem venjan er að hitinn sé ævinlega innan við 5°C í janúar og oft frost.

Mestar furðurnar verða ef til vill hérlendis ef fyrirstöðuhæðin nær að ílengjast á þessum slóðum. Þá berst hingað norðureftir merkilega hlýtt loft með afar suðlægan uppruna og það án þess að nokkuð rigni að ráði. Sérstakt ekki satt ? Meira um sérkennin síðar hér á veðurvaktinni.

Flokkur: Veðurspár | 22.1.2007 (breytt 14.9.2009 kl. 14:15) | Facebook