Ljót spá Veðurstofunnar

Veðurstofan spáir nú í morgun SA 25-30 m/s á Faxaflóa og Breiðafirði.  Þetta er sérlega ljót spá þegar svona hátt er farið í horfum um veðurhæðina. Sjá textaspá Veðurstofunnar hér.

Nú þegar (kl.07:15)  er vindur kominn í 25 m/s á Reykjanesbrautinni og undir Hafnarfjalli í 24 m/s með hviðu í morgun upp á 49 m/s.

Vindáttin nú SA-læg, hann verður meira S-lægur um og uppúr hádegi og síðan eftir það SV fram á nótt, en fer að ganga niður að einhverju marki  seint í kvöld.

 Það er ekki aðeins að veðurútlitið sé slæmt heldur einnig það hversu lengi óveðrið mun vara og það um land allt, þó svo að mesta veðurhæðin sé vissulega vestast á landinu. 

Athugasemdir

[Þórarinn Þ Gíslason (IP-tala skráð) 14.12.2007 kl. 08:45]

Nú fylgjas eflaust margir með þér .

Treysti þér  EINUM   til að vera á vaktinni.

 Þú ert ómissandi á þínu sérsviði og mikill Lampi okkar hinna.

GUÐ VERI MEÐ ÞÉR.

[Anna Ólafsdóttir (anno) (IP-tala skráð) 14.12.2007 kl. 10:57]

Sammála síðasta ræðumanni, ómissandi lesning. En ein spurning sem ég velti fyrir mér og hún er úr hvaða átt blæs hér á Akureyri þegar við fáum þetta yfir okkur? Hér er grundvallarmunur á veðurhamnum eftir því hvort áttin er vestlæg eða austlæg þegar þessar djúpu lægðir ganga yfir okkar svæði.

[Einar Sveinbjörnsson, 15.12.2007 kl. 00:55]

Anna !

Það er rétt til getið hjá þér að oftast nær þurfa Akureyringar ekki að hafa áhyggjur af því sem er austan eitthvað, en vestanáttirnar (SV, V og NV) ná sér yfirleitt vel á strik. Hásunnan er líka til leiðinda þegar strengurinn nær sér upp eftir Eyjafirði.  Slíkt ástand er samt fátíðara en annað hvort SA-átt (hristingur í aðflugi í Fokker) eða SV-áttin sem gengur á með rokum, sérstaklega þegar hún er hlý. 

Brautir lægðanna ráða því nokkuð hver vindáttinn verður á Akureyri.  Þessa dagana hefur blásið af SA og síðan SV, en kjarni vindstrengsins haldið sig meira yfir norðvestanverðu landinu og Akureyringar því sloppið nokkuð vel hingað til.

ESv