Veðurspá helgarinnar 20. - 22. júlí

Helgarspá Veðurvaktarinnar

 

 

Föstudagur 20.júlí

Það er gert ráð fyrir því að skýjað verði og einhver rigning norðaustan- og austanlands framan af deginum, en síðan rofi mikið til. Vestantil á Norðurlandi og eins suðaustantil verður þurrt og skýjað með köflum.  Úrkomuskil (kuldaskil) ganga hins vegar inn á vestanvert landið um og fyrir hádegi og með eindreginni rigningu.  Hitinn verður á bilinu 11 til 19 stig, einna hlýjast norðanlands og einnig suðaustanlands og á Austfjörðum. Sunnan og  suðvestanátt um 10 m/s vestantil, en annars hægari.  þó staðbundir vindstrengir norðanlands og eins á hálendinu. 

Laugardagur 21.júlí

Skilin verða á leið yfir landið framan af deginum.  Dálítil rigning um miðbik landsins, en vestantil styttir upp að mestu, en þar verður þó víðast skýjað.  Austanlands verður skýjað með köflum eðan víðast alveg þurrt.  Þar gæti orðið einna hlýjast 17-20 stig yfir daginn, en annars má gera ráð fyrir hita 11 til 15 stig, sem sagt fremur milt í veðri þrátt fyrir sólarleysið. Vindur hægur víðast hvar, suðvestlægur í grunninn, en víða hafgola.

 

Sunnudagur 22.júlí

Lægðardrag verður skammt vesturundan og því rigning eða súld frá Snæfellsnesi vestur á firði og áfram yfir vestanvert Norðurland. Um sunnan- og austanvert landið verður þurrt en nokkuð óvissa er með skýjafarið.  Þó líkast til nokkuð bjart austan- og suðaustanlands.  Lítið eitt kólnandi, en þó ekki hægt að tala um annað en að milt verði áfram í veðri.  Hæglætisvindur á landinu öllu.

Vænlegasti landshlutinn: Austurland, Austfirðir og Suðausturland austan Öræfa

 

   Einar Sveinbjörnsson

Veðursyrpa á þjóðhátíðardegi Bandaríkjanna

Sjá þessa færslu hér

Mikill viðbúnaður á þjóðhátíðardegi Bandaríkjanna

Hið besta veður þennan föstudag

Sjá má við það að skoða veðurathugunarlista Veðurstofunnar að léttskýjað er um nánast allt land, aðeins suðaustantil og sum staðar á Austfjörðum er skýjað og úrkoma á stöku stað.  Höfuðborgarbúar hafa m.a. dásamað veðurblíðuna í dag og finnur maður vel fyrir ánægjunni og  ferðahugur var greinilega í mörgum þegar ég fór í banka og matvörubúð nú eftir hádegi. 

Kl. 15 var hitinn hæstur 18°C á Þingvöllum, í Stafholtsey í Borgarfirði og á Hjarðarlandi í Biskupstungum.  Annar sést vel á kortinu hér sem einnig er af vef VÍ hvað veðrið er blítt um nánast allt land.  

Flóðin á Englandi ekki í tengslum við gróðurhúsaáhrifin

Flóðin í Englandi sem sagt hefur verið frá, eru eins og gefur að skilja vegna mikilla rigninga sem verið hafa að undanförnu.  Niðurföll hafa ekki sums staðar haft undan og ár hafa flætt yfir bakka sína.  Í þéttbýlu landi eins og Englandi eru vandræði vegna vatns sem kemst ekki leiðar sinnar alvanaleg, enda getur í sumum hérðuðum rignt mikið rétt eins og hér á landi við ákveðin skilyrði.

Vandræðin sem Bretar standa frammi fyrir nú eru gamalkunn. Farvegir vatnsfallanna eru ekki náttúrulegir nema að óverulegum hluta.  Þar sem ár renna í dölum eða nærri borgum og bæjum er farvegur þeirra meira og minna gerður af mannavöldum.  Árnar eru það sem kallað er stokksettar.  Tilgangurinn er sá að varna því að vatn renni um náttúrulegan flóðfarveg árinnar.  Það að hemja vatnsfall með þessm hætti gefur yfirleitt ágæta raun í venjulegum minniháttar flóðum.  En þegar vatnsmagnið verður meira en sem nemur "stokknum", hinum manngerða farvegi, byrja vandræðin og ekkert fæst við ráðið.

Bretar og Evrópubúar á meginlandinu hafa búið við þess ógn í aldir og lært að lifa með henni.  Enda var það svo að árnar, sérsaklega hina stærri voru og eru enn lífæðar.  Á þeim er fluttur varningur og frjósömustu svæði til ræktunar þóttu ævinlega vera nærri vansföllum.  Því skyldi engan undra að einmitt þar risu helstu borgirnar.

Að kenna gróðurhúsáhrifum af mannavöldum eins og í athugaemd hér að ofan nær engu tali og heldur  ekki notkun óvistvænna þvottaefna.  Rigningarótíð er fylgifiskur verðurfars Bretlandseyja, en ef eyjarnar væru ekki byggðar tæplega 100 milljónum manna, væru t.a.m. eitt risastórt náttúruverndarsvæði, tæki heldur ekki nokkur maður eftir ástandinu.  En menningarsögunni verður ekki snúið við. 

Myndin hér til hliðar  er fengin af vef BBC og sýnir þessa umtöluðu stíflu sem hætta er á að bresti.  Eins og greina má er farið að renna úr stífluveggnum.  Í fréttinni á BBC er frá því greint að helst óttist menn ef stíflan bresti að mikilvægur háspennustrengur þarna í grenndinni fari í sundur.  En Bretar vita alveg hvað þeir eru að gera og þeir rýma svæði til að fyrirbyggja það að fólki sé hætta búin, fari allt á versta veg. Margháttað eignatjón er hins vegar erfitt að koma í veg fyrir. 

Og svo spila að sjálfsögðu fjölmiðlarnir með, beinar útsendingar frá flóðasvæðum, æsifrettastíllinn, æpandi blaðamenn í "standuppi" undir regnhlíf,  og allt það sem við þekkjum svo vel.  

Síðan má við þetta bæta að ekki er gert ráð fyrir að vætutíðinni linni á Bretlandseyjum næstu dagana hið skemmsta. 

Bretar yfirgefa heimili sín vegna flóðahættu

Glæsileg mynd -hér í stærri upplausn

Ingibjörg Jónsdóttir er einkar fundvís á góðar tunglmyndir. (sjá síðu hennar, Hafís við Ísland).

Græn/rauða geislunarútgáfan er sérlega athyglisverð nú, bæði þegar þónokkur háfís er enn á sínum slóðum úti á Grænlandssundi og eins þegar snjór, jafnvel nýlegur snjór situr í fjöllum t.d. á N-verðum Vestfjörðum.

H ér er hins vegar ljósmyndin er betri upplausn.  Fjöldi veðurathugunarstöðva hefur gefið upp heiðríkju í dag og þokan sem var við Norðurland í morgun, hefur verið á hröðu undanhaldi.  Suðaustanlands hefur aftur á móti verið skýjað eins og sjá má og jafnvel úrkomuvottur. Yfir landinu er háþrýstingur og almennt  niðurstreymi lofts.  Einu bólstraskýin sem talandi er um að myndast hafi í sterku sólskininu yfir landinu má sjá á myndinni. Ógreinilega þó, en þau eru yfir Reykjanesfjallgarðinum.  Höfuðborgarbúar gátu lík séð þau með eigin augum.  Suðvestur af Hofsjökli virðast vera ský, en græn/rauða útgáfan sýnir svo ekki verður um villst að þar er á ferðinni snjór í "Hreppafjöllunum" 

Ísland séð utan úr geimi

Veðurlagsspá út mánuðinn

Hér kemur veðurspá  það sem eftir lifir júnímánaðar. Ég gerði nokkrar tilraunir fyrir nokkuð löngu síðan að setja fram veðurlagsspá til þriggja vikna byggðar á útreikningum frá ECMWF (sjá hér skýringar og eldra dæmi).  Vikan hér hefst á mánudegi og lýkur á sunnudegi.

11 - 17. júní

Tvískipt veðurlag, háþrýstingur í grennd við landið. Úrkomulítið á landinu sums staðar alveg úrkomulaust. Fremur hlýtt og sólríkt og hægur vindur.  Um og upp úr miðri viku sjáum við lægðir eða lægðadrög koma úr suðvestri og suðlægri vindátt.  Þá með einhverri rigningu sunnan- og vestanlands, en bjartvirðri og vænum hita víðast norðan og austanlands.

18. - 24. júní

Lægðir fyrir sunnan land og hér ríkjandi A-læg átt.  Sæmilega hlýtt og hitinn heldur yfir meðallagi árstímans, einkum suðvestan-  og vestanlands.  Þar er gert ráð fyrir lítilli úrkomu, svo og norðanlands og á Vestfjörðum. Gangi þetta eftir verður meira um vætu á Suðausturlandi og Austfjörðum.

25. júní - 1. júlí

Svipað veðurlag og í fyrri viku, en þó verða lægðirnar eitthvað ágengari og úrkomusamara verður þá  og sunnan- og suðvestanlands, en áfram í þurrara lagi um N- og NV-vert landið. 

Margar skráðar eldingar í Niðurlöndum og Norðursjó

Mikið þrumuveður hefur gengið yfir tiltekið svæði í Evrópu, nánar tiltekið Holland og Belgíu og hefur það síðan færst út á Norðursjó og náð að snerta  SA-England.  Kortið sýnir staðsettar eldingar í gær (gulir krossar) og í dag (rauðir punktar). Kortið er sótt laust fyrir kl. 05 í nótt, þannig að sjá má að fjöldi eldinga frá miðnætti er talsverður.  Þetta kort er fengið af eldingavef Veðurstofunnar og menn geta lesið sér þar til um það hvernig þetta skemmtilega vöktunarkerfi eldinga virkar.

Á tunglmyndinni hér að neðan sem er frá kl. 21:16 í gærkvöldi má sjá mikinn skýjagöndul á þessum slóðum.   Afar hlýtt loft er nú yfir V- og N-Evrópu og eins og greint var frá í fyrri færslu fór hitinn yfir 30 stig í Osló í gær.  Svo hlýtt loft inniheldur alla jafna mikinn raka í neðri loftlögum og verði það fyrir lyftingu vegna óstöðugleika rísa háreist skúraský og eldingum lýstur niður.  Yfir S-Skandinavíu er nægum óstöðugleika hins vegar ekki fyrir að fara.

Slíkur óstöðugleiki á sér oftast nær tvenns konar ólíkan uppruna eða aðdraganda.  Í fyrsta lagi þegar hitafall með hæð er mikið, sem getur ekki átt sér stað nema þegar mun kaldara  er í háloftunum en hitinn í neðri lögum gefur tilefni til.  Ef sól skín á landssvæði og nær enn fekari upphitun við jörðu, næst þó stundum óstöðugleiki þó svo að engin sérstakur kuldi sé hið efra. Hinn uppruni er sá að samleitni loftsins á sér stað, þ.e. að vindar beina lofti inn að einum punkti, eða oftar inn að svæði sem líkist línu.  Við það er loftið þvingað til uppstreymis og  sé afar hlýtt og rakt hið neðra fer í gang nokkurs konar keðjuverkun uppstreymis þegar  ský myndast. Við það leysist dulvarmi úr læðingi sem aftur eykur á óstöðugleika og frekara uppstreymi.

Það er einmitt þetta síðara ferli sem á sér stað nú, enda sjáum við að eldingaveðrið er þessa stundina í mestum ham úti á sjó.  Samleitni loftsins í neðri lögum er ekki ólík því sem  örvarnar sýna.  Það sem kemur úr austri og suðaustri er nokkru hlýrra og fæðir því uppstreymissvæðið af bæði varma og einkanlega raka, en hann þéttist síðan og fellur sem úrkoma í "þrumuvélinni" sem við getum kallað þetta band af óveðursskýjum.

Uppstreymissvæðið mun skv. spám koðna niður seint í dag, laugardag.

 

Hitastigið fór yfir 30 stig í Osló í dag

Norska Veðurstofan greinir frá því að hitastigið síðdegis hafi farið í 30,9 stig við hús Veðurstofunnar í Osló á Blindern.  Þetta er þó ekki met en fara þarf meira en öld aftur til að finna eitthvað sambærilegt. Fyrr í mánuðinum eða 5. júní árið 1897 mældist hitinn rúmlega 31 stig í Osló.

Mynd fengin af Dagbladet.no

Í þessum annars veðursæla höfuðstað Norðmanna hefur mælst hærri hiti í júní eða 32,8 stig, en það var 27. júní 1988.

Af norkum fjölmiðlum að dæma er þjóðin, eða sá hlutin hennar sem býr í suðurhlutanum hálfpartinn að ganga af göflunum (í jákvæðri merkingu) í þeirri veðurblíðu sem verið hefur að undanförnu.  Vel er hægt að svamla í sjónum með Oslóarfirði, enda hann mun hlýrri nú en venja er til svo snemma sumars.  Greint er frá því að sjávarhitinn sé staðbundið kominn í 21 stig.  Það þykir mér ótrúlegt, en rengi þó vitanlega ekki þær fréttir.

Áfram er spáð hitabylgju í S-Skandinavíu næstu daga, en frá þriðjudegi mun hitastigðið eitthvað rétta sig af samkvæmt veðurspám.

 

Hitamet slegið í Suður-Noregi

Skýrslan um snjó og ís er frá UNEP

Þessi samantekt er frá UNEP, umhverfisstofnun Sþ, sem ekki má rugla saman við IPCC (International Panel on Climatic Change).  Þaðan hafa verið að berast uppfærðar spár um hlýnun andrúmslofts næstu 100 árin. Þessi samantekt UNEP fjallar eingöngu um áhrif hlýnunar á þau svæði jarðar þar sem snjór og eða ís koma við sögu. 

Menn leggja við hlustir þegar  UNEP lætur til sín taka og í stuttri fréttatilkynningu hér frá Tromsö má m.a. sjá að nýjar rannsóknir benda til þess að áætlað er að á næstu áratugum muni losun á metani verða fimm sinnum meiri  en áður hafði verið áætlað frá  freðmýrum í Síberíu þegar jarðklakinn þiðnar miðað við þær forsendur sem menn gefa sér um áhrif hlýnunar.

En skýrsluna verður maður vitanlega að kynna sér betur ! 

 

Bráðnun íss hraðar áhrifum hlýnunar

Barry og Barbara

Barry og Barbara eru ekki bandarísk hjón eins og einhver kynni að halda.  Barry er vitanlega nafnið á þessum hitabeltisstormi sem verið hefur ausa úr sér vatni yfir íbúa Flórída eins og frétt mbl.is ber með sér.  Barbara er líka hitabeltisstormur sem Mexíkóar Kyrrahafsmegin hafa verið að fylgjast með að undanförnu.

Fellibyljasvæði heimsins eru nokkur, við þekkjum best til Atlantshafsins/Karabíahafsins en minna til Kyrrahafsins þar sem hitabeltislægðir eiga það til að myndast undan ströndum Mexíkó.  Kyrrahafssvæðið var afar virkt í þessum efnum í fyrra á meðan Atlantshafssvæðið var með rólegasta móti sbr. þessa færslu mína.

En það er skemmtileg tilviljun að svo að segja á sama tíma skuli bera upp tvo hitabeltisstorma og báðir nr. tvö í röðinni og fá því heiti með B sem upphafsstaf.

Myndin sýnir Barböru og er af vef NASA og tekin reyndar 30. maí.  Mín vegna geta þessir hitabeltisstormar verið hjón, ef einhver fæst til að gefa þau saman :) 

Úrhelli á Flórída í upphafi fellibyljatíðar