Verður í fyrramálið vegið að janúarhitametinu, +18,8°C ??

24.jan kl. 06. Spákort GFS hiti og hæð 850 hPa flatar Þannig háttar nú til í veðurstöðunni að á leiðinni til okkar er afar hlýtt loft. Fyrirstöðuhæðin hlýja suðurundan beinir til okkar þessu suðlæga lofti. Í raun er það þó svo að loftið kemur ekki hér siglandi ofan á haffletinum heldur er málum háttað þannig að samspil hæðarinnar og Grænlands er með þeim hætti að hlýjasta loftið kemur að ofan, með niðurstreymi.

Í fyrramálið kl. 06 má sjá á spákorti að reiknað er með að hitastig í 850 hPa fletinum í um 1.400 m hæð verði um +10°C. Loftið þarna er komið að ofan og sé það dregið áfram niður til yfirborðs ætti hitastig þess að verða um +20°. Skilyrði til þess er helst að vænta hlémegin hárra fjalla, og vindur yfir landinu þarf helst að vera nokkuð hvass.

Þessi hlýjasti kjarni loftsins verður á ferðinni í fyrramálið og á nokkuð hraðri austurleið. Þess er helst að vænta að hitastigið nái háum hæðum suðaustanlands, ekki ólíklega ennig á sunnanverðum Austfjörðum. Ekki ætla ég að spá því hvar verður hlýjast, það fer eftir staðháttum, þ.e. hvar niðurdráttur lofts getur átt sér stað hlémegin fjalla. í þeirri sérstöku VNV-átt sem liggur í loftinu. Það gæti orðið á Fagarhólsmýri eða Höfn, en mögulega einnig á Teigarhorni í Berufirði. Fleiri veðurathugunarstöðvar eru vitanlega á þessu landsvæði.

En nú að janúarhitametinu +18,8°C. Það er frá Dalatanga 14. janúar 1992. Sjálfur var ég á vakt á Veðurstofunni þessa nótt og man þennan atburð vel. Kl. 03 í kolniðamyrkri las veðurathugunarmaðurinn á Dalatanga ef ég man rétt 18,2°C af hitamælinum. Hvasst var af vestri og má sjá stöðu veðurkerfa á miðnætti þennan dag hér að neðan. Óvenjuleg hlýindi voru almennt á landinu daginn áður og fréttamenn voru nokkuð spenntir að greina frá þessu óvenjulega veðri, því þessa veturna var veður eðlilegra en síðar varð, oftar en ekki snjóþyngsli og vetrarveður. Þennan morguninn hringdi Guðrún Eyjólfsdóttir nýkomin á fréttavakt útvarps til að fá tíðindi í morgunfréttir af hlýindunum. Ég man vel að hún rak upp skellihlátur þegar hún heyrði að hitinn hefði farið í 18,9°C á Dalatanga um nóttina á meðan landsmenn sváfu flestir fastasvefni !

Nú háttar svo til að loftið yfir landinu virðist ætla að verða þegar best lætur ívið hlýrra en varð þennan janúardag 1992. Hitinn þá í 850 hPa fletinum var +7°C. Nú +10°C. Til þess að draga enn betur fram hvað óvenjulegur veðuratburður getur verið í vændum að hlýjasta dag sumarsins 2006, eða þann dag sem hæstur hiti mældist á veðurstöð, þ.e. 3. ágúst, að þá var hitastigið þarna uppi í um 1.400 metra hæð heldur lægra en nú stefnir í. Þá var vitanlega mikil hjálp í sólinni á ná upp háum hita við yfirborð (25,3°C í Ásbyrgi) ásamt varmanum í sjálfum loftmassanum. Nú um miðjan vetur er hins vegar sólinni ekki til að dreifa aðeins hinn suðlægi loftmassi !!